|
ຈຳນວນຄົນຕາຍຍ້ອນຄື້ນຊູນາມີຂອງອິນໂດເນເຊຍເພິ່ມຂຶ້ນຮອດ 525ຄົນ, ລັດຖະບານອິນໂດເນເຊຍເລັ່ງລັດດຳເນີນວຽກງານກູ້ໄພ
cri
Author: mo
ຕາມຂ່າວCRI: ຕົວເລກສະຖິຕິຫຼ້າສຸດທີ່ຝ່າຍທາງການອິນໂດເນເຊຍປະກາດໃນວັນທີ 19 ກໍລະກົດສະແດງໃຫ້ເຫັນວ່າ, ແຜ່ນດິນໄຫວຢູ່ເຂດທະເລເກາະຈາວາພາໃຫ້ເກີດມີຄື້ນຊູນາມີໃນວັນທີ 17 ກໍລະກົດໄດ້ເຮັດໃຫ້ຈຳນວນຄົນຕາຍເພິ່ມຂຶ້ນຮອດ 525 ຄົນ, ອີກ 280 ຄົນຫາຍສາບສູນ, 5 ໝື່ນກວ່າຄົນຈຳເປັນຕ້ອງໜີອອກຈາກບ້ານເກີດເມືອງນອນ.
ມື້ດຽວກັນ, ກະຊວງການຕ່າງປະເທດອິນໂດເນເຊຍຍັງຢືນຢັນວ່າ, ໃນຜູ້ປະສົບເຄາະຮ້າຍຍັງລວມທັງຄົນຕ່າງປະເທດ 7 ຄົນ, ແຕ່ກະຊວງການຕ່າງປະເທດອິນໂດເນເຊຍບໍ່ໄດ້ເຜີຍໃຫ້ຮູ້ຖານະລະອຽດຂອງຄົນຕ່າງປະເທດທີ່ປະສົບເຄາະຮ້າຍ.
ຂະນະດຽວກັນ, ຜູ້ກອບກູ້ຊ່ອຍເຫຼືອທີ່ມາຈາກແຫ່ງຕ່າງໆພາຍໃນປະເທດອິນໂດເນເຊຍແລະໜ່ວຍກອບກູ້ຊອຍເຫຼືອມະນຸດສະທຳສະຫະປະຊາຊາດໄດ້ເດີນທາງໄປຮອດເຂດປະສົບໄພຢ່າງຕໍ່ເນື່ອງກັນ, ແລະດຳເນີນການເຄື່ອນໄຫວກູ້ໄພ. ວັນທີ 18 ກໍລະກົດ, ທ່ານຢູຊຸຟ ຄາກາ ຮອງປະທານາທິບໍດີອິນໂດເນເຊຍກ່າວວ່າ, ມື້ດຽວກັນ, ອົງການກູ້ໄພເປັນເອກະພາບແຫ່ງຊາດໄດ້ສະໜອງຄ່າໃຊ້ຈ່າຍກູ້ໄພດ່ວນປະມານ 1 ລ້ານ 1 ແສນໂດລາສະຫະລັດໃຫ້ເຂດພາກໃຕ້ຈາວາຕາເວັນຕົກທີ່ຖືກແຜ່ນດິນໄຫວແລະຄື້ນຊູນາມີກະໜ່ຳ, ເພື່ອຊ່ອຍອົງການປົກຄອງທ້ອງຖິ່ນດຳເນີນວຽກງານກູ້ໄພຢ່າງວ່ອງໄວ.
ນອກນີ້, ຂ່າວແຈ້ງວ່າ, ວັນທີ 18 ກໍລະກົດ, ເຈົ້າໜ້າທີ່ກະຊວງຄົ້ນຄວ້າເຕັກນິກອິນໂດເນເຊຍຮັບຮອງວ່າ, ກ່ອນແຜ່ນດິນໄຫວພາໃຫ້ເກີດຄື້ນຊູນາມີ 40 ນາທິໃນວັນທີ 17 ກໍລະກົດ, ລັດຖະບານອິນໂດເນເຊຍເຄີຍໄດ້ຮັບຂ່າວເຕືອນໄພຈາກສູນເຕືອນໄພຄື້ນຊູນາມີມະຫາສະໝຸດປາຊີຟິກຂອງອາເມລິກາແລະກົມອຸຕຸນິຍົມຍີ່ປຸ່ນວ່າ, ແຜ່ນດິນໄຫວຄັ້ງນີ້ອາດຈະພາໃຫ້ເກີດຄື້ນຊູນາມີ, ແຕ່ລັດຖະບານບໍ່ໄດ້ແຈ້ງຂ່າວເຕືອນໄພໃຫ້ມວນຊົນຊາບ.
|
|
