|
|
 |
| (GMT+08:00)
2006-09-19 14:27:19
|
 |
|
ອີຣັກມີຄວາມສ່ຽງທີ່ຈະເກີດເສິກກາງເມືອງ
cri
Author: min
ຕາມຂ່າວCRI: ວັນທີ 18 ກັນຍາ, ໃນກອງປະຊຸມລະດັບສູງກ່ຽວກັບບັນຫາອີຣັກທີ່ຈັດຂຶ້ນໃນໄລຍະກອງປະຊຸມສະມັດຊາໃຫຍ່ອົງການສະຫະປະຊາຊາດສະໄໝທີ 61 , ທ່ານໂກຟີ ອານນັນເລຂາທິການໃຫຍ່ອົງການສະຫະປະຊາຊາດຊີ້ອອກວ່າ, ຖ້າການປະທະກັນດ້ວຍກຳລັງຮຸນແຮງຢູ່ອີຣັກໃນປັດຈຸບັນຍັງສືບຕໍ່ໄປ, ອີຣັກຈະມີຄວາມສ່ຽງສູງທີ່ຈະເກີດສົງຄາມກາງເມືອງ. ລັດຖະບານອີຣັກຕ້ອງເພີ່ມທະວີຄວາມປອງດອງຊາດແລະກຳຈັດການປະທະກັນລະຫວ່າງນິກາຍຕ່າງໆທີ່ນັບມື້ນັບໜັກໜ່ວງຂຶ້ນ. ທ່ານອານນັນຍັງຮຽກຮ້ອງໃຫ້ປະເທດອ້ອມຂ້າງແລະປະຊາຄົມໂລກໃຫ້ການສະໜັບສະໜູນແກ່ອີຣັກ.
ໃນເວລາບັນລະຍາຍຫຼັກໝັ້ນຂອງຝ່າຍຈີນ, ທ່ານຫຼີຈ້າວຊິ່ງ ລັດຖະມົນຕີວ່າການກະຊວງການຕ່າງປະເທດຈີນເວົ້າວ່າ, ຝ່າຍແລະອົງການຕ່າງໆຂອງອີຣັກຄວນວາງອາວຸດ, ແກ້ໄຂຄວາມຂັດແຍ່ງກັນດ້ວຍວິທີສັນຕິພາບແລະປະຊາທິປະໄຕ. ພ້ອມກັນນັ້ນ, ປະຊາຄົມໂລກຄວນທຳຄວາມພະຍາຍາມທີ່ມີລັກສະນະສ້າງສັນ, ຊ່ອຍອີຣັກວາງແຜນຄວາມປອດໄພທີ່ບັງເກີດຜົນ.
ໃນເວລາປະກອບຄຳຄິດຄຳເຫັນ, ທ່ານຈາລານ ທາລາບານີ ປະທານາທິບໍດີອີຣັກທີ່ຮ່ວມປະຊຸມເວົ້າວ່າ, ລັດຖະບານອີຣັກມີຄວາມຕັດສິນໃຈປັບປຸງສະພາບຄວາມສະຫງົບດ້ວຍມາດຕະການຕ່າງໆ, ຄື: ສ້າງກອງທະຫານປ້ອງກັນຄວາມສະຫງົບທີ່ມີປະສິດທິພາບ, ເພີ່ມທະວີການປົກຄອງດ້ວຍກົດໝາຍແລະການປົກປ້ອງສິດທິມະນຸດເປັນຕົ້ນ. ທ່ານຍັງເວົ້າວ່າ, ອີຣັກຫວັງຢາກຢູ່ຮ່ວມກັນກັບປະເທດໃກ້ຄຽງຢ່າງກົມກຽວກັນ, ແລະສ້າງການພົວພັນທີ່ມີໄມຕີຈິດແລະຕ່າງຝ່າຍຕ່າງມີຜົນປະໂຫຍດ.
ວັນທີ 18 ກັນຍາ, ກອງປະຊຸມລັດຖະມົນຕີກະຊວງພາຍໃນຂອງປະເທດອ້ອມແອ້ມອີຣັກຄັ້ງທີ 3 ໄດ້ຈັດຂຶ້ນຢູ່ນະຄອນຈີດາແຫ່ງຊາວຸດອາລາບີ. ກອງປະຊຸມຕົກລົງວ່າ, ປະເທດຕ່າງໆໃນພາກພື້ນຄວນເພີ່ມທະວີການປະສານສົມທົບແລະການຮ່ວມມືກັນ, ຊ່ອຍອີຣັກໂຈມຕີການເຄື່ອນໄຫວຂອງພວກກໍ່ການຮ້າຍ, ເຮັດໃຫ້ສະຖຽນະການອີຣັກມີສະຖຽນລະພາບແລະຄວາມປອດໄພ.
|
|
|
