ຕາມ​ຂ່າວCRI: ກອງ​ປະຊຸມ​ກ່ຽວ​ກັບ​ການ​ປ່ຽນ​ແປງ​ຂອງ​ອຸນຫະພູມ​ໂລກ​ຂອງ​ສະຫະ​ປະຊາ​ຊາດ​ທີ່​ຈະ​ດຳ​ເນີນ​ເປັນ​ເວລາ 3 ມື້​ໄດ້ໄຂ​ຂຶ້ນຢູ່​​ໄນ​ໂຣ​ບີ​ ນະຄອນຫຼວງ​​ແຄັນ​ຢາ​ໃນວັນ​ທີ 15 ພະຈິກນີ້.

​ໃນ​ເວລາ​ກ່າວ​ຄຳ​ປາ​ໄສ​ໃນ​ພິທີ​ໄຂ​ກອງ​ປະຊຸມ ທ່ານ​ໂກ​ຟີ ອານ​ນານ ​ເລຂາທິການ​ໃຫຍ່​ສະຫະ​ປະຊາ​ຊາດ​ກ່າວ​ວ່າ,ການ​ປ່ຽນ​ແປງ​ຂອງອຸນຫະພູມ​ໂລກຈະ​ຂົ່ມຂູ່​ເຖິງສັນຕິພາບ​ແລະ​ຄວາມ​ປອດ​ໄພ​ຂອງ​ໂລກ,ຕ້ອງ​​ເອົາ​ໃຈ​ໃສ່​ນຳບັນຫາ​ການ​ປ່ຽ​ນ​ແປງ​ຂອງ​ດິນ​ຟ້າ​ອາກາດ​​​ເທົ່າ​ທຽມ​ກັນກັບ​ການ​ຂົ່ມຂູ່​ຂອງ​ດ້ານ​ອື່ນໆເຊັ່ນ ການ​ປະ​ທະ​ກັນ ຄວາມທຸກ​ຍາກ ​ແລະ​ການ​ແຜ່ຜາຍ​ອາວຸດທຳລາຍ​ລ້າງ​ເປັນຕົ້ນ.

ທ່ານ​ອານ​ນານ​ປະກາດວ່າ "​ຂອບ​ໄນ​ໂຣ​ບີ"ທີ່ 6 ຂະ​ແໜງ​ການ​ຂອງ​ສະຫະ​ປະຊາ​ຊາດ​ພ້ອມ​ກັນ​ລິ​ເລີ່​ມນັ້ນຈະ​ຊ່ວຍປະ​ເທ​ດພວມ​ພັດທະນາ,​ໂດຍ​ສະ​ເພາະ​ແມ່ນ​ຊ່ອຍປະ​ເທດ​ອາ​ຟຼິກາ​ໃຫ້​ໄດ້​ຮັບ​​ເງິນ​ທຶນ​ຫຼາຍ​ກວ່າ​ເກົ່າ.

​ໃນ​ກອງ​ປະຊຸມ ທ່ານ​ຈ່ຽງ​ເວີຍ​ຊິ່ນ ຫົວໜ້າ​ຄະນະ​ຜູ່​ແທນ​ຈີນ​ຮຽກຮ້ອງ 30 ກວ່າ​ປະ​ເທດ​ອຸດສາຫະກຳ​ພັດທະນາ​ຈົ່ງ​ວາງ​ມາດຖານ​ຫຼຸດການ​ລະບາຍ​ອາຍ​ຫ້ອງ​ອຸ່ນ​ຫຼັງ​ປີ 2012 ​ໂດຍ​ໄວ,ຈັດການ​ເຈລະຈາ​​ທີ່​ມີ​ລັກສະນະ​ຈິງ​ໃຈໂດຍ​ໄວ,​ແລະ​ສຳ​ເລັດ​ວຽກ​ງານ​ການ​ເຈລະຈາ​ຢ່າງ​ຊ້າ​ບໍ່​ໃຫ້​ເກີນ​ປີ 2009.

ມື້​ດຽວ​ກັນ,​ໃນ​ກອງ​ປະຊຸມ​​ເທື່ອ​ນີ້ ສູນ​ນະ​ໂຍບາຍ​ອາກາດ​ສົດ​​ໄສຂອງ​ອາ​ເມ​ລິ​ກາ​ໄດ້​ປະກາດ​ບົດ​ລາຍ​ງານ​ວ່າ,ຈີນ​ແລະ​​ເບຼຊິນ​ໄດ້​ໃຊ້​ມາດ​ຕະການ​ແຕ່​ຝ່າຍ​ດຽວ​​ເພື່ອຫຼຸດ​ປະລິມານ​ການ​ລະບາຍ​​ໃຫ້​ໜ້ອຍ​ລົງ​ແລ້ວ,​ໃນ​ນັ້ນ ອາຍ​ຫ້ອງ​ອຸ່ນ 70% ຂອງ​ຈີນ​ແລະ​​ເບຼຊິນ​ພ້ອມ​ດ້ວຍ​ອາຍ​ຫ້ອງ​ອຸ່ນ 30% ຂອງ​ອິນ​ເດຍ​ແມ່ນ​ເຂົາ​ເຈົ້າຫຼຸດ​ການ​ລະບາຍ​ໃຫ້​ໜ້ອຍ​ລົງ​​ໂດ​ຍຕົນ​ເອງ,​ແຕ່​ບໍ່​ແມ່ນ​ປະຕິບັດ​ຍ້ອນ​ຂໍ້​ຜູກ​ພັນ​ໃນ"ອະນຸ​ສັນຍາ​ກຽວ​ໂຕ",​​​ເຮັດ​ໃຫ້​ຖ້ອຍຄວາມ​ຂອງ​ປະ​ເທດທີ່​ພັດທະນາ​ແລ້ວ​ຈຳນວນ​ໜຶ່ງ​ທີ່​ເຫັນ​ວ່າ ປະ​ເທດພວມ​ພັດທະນາ​ບໍ່​ມີ​ຜົນສຳ​ເລັດ​ຫຍັງ​ໃນ​ດ້ານ​ການ​ຮັກສາ​ດິນ​ຟ້າ​ອາກາດ​ນັ້ນຖືກ​ຕີ​ຖອຍ​ໄປ​ເອງ.