|
ຕາມຂ່າວສານຊິນຮວາ: ວັນທີ24ພຶດສະພານີ້, ໃນເວລາຢື້ຢາມຖາມຂ່າວປະຊາຊົນຜູ່ປະສົບໄພແຜ່ນດິນໄຫວຢູ່ແຂວງເສສວນ,ທ່ານເວີນເຈຍປາວ ນາຍົກລັດຖະມົນຕີຈີນ, ຜູ່ບັນຊາການສູງສຸດຂອງກອງບັນຊາການໃຫຍ່ກູ້ໄພແຜ່ນດິນໄຫວຂອງລັດຖະບານຈີນກ່າວວ່າ, ຄຽງຄູ່ກັບການສືບຕໍ່ເຮັດວຽກງານຊ່ອຍກອບກູ້ໃຫ້ດີນັ້ນ ຈະຈັດວາງປະຊາຊົນຜູ່ປະສົບໄພ ແລະ ວຽກງານສ້າງສາຄືນໃໝ່ ໄວ້ຢູ່ຖານະທີ່ພົນເດັ່ນ, ຍາດແຍ່ງໃຊ້ເວລາ3ເດືອນເຮັດໃຫ້ການຈັດວາງໃນເຂດປະສົບໄພເປັນລະບຽບຮຽບຮ້ອຍ, ແລະ ໃຫ້ປະຊາຊົນໄດ້ດຳລົງຊີວິດ ເປັນປົກກະຕິ.
ຢູ່ເມືອງູອີ້ງສິ້ວ ເຂດໃຈກາງແຜ່ນດິນໄຫວເທື່ອນີ້, ທ່ານເວິນເຈຍປາວໄດ້ພົບປະທ່ານບານກີມູນ ເລຂາທິການໃຫຍ່ສະຫະປະຊາຊາດທີ່ມາສຳຫຼວດກວດກາ. ທ່ານເວີນເຈຍປາວກ່າວວ່າ, ຫຼັງຈາກເກີດ ແຜ່ນດິນໄຫວແລ້ວ,ປະເທດຕ່າງໆໃນໂລກ ແລະ ສະຫະປະຊາຊາດໄດ້ສະໜອງການຊ່ວຍເຫຼືອດ່ວນແກ່ປະເທດຈີນ, ລັດຖະບານຈີນ ແລະ ປະຊາຊົນຈີນສະແດງຄວາມຂອບອົບຂອບໃຈຢ່າງຈິງຈັງ. ປະຊາຊົນຈີນເຊື່ອໝັ້ນວ່າ, ມີການສະໜັບສະໜູນ ແລະ ການຊ່ວຍເຫຼືອຂອງປະຊາຄົມໂລກ, ພວກເຮົາຍ່ອມຈະໄດ້ຮັບໄຊຊະນະໃນການຕ້ານໄພ ແລະ ກູ້ໄພຢ່າງແນ່ນອນ.
ທ່ານບານກີມູນກ່າວວ່າ, ສະຫະປະຊາຊາດຍິນດີສືບຕໍ່ອອກແຮງສຸດຂີດໃຫ້ການສະໜັບສະໜູນ ຊ່ວຍເຫຼືອຈົນສຸດຄວາມສາມາດ ເພື່ອຊ່ວຍຈີນສ້າງສາເຂດປະສົບໄພຄືນໃໝ່.
ຕອນຄ່ຳມື້ດຽວກັນ, ທ່ານເວີນເຈຍປາວໄດ້ຮຽກໄຂກອງປະຊຸມກ່ຽວກັບວຽກງານກູ້ໄພຢູ່ ເມືອງເຊີງຕູ່. ທ່ານກ່າວເນັ້ນວ່າ, ຕ້ອງເຮັດວຽກງານກອບກູ້ປິ່ນປົວຜູ່ບາດເຈັບ ແລະ ປ້ອງກັນພະຍາດໃຫ້ດີຢ່າງພົ້ນເດັ່ນ, ແລະຈັດວາງຊີວິດການເປັນຢູ່ຂອງປະຊາຊົນຜູ່ປະສົບໄພໃຫ້ດີ.
|
