|
|
 |
| (GMT+08:00)
2006-07-22 21:03:18
|
 |
|
ຮອງຜູ້ແທນຈີນປະຈຳອົງການສະຫະປະຊາຊາດຮຽກຮ້ອງໃຫ້ສະພາຄວາມໝັ້ນຄົງໃຊ້ການເຄື່ອນໄຫວ ຜ່ອນຄາຍວິກິດການລີບັງອິສລະແອນໂດຍໄວ
cri
Author: da
ຕາມຂ່າວCRI:ວັນທີ 21 ກໍລະກົດ ໃນກອງປະຊຸມອະພິປາຍຢ່າງເປີດເຜີຍກ່ຽວກັບບັນຫາຕາເວັນອອກກາງໃນສະພາຄວາມໝັ້ນຄົງ,ທ່ານລິນເຈີ້ນມິນ ຮອງຜູ້ແທນຈີນປະຈຳອົງການສະຫະປະຊາຊາດໄດ້ຮຽກຮ້ອງໃຫ້ສະພາຄວາມໝັ້ນຄົງໃຊ້ການເຄື່ອນໄຫວ,ຊ່ອຍຜ່ອນຄາຍວິກິດການລະຫວ່າງພັກຮິສບຸນລາລີບັງກັບອິສລະແອນໂດຍໄວ.
ທ່ານລິນເຈີ້ນມິນເວົ້າວ່າ,ອີງຕາມກົດບັດສະຫະປະຊາຊາດ,ສະພາຄວາມໝັ້ນຄົງມີໜ້າທີ່ຮັບຜິດຊອບທີ່ສຳຄັນກ່ອນໝູ່ໃນດ້ານປົກປັກຮັກສາສັນຕິພາບແລະຄວາມປອດໄພສາກົນ.ແຕ່ລີບັງອິສລະແອນເກີດການປະທະກັນມານີ້,ປະຊາຄົມໂລກແລະປະຊາຊົນຕາເວັນອອກກາງກໍເອົາໃຈໃສ່ນຳທຸກການກະທຳຂອງສະພາຄວາມໝັ້ນຄົງຕະຫຼອດມາ.ຈີນຫວັງໃຫ້ສະພາຄວາມໝັ້ນຄົງຢ່າເຮັດໃຫ້ປະຊາຄົມໂລກເສຍຫວັງ,ທຳປະຕິກິລິຍາໂດຍໄວແລ້ວ,ສົ່ງສຽງອັນແຂງແຮງເປັນສຽງດຽວ.
ໃນຂະນະດຽວກັນ,ວັນທີ 21 ກໍລະກົດ ທຳນຽບປະທານາທິບໍດີຝຣັ່ງປະກາດວ່າ,ທ່ານປະທານາທິບໍດີຊີຣັກໄດ້ຮຽກຮ້ອງຢ່າງເປັນທາງການໃຫ້ສະຫະພາບເອີລົບມອບສິດໃຫ້ທ່ານໂຊລານາ ຜູ້ແທນຊັ້ນສູງຂອງສະຫະພາບເອີລົບທີ່ຮັບຜິດຊອບນະໂຍບາຍການຕ່າງປະເທດແລະຄວາມປອດໄພ ຕາງໜ້າສະຫະພາບເອີລົບພ້ອມກັນກັບອົງການສະຫະປະຊາຊາດ ຜ່ອນຄາຍສະຖານະການລີບັງແລະປາເລັສຕີນ,ຊຸກຍູ້ໃຫ້ລີບັງກັບອິສລະແອນກ້າວເຖິງຂັ້ນເຊັນສັນຍາຢຸດຍິງຖາວອນ.
ວັນທີ 21 ກໍລະະກົດ,ການປະທະກັນດ້ວຍກຳລັງອາວຸດລະຫວ່າງພັກຮິສບຸນລາລີບັງກັບອິສລະແອນກ້າວເຂົ້າສູ່ມື້ທີ 10,ສອງຝ່າຍຍິງປືນໃສ່ກັນຕໍ່ໄປ.ມື້ດຽວກັນ ສື່ມວນຊົນອິສລະແອນໄດ້ນຳເອົາຄວາມເວົ້າຂອງທ່ານຟຼິດມານ ນາຍພົນຈັດຕະວາ ເຈົ້າໜ້າທີ່ຊັ້ນສູງຂອງອິສລະແອນມາແຈ້ງວ່າ,ໃນບໍ່ເທົ່າໃດມື້ຂ້າງໜ້າ ທະຫານອິສລະແອນອາດຈະບຸກໂຈມຕີກອງປະກອບອາວຸດຂອງພັກຮິສບຸນລາລີບັງທາງໜ້າດິນແຮງກວ່າເກົ່າ.ມື້ດຽວກັນ ທ່ານນາສຮານລາ ເລຂາທິການໃຫຍ່ພັກຮິສບຸນລາລີບັງໃຫ້ສຳພາດຕໍ່ສື່ມວນຊົນວ່າ,ພັກຮິສບຸນລາບໍ່ຫ່ອນປ່ອຍຕົວທະຫານອິສລະແອນທີ່ຖືກຈັບນັ້ນຢ່າງບໍ່ມີເງື່ອນໄຂ,ພັກຮິສບຸນລາຈະຍຶດໝັ້ນຖືການເຈລະຈາທາງອ້ອມແລະການປ່ຽນສະເລີຍເສິກເປັນຊ່ອງທາງດຽວໃນການແກ້ໄຂບັນຫາທະຫານອິສລະແອນທີ່ຖືກຈັບຕົວ.
|
|
|
