|
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 8 ຂອງພັກປະຊາຊົນປະຕິວັດລາວໄຂຂຶ້ນຢ່າງສະຫງ່າຜ່າເຜີຍທີ່ນະຄອນຫຼວງວຽງຈັນ
cri
Author: mo
|
ຕາມຂ່າວສານຊີນຮວາ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 8 ຂອງພັກປະຊາຊົນປະຕິວັດລາວໄດ້ຈັດຂຶ້ນຢ່າງສະຫງ່າຜ່າເຜີຍໃນຕອນເຊົ້າວັນທີ 18 ມີນາຢູ່ຫໍປະຊຸມໃຫຍ່ສູນກາງພັກນະຄອນຫຼວງວຽງຈັນ, ທ່ານຄຳໄຕ ສີພັນດອນ ປະທານຄະນະບໍລິຫານງານສູນກາງພັກປະຊາຊົນປະຕິວັດລາວແລະຜູ້ນຳສູນກາງພັກທ່ານອື່ນໆ, ພ້ອມດ້ວຍຜູ້ແທນສົມບູນ 498 ຄົນທີ່ເປັນຕົວແທນໃຫ້ສະມາຊິກພັກຂອງແຫ່ງຕ່າງໆທົ່ວປະເທດລາວໄດ້ເຂົ້າຮ່ວມກອງປະຊຸມ.
ໃນພິທີໄຂກອງປະຊຸມ, ທ່ານຄຳໄຕ ສີພັນດອນໄດ້ຂຶ້ນກ່າວສູນທອນພົດວ່າ, ແຕ່ດຳເນີນພາລະກິດປ່ຽນແປງໃໝ່ 20 ປີທີ່ຜ່ານມາ, ສປປລາວໄດ້ມີການປ່ຽນແປງຢ່າງໃຫຍ່ຫຼວງຈາກໜ້າມືເປັນຫຼັງມື, ວຽກງານຕ່າງໆໄດ້ພັດທະນາຢ່າງຮອບດ້ານ, ຊີວິດການເປັນຢູ່ທາງດ້ານວັດຖຸແລະຈິດໃຈຂອງປະຊາຊົນໄດ້ມີການປັບປຸງດີຂຶ້ນຢ່າງຈະແຈ້ງ. ກອງປະຊຸມໃຫຍ່ຄັ້ງນີ້ຈະຫວນຄືນແລະສະຫຼຸບສະພາບການຜັນຂະຫຍາຍທິດທາງນະໂຍບາຍທີ່ກອງປະຊຸມໃຫຍ່ຂອງພັກຄັ້ງທີ 7 ວາງອອກ, ຖອດຖອນເອົາບົດຮຽນ, ຈັດວາງແຜນພັດທະນາເສດຖະກິດສັງຄົມ 5 ປີຂ້າງໜ້າ(ຄືແຕ່ປີ 2006-2010), ພະຍາຍາມແກ້ໄຂບັນຫາທຸກຍາກຂອງປະຊາຊົນໃຫ້ໄດ້ໂດຍພື້ນຖານໃນປີ 2010, ແລະພາປະເທດຊາດຫຼຸດພົ້ນອອກຈາກຄວາມດ້ອຍພັດທະນາໃຫ້ໄດ້ໃນປີ 2020, ແລ້ວບັນລຸເປົ້າໝາຍຍາວໄກທີ່ເຮັດໃຫ້ອຸດສາຫະກຳຫັນເປັນທັນສະໄໝ, ສ້າງສປປລາວໃຫ້ເປັນປະເທດທີ່ຈະເລີນຮຸ່ງເຮືອງ, ປະຊາຊົນຮັ່ງມີແລະຢູ່ເຢັນເປັນສຸກ, ສັງຄົມມີປະຊາທິປະໄຕ, ຍຸດຕິທຳແລະອາລະຍະທຳ.
ຕາມການເຜີຍໃຫ້ຮູ້, ກອງປະຊຸມໃຫຍ່ຄັ້ງນີ້ຍັງຈະເລືອກຕັ້ງກຳມະການສູນກາງພັກປະຊາຊົນປະຕິວັດລາວ ແລະກຳມະການກົມການເມືອງ, ປັບປຸງກົດລະບຽບພັກປະຊາຊົນປະຕິວັດລາວ, ບູລະນະອົງການຈັດຕັ້ງຂອງພັກໃຫ້ສົມບູນຂຶ້ນ, ເພື່ອໃຫ້ສອດຄ່ອງກັບການຂະຫຍາຍຕົວຂອງສະຖານະການພາຍໃນປະເທດແລະຕ່າງປະເທດຫຼາຍກວ່າເກົ່າ.
|
|
