|
ຕາມຂ່າວCRI,ວັນທີ23ພະຈິກນີ້,ທ່ານຫູຈິນທ່າວ ປະທານປະເທດຈີນທີ່ໄປຢ້ຽມຢາມອິນເດຍກ່າວວ່າ,ການຮ່ວມມືເສດຖະກິດການຄ້າທີ່ຕ່າງຝ່າຍຕ່າງມີຜົນປະໂຫຍດລະຫວ່າງຈີນອິນເດຍໄດ້ນຳເອົາຜົນປະໂຫຍດຕົວຈິງໃຫ້ທັງສອງຝ່າຍ,ແລະໄດ້ປັບປຸງພື້ນຖານແຫ່ງການພົວພັນລະຫວ່າງສອງປະເທດໃຫ້ໝັ້ນຄົງ.
ມື້ດຽວກັນ,ໃນເວລາເຂົ້າຮ່ວມກອງປະຊຸມສຸດຍອດການລົງທຶນແລະຮ່ວມມື ທາງເສດຖະກິດການຄ້າທັງເປັນເວທີປຶກສາຫາລືCEOທີ່ຈັດຂຶ້ນຢູ່ບອມເບອິນເດຍ,ທ່ານຫູຈິນທ່າວກ່າວວ່າ,ໃນຫຼາຍປີມໍ່ໆມານີ້,ການຮ່ວມມືເສດຖະກິດການຄ້າຈີນອິນເດຍໄດ້ຮັບໝາກຜົນອັນພົ້ນເດັ່ນ,ແລ້ວກາຍເປັນຈຸດຮຸ່ງໃນການພົວພັນລະຫວ່າງສອງຝ່າຍ.ປີນີ້ມູນຄ່າການຄ້າລະຫວ່າງສອງປະເທດຄາດວ່າຈະລື່ນກາຍ20ຕື້ໂດລາ,ເຊິ່ງຈະບັນລຸເປົ້າໝາຍຂອງປີ2008ທີ່ຈີນອິນເດຍຕົກລົງກັນນັ້ນກ່ອນເວລາກຳນົດ.ທ່ານກ່າວວ່າ,ຈີນແລະອິນເດຍລ້ວນແຕ່ຢູ່ໃນໄລຍະພັດທະນາຢ່າງວ່ອງໄວ,ພວມປະເຊີນກັບໂອກາດຄັ້ງປະຫວັດສາດທີ່ຂ້ຽວເລັ່ງພັດທະນາ.ຈີນຖືອິນເດຍເປັນເພື່ອນມິດແລະຄູ່ຮ່ວມມື,ຊົມເຊີຍການພັດທະນາຂອງອິນເດຍຢ່າງຈິງໃຈ.ການພັດທະນາຂອງຈີນແລະອິນເດຍໄດ້ສະໜອງໂອກາດອັນລ້ຳຄ່າເຮັດໃຫ້ການຮ່ວມມືຮອບດ້ານທີ່ຕ່າງຝ່າຍຕ່າງມີຜົນປະໂຫຍດກ້າວສູ່ລວງເລິກ.
ເພື່ອຊຸກຍູ້ການຮ່ວມມືດ້ານເສດຖະກິດການຄ້າລະຫວ່າງສອງປະເທດໃຫ້ຂະຫຍາຍຕົວຂຶ້ນສູ່ລວງເລິກແລະກວ້າງອອກຕື່ມອີກ,ທ່ານຫູຈິນທ່າວຍັງໄດ້ສະເໜີຂໍ້ສະເໜີ5ຂໍ້,ຄື,ຊຸກຍູ້ການຄ້າໃຫ້ມີຫຼາຍຮູບຫຼາຍແບບ,ເປີດກວ້າງການຮ່ວມມືໃນຂົງເຂດສຳຄັນ,ປົວແປງສະພາບແວດລ້ອມທາງການຄ້າແລະການລົງທຶນ,ເພີ່ມທະວີການຮ່ວມມືໃນຂົງເຂດຫຼາຍຝ່າຍແລະຢູ່ປະເທດທີສາມ,ຕັ້ງໜ້າຊອກຄົ້ນການຄ້າຢ່າງເສລີ.
|
