|
ການສ້ອມແປງພື້ນຖານໂຄງລ່າງຂອງເຂດປະສົບໄພແຜ່ນດິນໄຫວແຂວງເສສວນໄດ້ຮັບໝາກຜົນຂັ້ນຕອນ
cri
ຕາມຂ່າວCRI,ວັນທີ28ພຶດສະພານີ້,ຢູ່ທີ່ປັກກິ່ງ,ທ່ານມູ້ຫົງ ຮອງຫົວໜ້າຄະນະກຳມະການການພັດທະນາແລະປະຕິຮູບແຫ່ງລັດຈີນກ່າວວ່າ,ປັດຈຸບັນ,ການສ້ອມແປງພື້ນຖານໂຄງລ່າງຂອງເຂດປະສົບໄພແຜ່ນດິນໄຫວໄດ້ຮັບໝາກຜົນລັກສະນະຂັ້ນຕອນທີ່ສຳຄັນ.
ໃນກອງປະຊຸມຂ່າວທີ່ຫ້ອງການຖະແຫຼງຂ່າວລັດຖະບານຈີນຈັດຂຶ້ນໃນວັນທີ28ພຶດສະພານີ້,ທ່ານມູ້ຫົງແຈ້ງໃຫ້ຊາບວ່າ,ນັບມາຮອດປັດຈຸບັນ,ທາງດ່ວນທີ່ຖືກຕັນແລະຖືກທຳລາຍຍ້ອນແຜ່ນດິນໄຫວໄດ້ຟື້ນຟູການແລ່ນລົດທຸກສາຍແລ້ວ,ທຸກເມືອງທີ່ຢູ່ເຂດປະສົບໄພຮ້າຍແຮງນັ້ນຢ່າງໜ້ອຍມີທາງຫຼວງເສັ້ນໜຶ່ງແລ່ນກັບພາຍນອກ.
ນອກນີ້,ທາງລົດໄຟສາຍຫຼັກ9ເສັ້ນທີ່ຖືກຂາດໄປແລະຖືກທຳລາຍໄດ້ຟື້ນຟູການແລ່ນລົດແລ້ວ.ສະໜາມບິນພົນລະເຮືອນທີ່ຖືກທຳລາຍກໍ່ໄດ້ເຮັດວຽກປົກກະຕິໃນມື້ທີສອງຫຼັງເກີດແຜ່ນດິນໄຫວ.
ຮອດວັນທີ21ພຶດສະພານີ້,ນອກຈາກເມືອງເປີຍຊວນແລ້ວ,ເມືອງອື່ນໆທີ່ປະສົບໄພຢູ່ແຂວງເສສວນໄດ້ຟື້ນຟູການສະໜອງໄຟຟ້າ.ປັດຈຸບັນ,ບານແລະຕາແສງສ່ວນຫຼາຍຂອງເຂດປະສົບໄພໄດ້ຟື້ນຟູການສື່ສານກັບພາຍນອກ.ບັນຫາການໃຊ້ນ້ຳຂອງເມືອງທີ່ປະສົບໄພກໍ່ໄດ້ມີການຮັບປະກັນໂດຍພື້ນຖານ,ບ້ານປະສົບໄພສ່ວນຫຼາຍໄດ້ແກ້ໄຂບັນຫານ້ຳກິນຊົ່ວຄາວໃນເບື້ອງຕົ້ນແລ້ວ.
|
|
