|
ຕາມຂ່າວCRI:ວັນທີ19ທັນວານີ້,ໃນເວລາໃຫ້ສຳພາດຕໍ່"ໜັງສືພິມວໍຊິງຕັນໂພສ໌",ທ່ານຈັອດ ບຸສ ປະທານາທິບໍດີອາເມລິກາກ່າວວ່າ,ທ່ານມີແຜນຈະເພິ່ມກຳລັງທະຫານຢູ່ອີຣັກ,ເພື່ອເຮັດໃຫ້ທະຫານອາເມລິກາສາມາດດຳເນີນສົງຄາມຕ້ານການກໍ່ການຮ້າຍເປັນເວລາຍາວນານ.
ທ່ານບຸສເວົ້າວ່າ,ທ່ານໄດ້ຮຽກຮ້ອງໃຫ້ທ່ານໂລເບີດ ແກສ໌ ລັດຖະມົນຕີວ່າການກະຊວງປ້ອງກັນປະເທດຜູ້ໃໝ່ວາງແຜນລະອຽດທີ່ຈະເພິ່ມທະວີກຳລັງທະຫານຢູ່ອີຣັກ.ທ່ານຊີ້ອອກວ່າ,ການເພິ່ມກຳລັງທະຫານບໍ່ພຽງແຕ່ພິຈາລະນາຕາມສະຖານະການໃນອີຣັກເທົ່ານັ້ນ,ແຕ່ຍັງພິຈາລະນາຈາກສະພາບການໂຈມຕີກຸ່ມອິສລາມຫົວຮຸນແຮງໃນທົ່ວໂລກ.
ຕາມຂ່າວລາຍງານວ່າ,ເຈົ້າໜ້າທີ່ທຳນຽບຂາວສະເໜີຢ່າງແຂງແຮງໃຫ້ເພິ່ມທະຫານ1ໝື່ນ5ພັນ ຫາ 3ໝື່ນຄົນຢູ່ອີຣັກ.ແຕ່ກອງປະຊຸມປະສົມເສນາທິການໄດ້ເປັນເອກະສັນກັນຄັດຄ້ານຂໍ້ສະເໜີດັ່ງກ່າວ,ເຫັນວ່າ,ຈົນຮອດປັດຈຸບັນ,ທຳນຽບຂາວຍັງກຳນົດໜ້າທີ່ຂອງທະຫານທີ່ຈະເພິ່ມຂຶ້ນໃໝ່ນັ້ນບໍ່ລະອຽດເທື່ອ.
ຂ່າວແຈ້ງຕື່ມວ່າ,ວັນທີ19ທັນວານີ້,ທ່ານລົບ ພົດແມນ ຫົວໜ້າກົມຄຸ້ມຄອງ ບໍລິຫານແລະງົບປະມານຂອງທຳນຽບຂາວກ່າວວ່າ,ໃນປີການເງິນ2007ທີ່ເລິ່ມແຕ່ວັນທີ1ຕຸລາ,ງົບປະມານທີ່ໃຊ້ໃນສົງຄາມອີຣັກຂອງອາເມລິກາຄາດວ່າຈະຫຼາຍກວ່າ110ຕື້ໂດລາ.
|
