|
|
 |
| (GMT+08:00)
2008-05-17 16:41:56
|
 |
|
ຜູ້ກູ້ໄພຢູ່ແຂວງເຊສວນໄດ້ດຳເນີນການກອບກູ້ຂະໜາດໃຫຍ່ຮອບດ້ານທີ່ເອົາການກອບກູ້ຊີວິດເປັນຈຸດໜັກ
cri
Author: mo
ຕາມຂ່າວສານຊີນຮວາ: ແຜ່ນດິນໄຫວໃຫຍ່ພິລຶກທີ່ເກີດຂຶ້ນຢູ່ເມືອງເວີ້ນຊວນແຂວງເສສວນໄດ້ຜ່ານໄປ 100 ກວ່າຊົ່ວໂມງແລ້ວ, ເຖິງວ່າໄດ້ຜ່ານ"ເວລາກອບກູ້ທອງຄຳ"ຄື 72 ຊົ່ວໂມງແລ້ວກໍ່ຕາມ, ແຕ່ຜູ້ກອບກູ້ບໍ່ໄດ້ປະລະຄວາມຫວັງຂອງແຕ່ລະຊີວິດ, ທ່ານຫູຈີນທ່າວ ແລະທ່ານເວີ່ນເຈຍປາວ ຜູ້ນຳຂອງຈີນລ້ວນແຕ່ກ່າວວ່າ, ຕ້ອງສືບຕໍ່ກູ້ຄົນດ້ວຍຄວາມພະຍາຍາມສຸດຂີດ, ຂໍແຕ່ວ່າມີຄວາມຫວັງ1%, ກໍ່ຕ້ອງທຳຄວາມພະຍາຍາມ 100%. ປັດຈຸບັນ, ຜູ້ກອບກູ້ພວມດຳເນີນການກອບກູ້ຂະໜາດໃຫຍ່ຮອບດ້ານທີ່ເອົາການກອບກູ້ຊີວິດເປັນຈຸດໜັກ.
ຕາມສະຖິຕິຂອງພາກສ່ວນທີ່ກ່ຽວຂ້ອງ, ນັບມາຮອດ 14 ໂມງຂອງວັນທີ 16 ພຶດສະພານີ້, ຈຳນວນຄົນທີ່ເສຍຊີວິດຍ້ອນແຜ່ນດິນໄຫວເວີ້ນຊວນແຂວງເສສວນໄດ້ມີເຖິງ 22.069 ຄົນແລ້ວ.
ປັດຈຸບັນ, ກອງທັບປົດປ່ອຍແລະກອງຕຳໜວດປະກອບອາວຸດຂອງຈີນໄດ້ສົ່ງທະຫານແລະຕຳຫຼວດ 110.000 ຄົນເຂົ້າຮ່ວມການກູ້ໄພ. ຍົນເຮລີກົບຂອງທະຫານທີ່ເຂົ້າຮ່ວມການກູ້ໄພກໍ່ມີຮອດ 99 ລຳ. ກອງກອບກູ້ສາກົນທີ່ມາຈາກຍີ່ປຸ່ນ ຣັດເຊຍ ສ.ເກົາຫລີ ແລະສິງກະໂປ, ພ້ອມດ້ວຍກອງກອບກູ້ຂອງເຂດຮົງກົງແລະໄຕ້ຫວັນຂອງຈີນກໍ່ໄດ້ໄປຮອດເຂດປະສົບໄພແລະດຳເນີນວຽກງານກູ້ໄພ.
ນັບແຕ່ວັນທີ 16 ຫາຕອນເຊົ້າວັນທີ 17 ພຶດສະພານີ້, ນາຍແລະພົນທະຫານຂອງກອງກອບກູ້ໄດ້ກູ້ອອກມາ 160 ກວ່າຄົນອອກຈາກຊາກອາຄານ.
ນັບມາຮອດເວລາ 20 ໂມງຂອງວັນທີ 16 ພຶດສະພານີ້, ໂຮງໝໍປະເພດຕ່າງໆໃນແຂວງເສສວນໄດ້ຮັບປິ່ນປົວຜູ້ບາດເຈັບ 110.000 ກວ່າຄົນ, ໃນນັ້ນ, ຜູ້ບາດເຈັບໜັກປະມານ 16.000 ຄົນ.
ນອກນີ້, ຕາມການສະຖິຕິຂອງກະຊວງການປົກຄອງແລະປະຊາສົງເຄາະຈີນ, ນັບມາຮອດເວລາ 16 ໂມງຂອງວັນທີ 16 ພຶດສະພານີ້, ວົງການຕ່າງໆຂອງຈີນແລະຕ່າງປະເທດໄດ້ບໍລິຈາກເງິນແລະວັດຖຸ 3 ຕື້ 175 ລ້ານຢວນໃຫ້ເຂດປະສົບໄພແຂວງເສສວນ, ໃນນັ້ນ, ໄດ້ຮັບເງິນແລະວັດຖຸທີ່ໄລ່ເປັນເງິນຢວນຈີນ 580 ລ້ານຢວນຈາກລັດຖະບານຂອງ 19 ປະເທດແລະ 4 ອົງການສາກົນ.
ວັດຖຸກູ້ໄພທີ່ປະເທດຕ່າງໆເຊັ່ນຣັດເຊຍ ປາກີສະຖານ ແອັສປາຍ ສິງກະໂປ ຟີລິບປິນ ແລະຝຣັ່ງເປັນຕົ້ນຊ່ອຍເຫຼືອຈີນນັ້ນໄດ້ຂົນສົ່ງໄປຮອດແຂວງເສສວນຢ່າງຕໍ່ເນື່ອງກັນ, ແລະຖືກຂົນສົ່ງໄປເຂດປະສົບໄພຢ່າງວ່ອງໄວ.
|
|
|
