|
ທ່ານນາງໄລສ໌ກ່າວວ່າ, ອີຣັກສ້າງຕັ້ງລັດຖະບານຊຸດໃໝ່ນັ້ນເປັນເລື່ອງຮີບດ່ວນທີ່ສຸດ
cri
Author: mo
ຕາມຂ່າວສານຊີນຮວາ: ວັນທີ 2 ເມສາ, ໃນເວລາທ່ານນາງໄລສ໌ຈັດການພົບປະກັບຜູ້ນຳພັກຝ່າຍຕ່າງໆຂອງອີຣັກນັ້ນ, ເພີ່ນເວົ້າວ່າ, ປະຊາຊົນອີຣັກພວມເສຍຄວາມອົດທົນ, ການສ້າງຕັ້ງລັດຖະບານຊຸດໃໝ່ສາມັກຄີຊາດເປັນເລື່ອງຮີບດ່ວນທີ່ສຸດ.
ທ່ານນາງໄລສ໌ແມ່ນໃຫ້ທັດສະນະດັ່ງກ່າວໃນເວລາພ້ອມກັບທ່ານສະທຼາວ ລັດຖະມົນຕີການຕ່າງປະເທດອັງກິດຢ້ຽມຢາມອີຣັກຢ່າງກະທັນຫັນໃນມື້ດຽວກັນ. ເພີ່ນເຜີຍໃຫ້ສື່ມວນຊົນທີ່ຕິດຕາມເພີ່ນຮູ້ວ່າ, ເພີ່ນໄດ້ສົ່ງຕໍ່ຄວາມປາຖາໜາຂອງປະຊາຄົມໂລກທີ່ຫວັງຢາກໄດ້ເຫັນລັດຖະບານຊຸດໃໝ່ຂອງອີຣັກສ້າງຕັ້ງຂຶ້ນໂດຍໄວນັ້ນໃຫ້ຜູ້ນຳຝ່າຍຕ່າງໆຂອງອີຣັກຊາບແລ້ວ. ແຕ່ໃນການພົບປະ, ຜູ້ນຳອີຣັກເວົ້າວ່າ, ວຽກງານຂອງພວກເຂົາເຈົ້າກ່ຽວກັບການສ້າງຕັ້ງລັດຖະບານປະສົມໃນຫວ່າງມໍ່ໆນີ້ບໍ່ໄດ້ຮັບການຕີລາຄາຢ່າງຖືກຕ້ອງ.
ຍ້ອນຝ່າຍຕ່າງໆຂອງອີຣັກມີຄວາມເຫັນຂັດກັນໃນບັນຫາຜູ້ສະໝັກຮັບເລືອກຕັ້ງເປັນນາຍົກລັດຖະມົນຕີຜູ້ໃໝ່ນັ້ນ, ພາໃຫ້ການສ້າງຕັ້ງລັດຖະບານຊຸດໃໝ່ຕົກຢູ່ໃນສະພາບຢຸດສະງັກ. ຈຸດປະສົງຕົ້ນຕໍ ຂອງທ່ານນາງໄລສ໌ກັບທ່ານສະທຼາວໃນການຢ້ຽມຢາມເທື່ອນີ້ ກໍແມ່ນປຶກສາຫາລືເລື່ອງສ້າງຕັ້ງລັດຖະບານປະສົມກັບບັນດາຝ່າຍທີ່ກ່ຽວຂ້ອງ.
|
|
