|
ທະຫານອາເມລິກາຢືນຢັນວ່າ ການປະຕິບັດການທາງທະຫານຂອງເຂົາພາໃຫ້ 8 ຄົນເສຍຊີວິດ
cri
Author: cai
ຕາມຂ່າວສານຊີນຮວາ:ວັນທີ 27 ກັນຍາ,ກອງທະຫານອາເມລິກາປະຈຳອີຣັກໄດ້ຢືນຢັນວ່າ,ການປະຕິບັດການທາງທະຫານຂອງກອງທະຫານອາເມລິກາຢູ່ເມືອງບາໂຄບາ ທິດເໜືອແບັກແດັດກ່ອນຂ້ອນແຈ້ງວັນທີ 27 ກັນຍາໄດ້ພາໃຫ້ຊາວອີຣັກ 8 ຄົນເສຍຊີວິດ,ໃນນັ້ນ,ມີຜູ້ຍິງ 4 ຄົນ.
ໃນຖະແຫຼງການສະບັບໜຶ່ງຂອງກອງທະຫານອາເມລິກາປະຈຳອີຣັກຂຽນວ່າ,ໃນເວລາທະຫານອາເມລິກາໄລ່ຈັບກຳລັງປະກອບອາວຸດທີ່ສົງໄສວ່າເປັນສະມາຊິກອົງການອານໄຄດາ,ມີຄົນຍິງປືນໃສ່ທະຫານອາເມລິກາຈາກເຮືອນຫຼັງໜຶ່ງ,ທະຫານອາເມລິກາຈຶ່ງຍິງປືນໃສ່ຄືນ,ເຮັດໃຫ້ຜູ້ຊາຍ 2 ຄົນຕາຍ.ຫຼັງຈາກນັ້ນ,ກອງທະຫານອາເມລິກາໄດ້ໂຈມຕີເຮືອນຫຼັງນີ້ທາງອາກາດ,ພາໃຫ້ຜູ້ຊາຍ 2 ຄົນແລະຜູ້ຍິງ 4 ຄົນຕາຍ.ນອກນີ້,ກອງທະຫານອາເມລິກາຍັງໄດ້ຈັບຜູ້ຊາຍ 2 ຄົນແລະຜູ້ຍິງຄົນໜຶ່ງທີ່ບາດເຈັບໃນການຍິງຕໍ່ສູ້ກັນ.
ຫຼັງຈາກເຫດການນີ້,ໂຄສົກກອງທະຫານອາເມລິກາປະຈຳອີຣັກເວົ້າວ່າ,ກອງທະຫານອາເມລິກາຍັງພວມສືບສວນຜູ້ຖືກຍິງຕາຍແລະຖືກຈັບຕົວເຫຼົ່ານີ້ແມ່ນຜູ້ຕ້ອງຫາທີ່ກອງທະຫານອາເມລິກາໄລ່ຈັບຫຼືບໍ່.ໃນຖະແຫຼງການກ່ອນໜ້ານັ້ນ,ກອງທະຫານອາເມລິກາເອີ້ນຊາວອີຣັກທີ່ຕາຍແລະບາດເຈັບເຫຼົ່ານີ້ເປັນ"ພວກກໍ່ການຮ້າຍ".
ຕາມສື່ມວນຊົນທ້ອງຖິ່ນແຈ້ງຂ່າວວ່າ,ຄອບຄົວຂອງຜູ້ຕາຍເວົ້າວ່າ,ຍາດຕິພີ່ນ້ອງຂອງພວກເຂົາເຈົ້າບໍ່ມີການພົວພັນໃດໆກັບອົງການກໍ່ການຮ້າຍ,ໃນເວລາກອງທະຫານອາເມລິກາປະຕິບັດການທາງທະຫານຢູ່ນັ້ນ,ພວກເຂົາເຈົ້າພວມກຽມກິນເຂົ້າຢູ່ໃນເຮືອນ.
|
|
