|
ຕາມຂ່າວCRI:ສຳນັກຂ່າວຢົນຮັບຂອງສ.ປ.ປ.ເກົາຫຼີລາຍງານວ່າ,ຕອນເຊົ້າ ວັນທີ9ຕຸລາ,ສ.ປ.ປ.ເກົາຫຼີໄດ້ດຳເນີນການທົດລອງນິວເຄຼຍໃຕ້ດິນເທື່ອໜຶ່ງ.ຫຼັງຈາກສ.ປ.ປ.ເກົາຫຼີປະກາດວ່າໄດ້ດຳເນີນການທົດລອງນິວເຄຼຍແລ້ວ,ຈີນ,ສ.ເກົາຫຼີ,ຍີ່ປຸ່ນແລະຝ່າຍຕ່າງໆທີ່ກ່ຽວຂ້ອງພາກັນສະແດງທ່າທີ,ຄັດຄ້ານສ.ປ.ປ.ເກົາຫຼີດຳເນີນການທົດລອງນີວເຄຼຍຄັ້ງນີ້.
ສຳນັກຂ່າວທາງການສ.ປ.ປ.ເກົາຫຼີລາຍງານວ່າ,ການທົດລອງນີວເຄຼຍເທື່ອນີ້ແມ່ນດຳເນີນໂດຍອາໄສເຕັກນິກຂອງຕົນ"ຮ້ອຍສ່ວນຮ້ອຍ".ຂ່າວລາຍງານວ່າ,ການທົດລອງນີວເຄຼຍເທື່ອນີ້"ປອດໄພແລະໄດ້ຮັບຜົນສຳເລັດ",ໃນການທົດລອງບໍ່ໄດ້ເກີດມີຄວາມອັດຕະລາຍ,ເຊັ່ນ,ບໍ່ໄດ້ແຜ່ກຳລັງມັນຕະພາບລັງສີ.
ກະຊວງການຕ່າງປະເທດຈີນອອກຖະແຫຼງການວ່າ,ສ.ປ.ປ.ເກົາຫີຼບໍ່ເອົາຫົວຊານຳຄວາມຄັດຄ້ານໂດຍທົ່ວໄປຂອງປະຊາຄົມໂລກ,ດຳເນີນການທົດລອງນິວເຄຼຍຢ່າງບັງອາດ. ລັດຖະບານຈີນຄັດຄ້ານຢ່າງເດັດດ່ຽວ.ຝ່າຍຈີນທວງຢ່າງຮຸນແຮງໃຫ້ຝ່າຍສ.ປ.ປ.ເກົາຫີຼເຄົາລົບຄຳໝັ້ນສັນຍາກ່ຽວກັບການປາດສະຈາກນິວເຄຼຍ,ຢຸດຕິການກະທຳທັງໝົດທີ່ອາດຈະເຮັດໃຫ້ສະຖານະການຊຸດໂຊມລົງຕື່ມອີກ,ກັບຄືນສູ່ການເຈລະຈາຫຼົກຝ່າຍ.ມື້ດຽວກັນ,ທ່ານຫຼີຈ້າວຊີ່ງລັດຖະມົນຕີວ່າການກະຊວງການຕ່າງປະເທດຈີນໄດ້ໂທລະສັບກັບທ່ານນາງໄຣສ໌ລັດຖະມົນຕີວ່າການກະຊວງການຕ່າງປະເທດອາເມລິກາ,ໄດ້ແລກປ່ຽນຄວາມຄິດຄວາມເຫັນກ່ຽວກັບສະຖານະການຫຼ້າສຸດຢູ່ແຫຼມເກົາຫຼີໃນປະຈຸບັນນີ້.
ທ່ານໂຣມູຢຸນ ປະທານາທິບໍດີສ.ເກົາຫຼີໄດ້ຮຽກໄຂກອງປະຊຸມຮັບປະກັນຄວາມປອດໄພແຫ່ງຊາດ.ຫຼັງຈາກກອງປະຊຸມໄດ້ອອກຖະແຫຼງການຂອງລັດຖະບານ,ລັດຖະບານສ.ເກົາຫຼີກ່າວວ່າການທົດລອງນີວເຄຼຍທີ່ສ.ປ.ປ.ເກົາຫີຼດຳເນີນໃນມື້ດຽວກັນນັ້ນເປັນ"ການທ້າທາຍເກາະຜິດທີ່ອົດກັ້ນບໍ່ໄດ້",ໄດ້ລະເມີດ"ຄຳຖະແຫຼງການຮ່ວມກ່ຽວກັບແຫຼມເກົາຫຼີ"ປາດສະຈາກນິວເຄຼຍ,ຕໍ່ເລື່ອງນີ້,ສ.ເກົາຫຼີຈະປະຕິບັດມາດຕະການຮັບມືຢ່າງເດັດຂາດ.ຍ້ອນຖືກຜົນສະທ້ອນຂອງເຫດການດັ່ງກ່າວ,ຕະຫຼາດຫຸ້ນແລະຕະຫຼາດເງິນຕາຕ່າງປະເທດຂອງສ.ເກົາຫີຼລ້ວນແຕ່ຕົກຕ່ຳລົງຢ່າງຫຼວງຫຼາຍ.
ວັນທີ9ຕຸລາ,ທ່ານຊິນໂຈ ອາເບ ນາຍົກລັດຖະມົນຕີຍີ່ປຸ່ນທີ່ພວມຢ້ຽມຢາມສ.ເກົາຫຼີເວົ້າວ່າ,ສ.ປ.ປ.ເກົາຫຼີດຳເນີນການທົດລອງນີວເຄຼຍແມ່ນໃຫ້ອະໄພບໍ່ໄດ້ຢ່າງເດັດຂາດ.
ສະພາຄວາມໝັ້ນຄົງສະຫະປະຊາຊາດຈະໄຂກອງປະຊຸມດ່ວນກ່ຽວກັບບັນຫາສ.ປ.ປ.ເກົາຫຼີດຳເນີນການທົດລອງນີວເຄຼຍໃນວັນທີ9ຕຸລາ.
|
