|
ທ່ານຫູສຽນເວີນກ່າວເຖິງຈຸດພິເສດຂອງການພົວພັນໄມຕີຈິດແບບໃໝ່ລະຫວ່າງຈີນກັບຫວຽດນາມ
cri
Author: mo
ຕາມຂ່າວສານຊີນຮວາ: ກ່ອນທ່ານນົງດຶກແໜ້ງ ເລຂາທິການໃຫຍ່ສູນກາງພັກກອມມູນິດຫວຽດນາມມາຢ້ຽມຢາມຈີນ, ທ່ານຫູສຽນເວີນ ເອກອັກຄະລັດຖະທູດຈີນປະຈຳຫວຽດນາມໄດ້ຕ້ອນຮັບການເຂົ້າສຳພາດຂອງນັກຂ່າວຂ່າວສານຊີນຮວາ, ທ່ານຊີ້ອອກວ່າ, ໂຄງປະກອບການເມືອງຂອງສອງປະເທດຈີນຫວຽດນາມແມ່ນຄືກັນ, ສະພາບຂອງສອງປະເທດກໍຄ້າຍຄືກັນ, ສອງປະເທດໄວ້ເນື້ອເຊື່ອໃຈ ແລະສະໜັບສະໜູນເຊິ່ງກັນແລະກັນ, ຮ່ວມມືກັນຢ່າງຮອບດ້ານ, ຕ່າງຝ່າຍຕ່າງໄດ້ຮັບຜົນປະໂຫຍດ, ພ້ອມກັນສະແຫວງຫາການພັດທະນາ, ໄດ້ກາຍເປັນຈຸດພິເສດສຳຄັນຂອງການພົວພັນແບບໃໝ່ລະຫວ່າງຈີນກັບຫວຽດນາມໃນສະຕະວັດໃໝ່, ຊຸກຍູ້ໃຫ້ການພົວພັນລະຫວ່າງສອງພັກແລະສອງລັດກ້າວເຂົ້າສູ່ໄລຍະໃໝ່ທີ່ພັດທະນາຢ່າງຮອບດ້ານ.
ທ່ານຫູສຽນເວີນຊີ້ອອກວ່າ, ໃນຫຼາຍປີມານີ້, ການພົວພັນຈີນຫວຽດນາມຂະຫຍາຍຕົວຢ່າງວ່ອງໄວໄດ້ສະແດງອອກໃຫ້ເຫັນໃນ 4 ດ້ານດັ່ງນີ້ຄື: ໜຶ່ງ, ຜູ້ນຳສອງພັກລັດຈີນ-ຫວຽດນາມໄດ້ຮັກສາການຕິດຕໍ່ພົວພັນແລະການໄປມາຢ້ຽມຢາມກັນຢ່າງເນື່ອງນິດ, ໄດ້ຊຸກຍູ້ໃຫ້ການພົວພັນລະຫວ່າງສອງຊາດຂະຫຍາຍໄປສູ່ລະດັບສູງກວ່າເກົ່າຢ່າງບໍ່ຢຸດຢັ້ງ. ສອງ, ການຮ່ວມມືດ້ານເສດຖະກິດການຄ້າຂອງສອງຝ່າຍໄດ້ກ້າວຂຶ້ນສູ່ລະດັບສູງໃໝ່ຢ່າງຕໍ່ເນື່ອງ, ກ່ອນທ້າຍປີນີ້, ມູນຄ່າການຄ້າຂອງສອງຝ່າຍຄາດວ່າຈະບັນລຸ 10 ຕື້ໂດລາຊຶ່ງເປັນມູນຄ່າທີ່ນາຍົກລັດຖະມົນຕີຂອງສອງປະເທດກຳນົດໄວ້ສຳລັບປີ 2010 ທີ່ສາມາດບັນລຸກ່ອນກຳນົດ. ສາມ, ບັນຫາຊາຍແດນທີ່ຄ້າງຄາມາແຕ່ປະຫວັດສາດໄດ້ຮັບການແກ້ໄຂຢ່າງເໝາະສົມເທື່ອລະກ້າວ. ສີ່, ການແລກປ່ຽນແລະການຮ່ວມມືໃນຂົງເຂດຕ່າງໆຂອງສອງປະເທດໄດ້ເພີ່ມທະວີຂຶ້ນຮອບດ້ານ.
|
|
