|
ຕາມຂ່າວCRI：ວັນທີ 9 ທັນວາ, ຢູ່ລິສບອນ, ທ່ານໂຊກັຼດສ໌ ນາຍົກລັດຖະມົນຕີປອກຕຸຍການແລະທ່ານເວີນເຈຍປາວ ນາຍົກລັດຖະມົນຕີຈີນທີ່ໄປຢ້ຽມຢາມໄດ້ຈັດການພົບປະເຈລະຈາ. ຈີນປອກຕຸຍການຍັງໄດ້ອອກຖະແຫລງການຮ່ວມກ່ຽວກັບການເພີ່ມທະວີການພົວພັນລະຫວ່າງສອງຝ່າຍ.
ໃນເວລາພົບປະເຈລະຈາກັບທ່ານໂຊກັຼດສ໌, ທ່ານເວີນເຈຍປາວເວົ້າວ່າ, ການພົວພັນຈີນປອກຕຸຍການພວມຢູ່ໃນໄລຍະທີ່ດີທີ່ສຸດແຕ່ສ້າງສາຍສຳພັນການທູດມານີ້. ເພື່ອຊຸກຍູ້ໃຫ້ການພົວພັນຈີນປອກຕຸຍການຂະຫຍາຍຕົວຢ່າງສືບເນື່ອງ ໜັກແໜ້ນແລະປອດໃສ, ທ່ານສະເໜີໃຫ້ສອງປະເທດເພີ່ມການແລກປ່ຽນໃນທຸກຂັ້ນ. ທ່ານໂຊກັຼດສ໌ ກ່າວວ່າ, ການຂະຫຍາຍການພົວພັນກັບຈີນແມ່ນທິດບູລິມະສິດຂອງນະໂຍບາຍການຕ່າງປະເທດຂອງປອກຕຸຍການ.
ຫລັງການພົບປະ, ນາຍົກລັດຖະມົນຕີຂອງສອງປະເທດໄດ້ເຊັນຖະແຫລງການຮ່ວມລະຫວ່າງລັດຖະບານຈີນປອກຕຸຍການ, ເປັນເອກະສັນກັນເຫັນດີສ້າງການພົວພັນຄູ່ຂາຍຸດທະສາດຮອບດ້ານ, ແລະເພີ່ມທະວີການຮ່ວມມືໃນຂົງເຂດຕ່າງໆເຊັ່ນການສົນທະນາທາງການເມືອງ, ເສດຖະກິດ, ວັດທະນະທຳການສຶກສາ, ຕຸລາການ, ວິທະຍາສາດເຕັກນິກ, ແລະສາທາລະນະສຸກເປັນຕົ້ນ. ໃນຖະແຫລງການດັ່ງກ່າວ, ຝ່າຍປອກຕຸຍການກ່າວລື້ມວ່າຍຶດໝັ້ນນະໂຍບາຍຈີນດຽວ. ພ້ອມກັນນັ້ນ, ຝ່າຍປອກຕຸຍການກ່າວວ່າ, ຍິນດີສືບຕໍ່ພະຍາຍາມຊຸກຍູ້ໃຫ້ສະຫະພາບເອີ້ລົບຍົກເລີກຄຳສັ່ງຫ້າມຂາຍອາວຸດໃຫ້ຈີນ, ແລະຊຸກຍູ້ໃຫ້ສະຫະພາບເອີ້ລົບຮັບຮອງຖານະເສດຖະກິດຕະຫລາດຂອງຈີນໂດຍໄວ.
ມື້ດຽວກັນ, ທ່ານຊາມປາອີໂອ ປະທານາທິບໍດິປອກຕຸຍການແລະທ່ານກາມາ ປະທານລັດຖະສະພາກໍຕ່າງໄດ້ພົບປະທ່ານນາຍົກລັດຖະມົນຕີເວີນເຈຍປາວ.
1 2
|
