|
|
 |
| (GMT+08:00)
2006-03-20 18:38:01
|
 |
|
ມວນຊົນປະເທດເອີລົບແລະອາເມລິກາສືບຕໍ່ສະແດງກຳລັງກ່າວປະນາມອາເມລິກາກໍ່ສົງຄາມອີຣັກ
cri
Author: mo
|
ຕາມຂ່າວສານຊີນຮວາ: ເນື່ອງໃນໂອກາດອາເມລິກາກໍ່ສົງຄາມອີຣັກຄົບຮອບ 3 ປີ, ຫຼາຍມື້ມານີ້, ມວນຊົນຂອງບາງປະເທດເອີລົບອາເມລິກາໄດ້ຈັດການແຫ່ຂະບວນສະແດງກຳລັງຢ່າງບໍ່ຢຸດຢັ້ງ, ກ່າວປະນາມອາເມລິກາກໍ່ສົງຄາມອີຣັກ, ທວງໃຫ້ທະຫານຕ່າງປະເທດຖອນອອກຈາກອີຣັກໃນທັນທີ.
ວັນທີ 19 ມີນາ, ຜູ້ປະທ້ວງຫຼາຍຮ້ອຍຄົນຢູ່ນິວຢອກອາເມລິກາໄດ້ແຫ່ຂະບວນຕາມຖະໜົນສາຍທີ 5 ຢູ່ມານຮາຕັນ. ຜູ້ສະແດງກຳລັງກ່າວວ່າ, ລັດຖະບານໄດ້ເອົາໂດລາຫຼາຍຮ້ອຍຕື້ໃຊ້ເຂົ້າໃນສົງຄາມ, ແຕ່ເງິນທີ່ໃຊ້ສຳລັບຜູ້ທຸກຍາກຂອງອີຣັກ ອາຟການີສະຖານແລະອາເມລິກາພັດໜ້ອຍທີ່ສຸດ. ວັນທີ 18 ມີນາ, ຕົວເມືອງຕ່າງໆຂອງອາເມລິກາເຊັ່ນວໍຊິງຕັນ ນິວຢອກແລະລອສແອນເຈີລິສ໌ເປັນຕົ້ນໄດ້ຈັດການແຫ່ຂະບວນຄັດຄ້ານສົງຄາມທີ່ມີຂະໜາດຕ່າງກັນ.
ວັນທີ 19 ມີນາ, ມວນຊົນ 4 ພັນກວ່າຄົນຂອງແອັສປາຍໄດ້ຈັດການແຫ່ຂະບວນສະແດງກຳລັງຢູ່ມາດຼິດ ນະຄອນຫຼວງ, ຄັດຄ້ານສົງຄາມອີຣັກ.
ວັນທີ 19 ມີນາ, ຢູ່ປຼາກ ນະຄອນຫຼວງຂອງເຊັກ, ມວນຊົນຫຼາຍຮ້ອຍຄົນໄດ້ຈັດການແຫ່ຂະບວນສະແດງກຳລັງຄັດຄ້ານສົງຄາມ. ຜູ້ສະແດງກຳລັງຍັງກ່າວເຕືອນອາເມລິກາຢ່າຊ້ຳຮອຍເກົ່າເລື່ອງອີຣັກຢູ່ອີຣານອີກ.
ນອກນີ້, ມວນຊົນຂອງຫຼາຍປະເທດເຊັ່ນ ອັງກິດ ໂປໂລຍ ອົສຕຼາລີ ສ.ເກົາຫລີ ປາກີສະຖານ ແລະປອກຕຸຍການເປັນຕົ້ນກໍຕ່າງຈັດການແຫ່ຂະບວນຄັດຄ້ານສົງຄາມໃນໂອກາດສົງຄາມອີຣັກຄົບຮອບ 3 ປີ, ທວງໃຫ້ກອງທະຫານອັງກິດແລະອາເມລິກາຖອນອອກຈາກອີຣັກ.
|
|
|
