|
ວິທະຍຸສາກົນແຫ່ງປະເທດຈີນລາຍງານວ່າ,ວັນທີ19ກໍລະກົດ,ຢູ່ອຳມານ,ທ່ານອາລາວີ ນາຍົກລັດຖະມົນຕີຂອງລັດຖະບານຊົ່ວຄາວອີຣັກກ່າວວ່າ,ລັດຖະບານຊົ່ວຄາວອີຣັກຈະສຸມກຳລັງເຂົ້າໃນການສ້າງການພົວພັນອັນສະໜິດແໜ້ນກັບປະເທດອາລັບ.
ທ່ານອາລາວີແມ່ນກ່າວຄວາມນີ້ໃນເວລາພົບປະກັບທ່ານຟາຍຊານອານຟາເຢັສ໌ນາຍົກລັດຖະມົນຕີຊອກດານີໃນວັນທີ19ກໍລະກົດ,ທ່ານອາລາວີກ່າວວ່າ,ທ່ານເລືອກເອົາປະເທດອາລັບເຊັ່ນຊອກດານີເປັນຕົ້ນເປັນປະເທດງວດທຳອິດທີ່ທ່ານຈະໄປຢ້ຽມຢາມແຕ່ທ່ານດຳລົງຕຳແໜ່ງມານີ້ເຊິ່ງສະແດງໃຫ້ເຫັນວ່າລັດຖະບານຊົ່ວຄາວອີຣັກຕັດສິນໃຈສ້າງການພົວພັນອັນສະໜິດແໜ້ນກັບປະເທດອາລັບບົນພື້ນຖານທີ່ເຄົາລົບສິດທິມະນຸດແລະຕ່າງຝ່າຍຕ່າງມີຜົນປະໂຫຍດ.
ໃນການພົບປະ,ທ່ານຟາເຢັສ໌ໄດ້ກ່າວລື້ມຫຼັກໝັ້ນຂອງຊອກດານີທີ່ສະໜັບສະໜູນລັດຖະບານຊົ່ວຄາວອີຣັກ,ແລະເຫັນວ່າການຢ້ຽມຢາມຂອງທ່ານອາລາວີເປັນການເລີ່ມຕົ້ນອັນດີງາມຂອງການຂະຫຍາຍການພົວພັນລະຫວ່າງຊອກດານີກັບອີຣັກຕື່ມອີກ.
ວັນທີ19ກໍລະກົດ,ສົມເດັດອັບດູນລາເຈົ້າຊີວິດຊອກດານີຊົງພົບປະທ່ານອາລາວີທີ່ໄປຢ້ຽມຢາມ,ໃນການພົບປະ,ສົມເດັດອັບດູນລາຊົງກ່າວວ່າ,ສະໜັບສະໜູນຄວາມພະຍາຍາມຂອງລັດຖະບານຊົ່ວຄາວອີຣັກທີ່ເຮັດເພື່ອບັນລຸຄວາມປອດໄພແລະສະຖຽນລະພາບ.ແລະຮຽກຮ້ອງປະຊາຄົມໂລກຈົ່ງໃຫ້ການຊ່ວຍເຫຼືອແກ່ອີຣັກ,ເພື່ອສະກັດກັ້ນການເຄື່ອນໄຫວກຳລັງຮຸນແຮງພາຍໃນອີຣັກ.
|
