|
|
 |
| (GMT+08:00)
2006-06-29 19:00:59
|
 |
|
ປະຊາຄົມໂລກຮຽກຮ້ອງໃຫ້ອິສຣາແອນປາເລັສຕີນຮັກສາຄວາມອົດກັ້ນ
cri
Author: da
ຕາມຂ່າວCRI:ເພື່ອບັງຄັບໃຫ້ຜູ້ປະກອບອາວຸດປາເລັສຕີນປ່ອຍຕົວທະຫານອິສຣາແອນຄົນໜຶ່ງທີ່ຖືກລັກພາຕົວໃນຫວ່າງມໍ່ໆນີ້,ວັນທີ 29 ມິຖຸນາ ທະຫານອິສຣາແອນໄດ້ເປີດກວ້າງການເຄື່ອນໄຫວທາງການທະຫານຢູ່ກາຊາຕື່ມອີກ.
ນອກຈາກສືບຕໍ່ຍິງປືນໃຫຍ່ໃສ່ແຖບກາຊາແລ້ວ,ລົດຫຸ້ມເກາະຂອງທະຫານອິສຣາແອນເລີ່ມເຄື່ອນເຂົ້າພາກເໜືອແຖບກາຊາ.ວັນທີ 29 ມິຖຸນາ ຝ່າຍປາເລັສຕີນຢືນຢັນວ່າ,ຕອນຂ້ອນແຈ້ງມື້ດຽວກັນ ທະຫານອິສຣາແອນຍັງໄດ້ຈັບເຈົ້າໜ້າທີ່ອົງການຮາມາສ 64 ຄົນຢູ່ເມືອງຝັ່ງຕາເວັນຕົກແມ່ນ້ຳຈໍແດນ,ໃນນັ້ນລວມທັງຮອງນາຍົກລັດຖະມົນຕີຄົນໜຶ່ງ ລັດຖະມົນຕີ 7 ຄົນຂອງລັດຖະບານປົກຄອງຕົນເອງແລະກຳມະການຂອງຄະນະກຳມະການນິຕິບັນຍັດ 20 ກວ່າຄົນ.ປະຈຸບັນ ການເຄື່ອນໄຫວຈັບຕົວຍັງພວມດຳເນີນຕໍ່ໄປ.
ມື້ດຽວກັນ,"ຄະນະກຳມະການປະຊາຊົນຕໍ່ຕ້ານ" ອົງການປະກອບອາວຸດປາເລັສຕີນປະກາດວ່າ,ອົງການດັ່ງກ່າວໄດ້ຂ້າຊາວຢີວຜູ້ຕັ້ງຖິ່ນຖານທີ່ຖືກຈັບໃນຫຼາຍມື້ກ່ອນ.
ວັນທີ 29 ມິຖຸນາ ທ່ານນາງຈ່ຽງອີ ໂຄສົກກະຊວງການຕ່າງປະເທດຈີນເວົ້າວ່າ,ຝ່າຍຈີນທວງໃຫ້ອິສຣາແອນຮັກສາຄວາມອົດກັ້ນ,ຢຸດຕິການເຄື່ອນໄຫວທາງການທະຫານ;ພ້ອມກັນນັ້ນກໍຮຽກຮ້ອງໃຫ້ຝ່າຍປາເລັສຕີນປະສານສົມທົບກັບຄວາມພະຍາຍາມໄກ່ເກ່ຍຂອງສາກົນ,ປ່ອຍຕົວປະກັນໂດຍໄວ.
ວັນທີ 28 ມິຖຸນາ ຄະນະກຳມະການຮ່ວມມືອ່າວເປີເຊຍຍັງປະກາດຖະແຫຼງການ,ກ່າວປະນາມການເຄື່ອນໄຫວທາງການທະຫານຂອງອິສຣາແອນ,ຮຽກຮ້ອງໃຫ້ສະພາຄວາມໝັ້ນຄົງສະຫະປະຊາຊາດແລະ 4 ຝ່າຍທີ່ກ່ຽວຂ້ອງກັບບັນຫາຕາເວັນອອກກາງຈົ່ງເຄື່ອນໄຫວໂດຍດ່ວນ,ສະກັດກັ້ນການເຄື່ອນໄຫວຂອງຝ່າຍອິສຣາແອນ.ສະຫະພາບເອີລົບ ເຢຍລະມັນ ຝຣັ່ງແລະອາເມລິກາເປັນຕົ້ນກໍພາກັນຮຽກຮ້ອງໃຫ້ຜູ້ປະກອບອາວຸດຂອງປາເລັສຕີນປ່ອຍຕົວທະຫານອິສຣາແອນໂດຍໄວ,ແລະຫວັງໃຫ້ບັນດາຝ່າຍທີ່ປະທະກັນຈົ່ງຮັກສາຄວາມອົດກັ້ນ,ຫຼີກເວັ້ນບໍ່ໃຫ້ສະພາວະການຊຸດຮ້າຍລົງຕື່ມອີກ.
|
|
|
