|
ຄົນຕາຍໃນໄພແຜ່ນດິນໄຫວອິນດູເນເຊຍໄດ້ສືບຕໍ່ເພິ່ມຂຶ້ນ, ການກອບກູ້ຊ່ອຍເຫຼືອຢ່າງຂະໜາດໃຫຍ່ໄດ້ເລີ່ມຕົ້ນ
cri
Author: mo
ຕາມຂ່າວCRI: ຕອນເຊົ້າວັນທີ 27 ພຶດສະພາ, ເວລາທ້ອງຖິ່ນ, ເຂດໂຢກຢາກາຕາແຂວງຊາວາກາງຂອງອິນດູເນເຊຍໄດ້ເກີດແຜ່ນດິນໄຫວ 5,9 ຂັ້ນລິກເທີ. ຕາມຕົວເລກສະຖິຕິຫຼ້າສຸດຂອງວັນທີ 29 ພຶດສະພາ, ແຜ່ນດິນໄຫວໄດ້ເຮັດໃຫ້ 5100 ກວ່າຄົນຕາຍ, ຫຼາຍພັນຄົນບາດເຈັບ. ຂະນະດຽວກັນ, ວັດສະດຸກອບກູ້ທີ່ມາຈາກປະຊາຄົມໂລກແລະທົ່ວປະເທດອິນດູເນເຊຍໄດ້ຂົນສົ່ງໄປຮອດເຂດປະສົບໄພແຜ່ນດິນໄຫວຢ່າງຕໍ່ເນື່ອງ, ວຽກງານກອບກູ້ຊ່ອຍເຫຼືອຢ່າງຂະໜາດໃຫຍ່ໄດ້ເລີ່ມຕົ້ນ.
ວັນທີ 29 ພຶດສະພາ, ຜູ້ປະຕິບັດງານຂອງສະໜາມບິນໂຢກຢາກາຕາກ່າວວ່າ, ສະໜາມບິນນີ້ທີ່ປິດສອງມື້ຍ້ອນຖືກທຳລາຍໃນແຜ່ນດິນໄຫວນັ້ນໄດ້ເປີດບໍລິການສ່ວນໜຶ່ງໃນວັນທີ 29 ພຶດສະພາແລ້ວ, ແຕ່ຕອນຄ່ຳວັນທີ 28 ພຶດສະພາ, ກໍມີຍົນຂົນສົ່ງວັດສະດຸກອບກູ້ຂອງສິງກະໂປແລະອົສຕຼາລີໄດ້ລົງຈອດຢູ່ສະໜາມບິນດັ່ງກ່າວ. ແຕ່ມາຮອດປັດຈຸບັນ, ສະໜາມບິນບໍ່ໄດ້ເປີດຕໍ່ເຮືອບິນພົນລະເຮືອນ.
ວັນທີ 29 ພຶດສະພາ, ຍົນຂອງສະຫະປະຊາຊາດລຳທຳອິດທີ່ບັນທຸກວັດສະດຸກູ້ໄພໄດ້ບິນມາຮອດເຂດປະສົບໄພແຜ່ນດິນໄຫວ, ໄດ້ສົ່ງນ້ຳ ຕູບຜ້າເຕັນແລະເຄື່ອງແຕ່ງກິນໃຫ້ຜູ້ປະສົບໄພ. ກອງກອບກູ້ຈີນ 43 ຄົນຂີ່ຍົນຈະໄປຮອດເຂດປະສົບໄພໂຢກຢາກາຕາໃນຕອນບ່າຍວັນທີ 29 ພຶດສະພາ, ເຂົ້າຮ່ວມການກອບກູ້.
ວັນທີ 28 ພືດສະພາ, ປະເທດຕ່າງໆເຊັ່ນອາເມລິກາ ສ.ເກົາຫລີ ຍີ່ປຸ່ນ ສິງກະໂປ ຟີລິບປີນ ມາເລເຊຍ ອົສຕຼາລີ ນີວຊີແລນ ການາດາເປັນຕົ້ນແລະອົງການຈັດຕັ້ງສາກົນເຊັ່ນສະຫະພາບເອີລົບເປັນຕົ້ນກໍໄດ້ກ່າວສະແດງວ່າ ສະໜອງຄວາມຊ່ອຍເຫຼືອດ່ວນແກ່ອິນດູເນເຊຍ, ບາງປະເທດໄດ້ມີການກະທຳຕົວຈິງແລ້ວ.
|
|
