|
ອາຊຽນກັບຈີນ,ຍີ່ປຸ່ນ,ສ.ເກົາຫຼີຈະເພີ່ມທະວີການຮ່ວມມືກັນເພື່ອຟື້ນຟູການທ່ອງທ່ຽວຫຼັງໄພພິບັດ
cri
Author: li
ຕາມຂ່າວ CRI: ກອງປະຊຸມລັດຖະມົນຕີກະຊວງການທ່ອງທ່ຽວຂອງອາຊຽນແລະຈີນ,ຍີ່ປຸ່ນ,ສ.ເກົາຫຼີຄັ້ງທີ 4 ທີ່ໄຂຂຶ້ນຢູ່ລັງກາວີພາກເໜືອມາເລເຊຍ ເປັນເວລາມື້ໜຶ່ງໄດ້ອັດລົງໃນວັນທີ 25 ມັງກອນ. ບັນດາປະເທດທີ່ຮ່ວມປະຊຸມກ່າວວ່າຈະເພີ່ມທະວີການຮ່ວມມືກັນ,ເພື່ອຟື້ນຟູການທ່ອງທ່ຽວຂອງພາກພື້ນທີ່ຖືກໄພແຜ່ນດິນໄຫວແລະຄື້ນຊູນາມີມະຫາສະໝຸດອິນເດຍກະໜ່ຳ.
ຫຼັງຈາກປິດປະຊຸມແລ້ວ,ທ່ານລິວ ໄມເກີນ ໂທຢັດ ລັດຖະມົນຕີກະຊວງການທ່ອງທ່ຽວມາເລເຊຍເວົ້າວ່າ,ບັນດາປະເທດສະມາຊິກອາຊຽນເຊື່ອວ່າ,ເມື່ອອາຊຽນກັບຈີນ,ຍີ່ປຸ່ນແລະສ.ເກົາຫຼີເພີ່ມທະວີການຮ່ວມມືແລ້ວ,ຈຳນວນຜູ້ທ່ອງທ່ຽວຂອງອາຊີຕາເວັນອອກທີ່ໄປທ່ຽວພາກພື້ນດັ່ງກ່າວຈະສູງຂຶ້ນ.
ນອກນີ້ຂ່າວແຈ້ງວ່າ,ວັນທີ 25 ມັງກອນ ທ່ານຊູນກາງ ຮອງຫົວໜ້າກົມທ່ອງທ່ຽວແຫ່ງຊາດຈີນທີ່ຮ່ວມປະຊຸມກ່າວວ່າ,ຈີນຈະຮ່ວມມືກັບບັນດາປະເທດອາຊຽນຢ່າງແໜ້ນແຟ້ນ,ເພື່ອຊ່ອຍພວກເຂົາເຈົ້າຟື້ນຟູການທ່ອງທ່ຽວຫຼັງໄພພິບັດ.
|
|
