|
|
 |
| (GMT+08:00)
2006-10-15 20:24:14
|
 |
|
ປະຊາຄົມໂລກທຳປະຕິກິລິຍາຕໍ່ມະຕິຂອງສະພາຄວາມໝັ້ນຄົງສະຫະປະຊາຊາດກ່ຽວກັບບັນຫາສປປເກົາຫຼີດຳເນີນການທົດລອງນິວເຄຼຍ
cri
ຕາມຂ່າວCRI,ຕອນບ່າຍວັນທີ14ຕຸລາ,ສະພາຄວາມໝັ້ນຄົງສະຫະປະຊາຊາດໄດ້ເປັນເອກະສັນກັນຜ່ານຮັບຮອງມະຕິເລກ1718ກ່ຽວກັບບັນຫາສປປເກົາຫຼີດຳເນີນການທົດລອງນິວເຄຼຍ.ເມື່ອຜ່ານມະຕິດັ່ງກ່າວແລ້ວ,ປະຊາຄົມໂລກພາກັນທຳປະຕິກິລິຍາຕ່າງໆ.
ຫຼັງຈາກລົງຄະແນນສຽງແລ້ວ,ທ່ານວາງກວ່າງຢ້າ ຜູ້ຕາງໜ້າຖາວອນຂອງຈີນປະຈຳສະຫະປະຊາຊາດໃຫ້ສຳພາດວ່າ,ໂດຍເລີ່ມຈາກພາກສ່ວນໃຫຍ່ແຫ່ງການຊຸກຍູ້ໃຫ້ແຫຼມເກົາຫຼີປອດນິວເຄຼຍ ຮັກສາສັນຕິພາບແລະສະຖຽນລະພາບຂອງແຫຼມເກົາຫຼີແລະພາກພື້ນອາຊີຕາເວັນອອກສຽງເໜືອ,ຈີນເຫັນດີໃຫ້ສະພາຄວາມໝັ້ນຄົງໃຊ້ມາດຕະການທີ່ແຂງແຮງແລະສົມເຫດສົມຜົນ.ທ່ານກ່າວເນັ້ນວ່າ,ໃຕ້ສະຖານະການໃນປະຈຸບັນ,ບັນດາຝ່າຍຄວນຍຶດໝັ້ນທິດທາງຕົ້ນຕໍທີ່ແກ້ໄຂບັນຫາດ້ວຍການເຈລະຈາໂດຍສັນຕິ,ຫຼີກເວັ້ນການກະທຳທີ່ອາດຈະພາໃຫ້ສະຖານະການຮ້າຍແຮງກວ່າເກົ່າແລະຄວບຄຸມບໍ່ໄດ້.
ເມື່ອຜ່ານມະຕິດັ່ງກ່າວແລ້ວ,ທ່ານຈອນ ບົນຕັນ ຜູ້ຕາງໜ້າອາເມລິກາປະຈຳສະຫະປະຊາຊາດເວົ້າວ່າ,ຖ້າສປປເກົາຫຼີປະຕິບັດຕາມມະຕິຢ່າງເຕັມສ່ວນແລະກັບຄືນສູ່ການເຈລະຈາຫົກຝ່າຍ,ການລົງໂທດທີ່ແນໃສ່ສປປເກົາຫຼີນັ້ນຈະຖືກຍົກເລີກ,ຖ້າບໍ່ດັ່ງນັ້ນ,ສປປເກົາຫຼີຈະປະເຊີນກັບບາດກ້າວຕື່ມອີກຂອງສະພາຄວາມໝັ້ນຄົງ.ທ່ານເວົ້າວ່າ,ອາເມລິກາຍັງຄົງຍຶດໝັ້ນແກ້ໄຂວິກິດການໃນປະຈຸບັນດ້ວຍຊ່ອງທາງການທູດ.
ທ່ານວິທາລີ ຊູກິນ ຜູ້ຕາງໜ້າຣັດເຊຍປະຈຳສະຫະປະຊາຊາດເວົ້າວ່າ,ມາດຕະການລົງໂທດສປປເກົາຫຼີຕ້ອງປະຕິບັດພາຍການຕິດຕາມຄຸ້ມຄອງຢ່າງເຂັ້ມງວດຂອງສະພາຄວາມໝັ້ນຄົງແລະຄະນະກຳມາທິການລົງໂທດທີ່ສ້າງຂຶ້ນໂດຍສະເພາະ.
ທ່ານເຄັນໂຈ ໂອຊີມາ ຜູ້ຕາງໜ້າຍີ່ປຸ່ນປະຈຳສະຫະປະຊາຊາດເວົ້າວ່າ,ຍີ່ປຸ່ນບໍ່ໄດ້ປິດປະຕູແຫ່ງການເຈລະຈາ,ຫາກແມ່ນເຕືອນໃຫ້ສປປເກົາຫຼີໃຫ້ຄຳຕອບຢ່າງຈິງຈັງຕໍ່ບັນຫາທີ່ມີຢູ່ລະຫວ່າງສອງປະເທດນັ້ນດ້ວຍຊ່ອງທາງການທູດ.
ກະຊວງການຕ່າງປະເທດແລະການຄ້າສ.ເກົາຫຼີອອກຖະແຫຼງການວ່າ,ສ.ເກົາຫຼີສະໜັບສະໜູນແລະຊົມເຊີຍສະພາຄວາມໝັ້ນຄົງຜ່ານຮັບຮອງມະຕິລົງໂທດສປປເກົາຫຼີ,ແລະຈະພະຍາຍາມປະຕິບັດຕາມມະຕິດັ່ງກ່າວ.
ທ່ານອຽນ ມັກ ດີ ລາ ຊາບລີເອຍ ຜູ້ຕາງໜ້າຝຣັ່ງປະຈຳສະຫະປະຊາຊາດແລະທ່ານພິເທີ ມັກເຄ ລັດຖະມົນຕີວ່າການກະຊວງການຕ່າງປະເທດການາດາກໍກ່າວວ່າຈະສະໜັບສະໜູນມະຕິຂອງສະພາຄວາມໝັ້ນຄົງ,ແລະເລັ່ງລັດໃຫ້ສປປເກົາຫຼີກັບຄືນສູ່ການເຈລະຈາຫົກຝ່າຍໂດຍໄວ.
|
|
|
