|
|
 |
| (GMT+08:00)
2005-06-04 16:12:40
|
 |
|
ກອງປະຊຸມລັດຖະມົນຕີກະຊວງການຄ້າຂອງອົງການອາເປັກໄດ້ອັດລົງ
cri
Author: MO
ຕາມຂ່າວCRI：ວັນທີ 3 ມິຖຸນາ, ກອງປະຊຸມລັດຖະມົນຕີກະຊວງການຄ້າຂອງອົງການອາເປັກປີ 2005 ທີ່ຈັດຂຶ້ນຢູ່ເກາະເຈຈູແຫ່ງສ.ເກົາຫລີໄດ້ອັດລົງແລ້ວ. ຝ່າຍຕ່າງໆທີ່ຮ່ວມປະຊຸມໄດ້ຮຽກຮ້ອງພ້ອມກັນຊຸກຍູ້ຂະບວນວິວັດການຄ້າເສລີ.
ກອງປະຊຸມໄດ້ອອກຖະແຫລງການໂດຍຊີ້ອອກວ່າ, ບັນດາສະມາຊິກອົງການອາເປັກເຫັນດີຫລຸດອັດຕາພາສີຂອງຜະລິດຕະພັນທີ່ບໍ່ແມ່ນກະສິກຳໃຫ້ໜ້ອຍລົງຢ່າງຫລວງຫລາຍ, ພ້ອມທັງຫວັງໃຫ້ບັນດາສະມາຊິກອົງການການຄ້າໂລກພ້ອມກັນພະຍາຍາມຊຸກຍູ້ການເຈລະຈາໃນຂົງເຂດຂໍກະແຈຄືການອະນຸມັດເຂົ້າຕະຫລາດທີ່ບໍ່ແມ່ນກະສິກຳ, ເຮັດໃຫ້ການເຈລະຈາຮອບໂດຮາໄດ້ຮັບຄວາມຄືບໜ້າຢ່າງແທ້ຈິງ.
ທ່ານປໍຊີລາຍ ລັດຖະມົນຕີກະຊວງການຄ້າຈີນໄດ້ນຳພາຄະນະຜູ້ແທນຈີນເຂົ້າຮ່ວມກອງປະຊຸມ. ໃນກອງປະຊຸມ, ທ່ານໄດ້ປະກອບຄຳຄິດຄຳເຫັນໂດຍຊີ້ອອກວ່າ, ຂະບວນວິວັດການຄ້າໂລກເສລີແມ່ນມີຜົນດີຕໍ່ທຸກຝ່າຍ, ຈີນຍິນດີຊຸກຍູ້ການເຈລະຈາຮອບໂດຮາຢ່າງຕັ້ງໜ້າ, ຫວັງໃຫ້ມີໝາກຜົນເຈລະຈາທີ່ສະໝ່ຳສະເໝີກັນໃນທີ່ສຸດ. ທ່ານກ່າວເນັ້ນວ່າ, ອົງການອາເປັກຕ້ອງສືບຕໍ່ຊຸກຍູ້ການຄ້າການລົງທຶນສະດວກແລະການຮ່ວມມືເສດຖະກິດເຕັກນິກ, ສ້າງສະພາບແວດລ້ອມການຄ້າທີ່ທ່ຽງທຳແລະຍຸດຕິທຳ.
ລັດຖະມົນຕີຫລືຜູ້ຕາງໜ້າທີ່ຮັບຜິດຊອບວຽກງານເສດຖະກິດການຄ້າຂອງ 21 ສະມາຊິກອົງການອາເປັກແລະຜູ້ແທນອົງການສາກົນແລະພາກພື້ນຄືອົງການການຄ້າໂລກເປັນຕົ້ນໄດ້ເຂົ້າຮ່ວມກອງປະຊຸມຄັ້ງນີ້.
|
|
|
