|
ຕາມຂ່າວ CRI: ໃນເວລາເຂົ້າຮ່ວມກອງປະຊຸມບໍ່ເປັນທາງການຂອງຜູ່ນຳອົງການຮ່ວມມືເສດຖະກິດພາກພື້ນອາຊີອາຊີຟິກຫຼື ເອເປັກຄັ້ງທີ 14 ທີ່ຈັດຂຶ້ນຢູ່ທີ່ຮ່າໂນຍຂອງຫວຽດນາມ, ທ່ານຫູຈິນທາວ ປະທານປະເທດຈີນໄດ້ພົບປະກັບທ່ານຈ໋ອດ ບຸສ ປະທານາທິບໍດີອາເມລິກາ ແລະຜູ່ນຳສະມາຊິກອົງການເອເປັກທ່ານອື່ນໆ.
ໃນເວລາພົບປະກັບທ່ານບຸສໃນວັນທີ 19 ພະຈິກນີ້, ທ່ານຫູຈິນທາວກັບທ່ານບຸສໄດ້ແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນທີ່ສົນໃຈນຳກັນ ເຊັ່ນ ການຂະຫຍາຍການພົວພັນລະຫວ່າງຈີນກັບອາເມລິກາ ບັນຫານິວເຄຼຍແຫຼມເກົາຫຼີແລະບັນຫານິວເຄຼຍອີຣານເປັນຕົ້ນ.
ທ່ານຫູຈິນທາວຊີ້ອອກວ່າ, ຈີນອາເມລິກາຄວນເພີ່ມທະວີການສົນທະນາກ່ຽວກັບບັນຫາສຳຄັນທີ່ກ່ຽວຂ້ອງກັບສັນຕິພາບແລະສະຖຽນລະພາບຂອງໂລກ ແລະກ່ຽວຂ້ອງກັບຜົນປະໂຫຍດ ຮ່ວມຂອງມວນມະນຸດ, ເພີ່ມຄວາມໄວ້ເນື້ອເຊື່ອໃຈເຊິ່ງກັນແລະກັນ, ລົງເລິກການຮ່ວມມື, ແກ້ໄຂຄວາມເຫັນທີ່ຂັດແຍ່ງກັນຢ່າງເໝາະສົມ, ຊຸກຍູ້ໃຫ້ການພົວພັນຮ່ວມມືທີ່ມີລັກສະນະສ້າງສັນລະຫວ່າງຈີນອາເມລິກາຂະຫຍາຍໄປໜ້າ. ທ່ານຫູຈິນທາວຍັງໄດ້ແນະນຳສະພາບການສ້າງສາສັງຄົມທີ່ກົມກຽວກັນຂອງຈີນ, ກ່າວເນັ້ນວ່າ ຕໍ່ພາຍໃນປະເທດ ໃນຂະນະທີ່ຈີນສຸມກຳລັງສ້າງສາສັງຄົມທີ່ກົມກຽວກັນນັ້ນ ຕໍ່ພາຍນອກ ຈະເດີນຕາມເສັ້ນທາງພັດທະນາໂດຍສັນຕິຢ່າງໝັ້ນໜຽວບໍ່ປ່ຽນແປງ, ປະຕິບັດຍຸດທະສາດເປີດປະຕູທີ່ຕ່າງຝ່າຍຕ່າງມີຜົນປະໂຫຍດ, ພະຍາຍາມຊຸກຍູ້ການສ້າງສາໂລກທີ່ກົມກຽວກັນທີ່ມີສັນຕິພາບຖາວອນແລະຈະເລີນຮຸ່ງເຮືອງພ້ອມກັນ.
ທ່ານບຸສສະແດງຄວາມຊົມເຊີຍ ແລະກ່າວວ່າ ຝ່າຍອາເມລິກາຍິນດີສົນທະນາກັບຈີນດ້ານຍຸດທະສາດທຸກລາຍແລະໄປມາຫາສູ່ກັນກັບຈີນໃນທຸກລະດັບ. ທ່ານຍັງກ່າວເນັ້ນວ່າ, ນະໂຍບາຍຂອງອາເມລິກາໃນບັນຫາໄຕ້ຫວັນບໍ່ໄດ້ປ່ຽນແປງ.
ໃນເວລາພົບປະກັບທ່ານປູຕິນ ປະທານາທິບໍດີຣັດເຊຍໃນວັນທີ 18 ພະຈິກນີ້, ທ່ານຫູຈິນທາວໄດ້ສະແດງຄວາມເພິ່ງພໍໃຈຕໍ່ສະພາບການຂະຫຍາຍຕົວໃນປັດຈຸບັນຂອງການພົວພັນລະຫວ່າງຈີນຣັດເຊຍ. ທ່ານຫູຈິນທາວຍັງກ່າວວ່າ, ສອງຝ່າຍຕ້ອງສືບຕໍ່ພະຍາຍາມ, ສຸມໃສ່ເປີດກວ້າງການຮ່ວມມື ຍົກຄຸນນະພາບການຮ່ວມມືໃຫ້ສູງຂຶ້ນ, ຍົກການຮ່ວມມືດ້ານເສດຖະກິດການຄ້າລະຫວ່າງສອງປະເທດໃຫ້ຂຶ້ນສູ່ລະດັບສູງກວ່າເກົ່າ. ທ່ານປູຕິນກ່າວວ່າ, ຣັດເຊຍສະໜັບສະໜູນວິສາຫະກິດຈີນເຂົ້າຮ່ວມການພັດທະນາຊັບພະຍາກອນຣັດເຊຍ. ຫວັງໃຫ້ສອງຝ່າຍເພີ່ມທະວີການຮ່ວມມືໃນຂົງເຂດອະvນຸລັກສິ່ງແວດລ້ອມ, ພ້ອມກັນສ້າງຄວາມສຸກໃຫ້ແກ່ປະຊາຊົນສອງຊາດ.
ວັນທີ 18 ພະຈິກນີ້, ທ່ານຫູຈິນທາວຍັງໄດ້ແຍກອອກພົບປະກັບທ່ານຊິນໂຈ ອາເບ ນາຍົກລັດຖະມົນຕີຍີ່ປຸ່ນ ທ່ານຊູຊີໂລ ປະທານາທິບໍດີອິນໂດເນເຊຍ ທ່ານນາງເຮເລນ ຄຼາກ ນາຍົກລັດຖະມົນຕີນິວຊີແລນ ທ່ານມີເຊນ ໂຊມາເຣ ນາຍົກລັດຖະມົນຕີປາປົວນິວກີນີ ທ່ານສະເຕເຟນ ຮາເປີ ນາຍົກລັດຖະມົນຕີການາດາ ທ່ານນາງອາຣານດາ ລັດຖະມົນຕີຊ່ອຍວ່າການກະຊວງການຕ່າງປະເທດ ຜູ່ຕາງໜ້າຂອງປະທານາທິບໍດີແມັກຊິກ, ໄດ້ແລກປ່ຽນຄວາມເຫັນກ່ຽວກັບການພົວພັນລະຫວ່າງສອງຝ່າຍແລະຊຸກຍູ້ຂະບວນວິວັດອົງການເອເປັກເປັນຕົ້ນ.
|
