|
ທ່ານເວີ່ນເຈຍປາວກ່າວວ່າ, ຈີນຍິນດີສືບຕໍ່ເພີ່ມທະວີແລະເສີມສ້າງການພົວພັນຄູ່ຂາຍຸດທະສາດກັບອາຊຽນ
cri
Author: MO
ຕາມຂ່າວCRI: ວັນທີ 14 ມັງກອນ, ຢູ່ເຊບູແຫ່ງຟີລິບປິນ, ທ່ານເວີ່ນເຈຍປາວ ນາຍົກລັດຖະມົນຕີຈີນກ່າວວ່າ, ໃນປີໃໝ່ນີ້, ຈີນຍິນດີພ້ອມກັບອາຊຽນສືບຕໍ່ເພີ່ມທະວີແລະເສີມສ້າງການພົວພັນຄູ່ຂາຍຸດທະສາດຈີນອາຊຽນ, ຊຸກຍູ້ການຮ່ວມມືສອງຝ່າຍກ້າວໄປສູ່ລະດັບສູງກວ່າເກົ່າໃຕ້ການຊີ້ນຳຂອງ"ຖະແຫຼງການຮ່ວມຂອງກອງປະຊຸມສຸດຍອດລະລຶກຈີນອາຊຽນ".
ທ່ານເວີ່ນເຈຍປາວແມ່ນໃຫ້ທັດສະນະດັ່ງກ່າວໃນເວລາກ່າວຄຳປາໄສໃນກອງປະຊຸມຜູ້ນຳຈີນອາຊຽນຄັ້ງທີ 10. ທ່ານສະເໜີໃຫ້ເພີ່ມທະວີການແລກປ່ຽນກັນດ້ານຍຸດທະສາດຂອງຜູ້ນຳສອງຝ່າຍໃນເວທີສາກົນແລະພາກພື້ນເຊັ່ນ: ການຮ່ວມມືຢູ່ອາຊີຕາເວັນອອກ, ອົງການອາເປັກ, ກອງປະຊຸມອາຊີເອີລົບ, ແລະສະຫະປະຊາຊາດເປັນຕົ້ນ, ເລັ່ງລັດການເຈລະຈາສັນຍາການລົງທຶນຂອງສອງຝ່າຍ, ເພີ່ມທະວີການຮ່ວມມືໃນຂົງເຂດຕ່າງໆເຊັ່ນ: ໂຈມຕີອາຊະຍາກຳຂ້າມຊາດ, ຄວາມປອດໄພເທິງທະເລ, ຫຼຸດໄພກູ້ໄພ, ປ້ອງກັນແລະປິ່ນປົວພະຍາດຕິດແປດ, ແລະການອະນຸລັກສິ່ງແວດລ້ອມເປັນຕົ້ນ.
ທ່ານເວີ່ນເຈຍປາວຍັງກ່າວວ່າ, ຝ່າຍຈີນຕັ້ງໜ້າສະໜັບສະໜູນການສ້າງປະຊາຄົມແລະການເຊື່ອມໂຍງຂອງອາຊຽນ, ຍິນດີຊຸກຍູ້ການແລກປ່ຽນລະຫວ່າງສັງຄົມແລະວັດທະນະທຳ, ພ້ອມດ້ວຍການໄປມາຫາສູ່ກັນລະຫວ່າງສອງຝ່າຍ.
ພາຍຫຼັງກອງປະຊຸມສິ້ນສຸດລົງ, ທ່ານເວີ່ນເຈຍປາວແລະຜູ້ນຳອາຊຽນໄດ້ພ້ອມກັນເຂົ້າຮ່ວມພິທີລົງລາຍເຊັນໃນເອກະສານຕ່າງໆເຊັ່ນ: "ສັນຍາການຄ້າການບໍລິການຂອງເຂດການຄ້າເສລີຈີນອາຊຽນ"ແລະອື່ນໆ.
|
|
