ອິສຣາແອນສືບຕໍ່ໂຈມຕີປາເລັສຕີນທາງການທະຫານ, ຍິງຖະຫຼົ່ມຫ້ອງການຂອງທ່ານຮານີເຢ
cri
Author: mo
ຕາມຂ່າວCRI: ອິສຣາແອນຍັງໂຈມຕີປາເລັສຕີນທາງການທະຫານຕໍ່ມາ, ແລະໄດ້ຍິງລູກສອນໄຟນຳວິຖີໃສ່ຫ້ອງການຂອງທ່ານຮານີເຢ ນາຍົກລັດຖະມົນຕີຂອງລັດຖະບານປາເລັສຕີນປົກຄອງຕົນເອງ ຜູ້ນຳຂອງອົງການຮາມັສ ຂະບວນການຕໍ່ຕ້ານອິສລາມປາເລັສຕີນທີ່ຕັ້ງຢູ່ເມືອງກາຊາໃນຕອນເຊົ້າມືດວັນທີ 2 ກໍລະກົດ. ຫຼັງຈາກນັ້ນ, ທ່ານຮານີເຢໄດ້ຮຽກຮ້ອງໃຫ້ປະຊາຄົມໂລກແລະສັນນິບາດປະເທດອາຣັບເຂົ້າແຊກ, ເຮັດໃຫ້ອິສຣາແອນເຊົາຫຼອນໂຈມຕີປາເລັສຕີນ.
ຕາມຂ່າວແຈ້ງວ່າ, ຕອນເຊົ້າມືດວັນທີ 2 ກໍລະກົດ, ຍົນເຮລິກົບປະກອບອາວຸດຂອງອິສຣາແອນໄດ້ຍິງລູກສອນໄຟນຳຖີໃສ່ສຳນັກງານນາຍົກລັດຖະມົນຕີລັດຖະບານປາເລັສຕີນປົກຄອງຕົນເອງທີ່ຢູ່ເມືອງກາຊາ, ເຮັດໃຫ້ສ່ວນໜຶງຂອງຕຶກຖືກທຳລາຍ, ແຕ່ບໍ່ມີຄົນຕາຍແລະບາດເຈັບ.
ວັນທີ 1 ກໍລະກົດ, 7 ຝ່າຍປະກອບອາວຸດຂອງປາເລັສຕີນເຊິ່ງລວມທັງກອງພົນນ້ອຍຜູ້ເສຍສະຫຼະອານອັກຊາ ໄດ້ປະກາດຈັດຕັ້ງກອງສູ້ຕາຍຢູ່ທີ່ກາຊາ, ເພື່ອດັດສະກັດແລະຈັບທະຫານອິສຣາແອນທີ່ບຸກເຂົ້າກາຊາ. ມື້ດຽວກັນ, ເຈົ້າໜ້າທີ່ລັດຖະບານປາເລັສຕີນປົກຄອງຕົນເອງຢືນຢັນວ່າ, ປັດຈຸບັນ, ທະຫານອິສຣາແອນທີ່ຖືກຜູ້ປະກອບອາວຸດປາເລັສຕີນຈັບໄດ້ນັ້ນ ຜູ້ບາດເຈັບບໍ່ຮ້າຍແຮງ, ບໍ່ມີຄວາມອັນຕະລາຍເຖິງແກ່ຊີວິດ.
ປະຊາຄົມໂລກຍັງເອົາໃຈໃສ່ນຳການຂະຫຍາຍຕົວຂອງສະຖານະການປາເລັສຕີນອິສຣາແອນຕໍ່ມາ. ວັນທີ 1 ກໍລະກົດ, ຢູ່ລາມາລາ, ທ່ານຊຸນປີ້ກ້ານ ທູດພິເສດບັນຫາຕາເວັນອອກກາງຂອງຈີນໄດ້ພົບປະເຈົ້າໜ້າທີ່ຊັ້ນສູງຂອງປາເລັສຕີນ, ຮຽກຮ້ອງໃຫ້ປາເລັສຕີນແລະອີສຣາແອນແກ້ໄຂເຫດການທະຫານອິສຣາແອນຖືກຈັບຢ່າງເໝາະສົມໂດຍໄວ. ມື້ດຽວກັນ, ສັນນິບານປະເທດອາລັບກໍຮຽກຮ້ອງປະເທດອາລັບຮ່ວມກັນຍື່ນຮ່າງມະຕິສະບັບໜຶ່ງໃຫ້ສະພາຄວາມໝັ້ນຄົງສະຫະປະຊາຊາດໂດຍດ່ວນ, ທວງໃຫ້ອິສຣາແອນຖອນທະຫານ, ປ່ອຍຕົວເຈົ້າໜ້າທີ່ລັດຖະບານປາເລັສຕີນທີ່ຖືກຝ່າຍອິດຣາແອນຈັບຕົວ, ສອງຝ່າຍແລກປ່ຽນສະເລີຍເສີກກັນ, ເພື່ອແກ້ໄຂວິກິດການໃນສະເພາະໜ້ານີ້.
|
|