ຕາມຂ່າວCRI   ວັນ​ທີ 25  ​ເມສາ ຢູ່​ທີ່​ຢາ​ກາກ​ຕາ ນະຄອນຫຼວງ​ອິນ​ໂດ​ເນ​ເຊຍ  ທ່ານ​ຫູ​ຈິນທາວ ປະທານ​ປະ​ເທດ​ຈີນ​ທີ່​ພວມ​ຢ້ຽມຢາມອິນ​ໂດ​ເນ​ເຊຍ​ທາງ​ລັດຖະກິດ​ໄດ້​ແຍກ​ອອກ​ພົບ​ປະ​ທ່ານຢູຊຸ​ຟ ຮາ​ບີ​ເບຍ ຮອງ​ປະທານາທິບໍດີ​ອິນ​ໂດ​ເນ​ເຊຍ​​ແລະ​ທ່ານຮີ​ດາ​ຢັດ ນູ ວາ​ຮິດ ປະທານ​ສະພາ​ປຶກສາ​ປະຊາຊົນ​ອິນ​ໂດ​ເນ​ເຊຍ  ທ່ານອາ​ກຸງ ລັກ​ໂຊ​ໂນ ປະທານ​ສະພາ​ຜູ່​ແທນ​ປະຊາຊົນ​ແລະ​ທ່ານ​ກີ​ນັນ​ຈາ ຄາ​ທາ​ສັດ​ມີ​ທາ ປະທານ​ສະພາ​ມົນຕີ​ຜູ່​ແທນ​ທ້ອງ​ຖິ່ນ

ໃນ​ເວລາ​ພົບ​ປະ​ກັບ​ທ່ານ​ຢູຊຸ​ຟ  ທ່ານ​ຫູ​ຈິນທາວ​ຊີ້​ອອກ​ວ່າ ການ​ພັດທະນາ​ເສດຖະກິດ​ແມ່ນ​ຫນ້າ​ທີ່ສຳຄັນ​ລຳດັບ​ຫນຶ່ງ​ທີ່​ສອງ​ປະ​ເທດ​ປະ​ເຊີ​ນ.ສອງ​ປະ​ເທດ​ຄວນ​ສືບ​ຕໍ່​ເພີ່ມ​ທະວີ​ການ​ຮ່ວມ​ມື​ກັນ​ໃນ​ຂົງ​ເຂດ​ກໍ່ສ້າງ​ພື້ນຖານ​ໂຄງ​ລ່າງ ການ​ພັດທະນາ​ພະລັງງານ​ແລະ​ຊັບພະຍາກອນ​ ກະສິກຳ​​ແລະການ​ປະມົງເປັນ​ຕົ້ນ,​ເສີມ​ຂະຫຍາຍ​ທ່າ​ແຮງ​ທີ່​ຕາບ​ຈູ​ນຊຶ່ງກັນ​ແລະ​ກັນ​ຕື່ມ​ອີກ  ຊຸກຍູ້​​ໃຫ້​ພັດທະນາ​ພ້ອມ​ກັນ

ທ່ານ​ຢູຊຸ​ຟກ່າວ​ວ່າ  ຄຳ​ຖະ​ແຫຼ​ງການ​ຮ່ວມ​ທີ່​ສອງ​ປະ​ເທດ​ເຊັນ​ກັນ​ໃນ​ວັນ​ທີ 25​ໄດ້​ຊີ້ທິດ​ບອກ​ທາງ​ຢ່າງ​ຈະ​ແຈ້ງ​​ເພື່ອ​ໃຫ້​ສອງ​ຝ່າຍ​ຂະຫຍາ​ຍການ​ຮ່ວມ​ມື​ກັນ​ດ້ວຍ​ໄມ​ຕີ​ຈິດ​ໃນ​ຂົງ​ເຂດ​ຕ່າງໆ​ຢ່າງ​ບໍ່​ຢຸດ​ຢັ້ງ

ໃນ​ເວລາ​ພົບ​ປະ  ທ່ານຮີ​ດາ​ຢັດ ທ່ານ​ອາ​ກຸງ​ແລະ​ທ່ານ​ກີ​ນັນ​ຈາ​ໄດ້​ຕີ​ລາຄາ​ສູງ​ຕໍ່​ລັດຖະບານ​ແລະ​ປະຊາຊົນ​ຈີນ​ທີ່​ໃຫ້​ຄວາມຊ່ອຍ​ເຫຼືອ​ແລະ​ສະຫນັບສະຫນູນ​ຫຼັງ​ຈາກ​ອິນ​ໂດ​ເນ​ເຊຍ​ປະສົບ​​ໄພ ແຜ່ນດິນ​ໄຫວ​ແລະຄື້ນຊູ​ນາ​ມີ.ພວກ​ທ່ານ​ຍັງ​ຫວັງ​ໃຫ້​ເພີ່ມ​ທະວີ​ການ​​ໄປມາຫາສູ່​ກັນ​ແລະ​ຮ່ວມ​ມື​ກັນ​ກັບ​ອົງການ​ແລະ​ພາກສ່ວນ​ທີ່​ກ່ຽວຂ້ອງ​ຂອງ​ຈີນ, ປະກອບ ສ່ວນ​​ເຂົ້າ​ໃນ​ການ​ຊຸກຍູ້​ໃຫ້​ການ​ພົວພັນ​ລະ​ຫວ່າງ​ສອງ​ຝ່າຍລົງ​ສູ່​ລວງ​ເລິກ​ຢ່າງ​ບໍ່​ຢຸດ​ຢັ້ງ