|
|
 |
| (GMT+08:00)
2008-05-14 11:03:07
|
 |
|
ເສັ້ນທາງຊີວິດຂອງເມືອງເວິນຊ່ວນໄດ້ເປີດແລ້ວ
cri
Author: cai
ຕາມຂ່າວສານຊີນຮວາ:ເວລາ 23 ໂມງ 15 ນາທີວັນທີ 13 ພຶດສະພານີ້,ກອງຊ່ວຍເຫຼືອກອງທຳອິດໄດ້ເດີນທາງໄປຮອດເມືອງເວິນຊ່ວນ,ເສັ້ນທາງຊີວິດຂອງເມືອງເວິນຊ່ວນກິ່ງແຂວງປົກຄອງຕົນເອງເຜົ່າຕິເບດເຜົ່າຊ່ຽງອາບ້າແຂວງເຊສວນທີ່ເປັນສູນກາງແຜ່ນດິນໄຫວຮ້າຍແຮງໄດ້ເປີດແລ້ວ.
ພາຍຫຼັງເກີດແຜ່ນດິນໄຫວຢູ່ເມືອງເວິນຊ່ວນແລ້ວ,ເສັ້ນທາງຄົມມະນາຄົມ ໄຟຟ້າແລະການສື່ສານລ້ວນແຕ່ໄດ້ຂາດສະບັ້ນ,ເມືອງເວິນຊ່ວນທີ່ມີປະຊາກອນ 1 ແສນກວ່າຄົນໄດ້ຂາດການຕິດຕໍ່ກັບພາຍນອກ.
ຕອນບ່າຍວັນທີ 13 ພຶດສະພານີ້,ກອງໜ້າທີ່ປະກອບດ້ວຍ 30 ຄົນໄດ້ຍ່າງໄປຮອດຕາແສງຢີ້ງສີ້ວເມືອງເວິນຊ່ວນ,ແລະໄດ້ຊ່ວຍຄົນທີ່ໄດ້ຮັບບາດເຈັບ 300 ຄົນແລ້ວ.
ຕອນຄ່ຳວັນທີ 13 ພຶດສະພານີ້,ກອງພົນໃຫຍ່ຕຳຫຼວດປະກອບອາວຸດທີ່ປະຈຳແຂວງເຊສວນໄດ້ສົ່ງ 200 ຄົນໄປຮອດເມືອງເວິນຊ່ວນ,ດຳເນີນການຊ່ວຍເຫຼືອຢ່າງວ່ອງໄວ.
ນັບມາຮອດເວລາ 8 ໂມງວັນທີ 14 ພຶດສະພານີ້,ກອງຕຳຫຼວດປະກອບອາວຸດໄດ້ສົ່ງນາຍແລະພົນຕຳຫຼວດ 800 ກວ່າຄົນໄປຊ່ວຍເຫຼືອເມືອງເວິນຊ່ວນ.ກອງຫຼັງຍັງພວມເດີນທາງຕາມໄປ.
ນອກນີ້,ຂ່າວແຈ້ງວ່າ,ຕອນທ່ຽງວັນທີ 13 ພຶດສະພານີ້,ອົງການປົກຄອງກິ່ງແຂວງປົກຄອງຕົນເອງເຜົ່າຕິເບດເຜົ່າຊ່ຽງອາບ້າກັບຜູ້ນຳເມືອງເວິນຊ່ວນໄດ້ຟື້ນຟູການສື່ສານໂດຍໃຊ້ໂທລະສັບດາວທຽມ.ຕາມຜູ້ນຳເມືອງເວິນຊ່ວນກ່າວວ່າ,ເມືອງເວິນຊ່ວນໄດ້ດຳເນີນການກູ້ໄພດ້ວຍຕົນເອງ,ປະຊາຊົນ 3 ໝື່ນກວ່າຄົນໃນເມືອງໄດ້ຍ້າຍໄປຢູ່ບ່ອນປອດໄພແລ້ວ,ປະຊາຊົນ 6 ໝື່ນຄົນຢູ່ຢີ້ງສີ້ວ ຊວນໂຂແລະອົ້ວລົງເປັນຕົ້ນທີ່ເປັນສູນກາງແຜ່ນດິນໄຫວຍັງບໍ່ທັນຮູ້ຊະຕາກຳເທື່ອ.
|
|
|
