|
|
 |
| (GMT+08:00)
2006-12-24 18:43:28
|
 |
|
ທ່ານໂອນເມີດເຫັນດີມອບເງິນພາສີອາກອນ100ລ້ານໂດລາທີ່ອິສຣາແອນຊ່ວຍເກັບແທນປາເລັສຕິນນັ້ນໃຫ້ທ່ານອັບບັສ
cri
ຕາມຂ່າວCRI,ວັນທີ23ທັນວານີ້,ຢູ່ສຳນັກງານນາຍົກລັດຖະມົນຕີອິສຣາແອນທີ່ເຢລູຊາເລມ ທ່ານເອຮຸດ ໂອນເມີດ ນາຍົກລັດຖະມົນຕີອິສຣາແອນໄດ້ເຈລະຈາກັບທ່ານອັບບັສ ປະທານອົງການອຳນາດແຫ່ງຊາດປາເລັສຕິນ.
ພາຍຫຼັງການເຈລະຈາສິ້ນສຸດລົງແລ້ວ,ທ່ານຊາອິບ ເອເລຄັດ ຜູ່ແທນເຈລະຈາຜູ່ທີໜຶ່ງຂອງປາເລັສຕິນໄດ້ຖະແຫຼງຕໍ່ສື່ມວນຊົນວ່າ,ທ່ານໂອນເມີດໄດ້ເຫັນດີມອບເງິນພາສີອາກອນຈຳນວນ100ລ້ານໂດລາທີ່ອິສຣາແອນຊ່ວຍເກັບແທນປາເລັສຕິນນັ້ນໃຫ້ຝ່າຍປາເລັສຕິນ.ທ່ານໂອນເມີດຍັງເຫັນດີຍົກເລີກສະຖານີກວດກາຂອງທະຫານອິສຣາແອນຈຳນວນໜຶ່ງທີ່ຢູ່ຝັ່ງຕາເວັນຕົກແມ່ນ້ຳຈໍແດນເພື່ອອຳນວຍຄວາມສະດວກໃຫ້ແກ່ການສັນຈອນຂອງຊາວປາເລັສຕິນ.
ທ່ານເອເລຄັດຍັງກ່າວວ່າ,ຜູ່ນຳ ສອງຝ່າຍບໍ່ໄດ້ກ້າວເຖິງຂັ້ນມີຄວາມເຫັນເປັນເອກະສັນກັນໃນບັນຫາແລກປ່ຽນຄົນໂທດ.ສອງຝ່າຍຕົກລົງຈະເຈລະຈາກັນອີກເພື່ອຫາລືບັນຫາດັ່ງກ່າວ.
ຕັ້ງແຕ່ອົງການຂະບວນການອິສລາມປາເລັສຕິນຕໍ່ຕ້ານຫຼືຮາມາສຂຶ້ນກຳອຳນາດໃນຕົ້ນປີ2006ມານີ້,ອິສຣາແອນໄດ້ກັກເງິນພາສີອາກອນລວມ500ລ້ານໂດລາທີ່ອິສຣາແອນເກັບແທນປາເລັສຕິນ.
|
|
|
