|
ເຈົ້າໜ້າທີ່ກູ້ໄພແຜ່ນດິນໄຫວຊ່ວຍກອບກູ້ຄົນອອກມາໄດ້ 33.434 ຄົນ
cri
Author: mo
ຕາມຂ່າວສານຊີນຮວາ: ສູນຂ່າວການກູ້ໄພແຂວງເສສວນຈີນແຈ້ງໃຫ້ຊາບວ່າ, ນັບມາຮອດ 16 ໂມງຂອງວັນທີ 17 ພຶດສະພານີ້, ເຈົ້າໜ້າທີ່ກູ້ໄພໄດ້ກອບກູ້ເອົາ 3 ໝື່ນ 3 ພັນ 434 ຄົນອອກຈາກຊາກອາຄານ. ພ້ອມກັນນັ້ນ, ຍ້ອນທະຫານເຂດເສີງຕູ່ໃຊ້ຍົນເຮລິກົບແຕຂົນສົ່ງ 595 ຄົນອອກຈາກເມືອງນ້ອຍຢິ້ງຊີ້ວ, ປັດຈຸບັນ, ເມືອງນ້ອຍຢີ້ງຊີ້ວ ທີ່ເປັນຈຸດສູນກາງແຜ່ນດິນໄຫວບໍ່ມີຜູ້ບາດເຈັບໜັກແລ້ວ.
ນັບມາຮອດ 14 ໂມງຂອງວັນທີ 17 ພຶດສະພານີ້, ແຜ່ນດິນໄຫວຢູ່ແຂວງເສສວນໄດ້ເຮັດໃຫ້ 2 ໝື່ນ 8 ພັນ 881 ຄົນເສຍຊີວິດ, ບາດເຈັບເກືອບ 2 ແສນຄົນ. ໂຮງໝໍຕ່າງໆຂອງທ້ອງຖິ່ນໄດ້ປິ່ນປົວຜູ້ບາດເຈັບ 1 ແສນ 2 ໝື່ນກວ່າຄົນ, 4 ໝື່ນກວ່າຄົນຍັງນອນຢູ່ໂຮງໝໍ.
ວັນທີ 18 ພຶດສະພານີ້, ກົມແຜ່ນດິນໄຫວຈີນແຈ້ງໃຫ້ຊາບວ່າ, ຕາມບັນດາໜ່ວຍປະເມີນຄວາມປອດໄພຢູ່ບ່ອນແຜ່ນດິນໄຫວລາຍງານວ່າ, ເຂດເວີ້ນຊວນແຂວງເສສວນປະສົບໄພຢ່າງໜັກໜ່ວງ, ອາຄານ 80%ຫາ90% ເພພັງ.
ນັບມາຮອດ 20 ໂມງຂອງວັນທີ 17 ພຶດສະພານີ້, ເຂດແຜ່ນດິນໄຫວໄດ້ເກີດແຮງສັ່ນສະເທືອນຕາມມາແຮງກວ່າ 4 ລິກເຕີມີ 146 ເທື່ອ, ໃນນັ້ນ, ຂັ້ນ 5 ລິກເຕີຂຶ້ນໄປມີ 23 ເທື່ອ, ໃນນັ້ນ, ແຮງສັ່ນສະເທືອນຕາມມາທີ່ແຮງກວ່າໝູ່ແມ່ນຂັ້ນ 6,1 ລິກເຕີທີ່ເກີດຂຶ້ນໃນ 15 ໂມງຂອງວັນທີ 13 ພຶດສະພານີ້.
|
|
