ຕາມຂ່າວCRI: ຕອນຄ່ຳວັນທີ 20 ມີນາ, ເຈົ້າໜ້າທີ່ກອງທະຫານຮັກສາຄວາມປອດໄພປາເລັສຕິນຢືນຢັນວ່າ, ສອງຝ່າຍປາເລັສຕິນແລະອິສຣາແອນບໍ່ໄດ້ກ້າວເຖິງຂັ້ນຕົກລົງກັນກ່ຽວກັບເລື້ອງທີ່ມອບຮັບເມືອງ ຕູລກາແລມ ເຊິ່ງເປັນເມືອງປົກຄອງຕົນເອງທີ່ຢູ່ຝັ່ງຕາເວັນຕົກແມ່ນ້ຳຈໍແດນ. ອິສຣາແອນໄດ້ເລື່ອນເວລາມອບອຳນາດຄຸ້ມຄອງຄວາມປອດໄພຂອງເມືອງດັ່ງກ່າວໃຫ້ຝ່າຍປາເລັສຕິນ.
ເຈົ້າໜ້າທີ່ຮັກສາຄວາມປອດໄພຜູ່ໜຶ່ງຂອງເຂດຕູລກາແລມຂອງຝ່າຍປາເລັສຕິນທີ່ເຂົ້າຮ່ວມກອງປະຊຸມຮັກສາຄວາມປອດໄພສອງຝ່າຍປາເລັສຕິນແລະອິສຣາແອນກ່າວວ່າ, ມູນເຫດຕົ້ນຕໍທີ່ເຮັດໃຫ້ການເຈລະຈາບໍ່ໄດ້ຮັບຜົນສຳເລັດນັ້ນແມ່ນຍ້ອນຝ່າຍອິສຣາແອນປະຕິເສດບໍ່ມອບອຳນາກຄຸ້ມຄອງຄວາມປອດໄພຂອງບາງບ້ານໃນເຂດ ຕູລກາແລມໃຫ້ຝ່າຍປາເລັສຕິນ.
|