|
ທ່ານເວີ່ນເຈ່ຍປາວກ່າວວ່າ, ການຮ່ວມມືຂອງອາຊີຕາເວັນອອກຄວນແມ່ນການຮ່ວມມືທີ່ເຮັດໃຫ້ພາກພື້ນພັດທະນາແລະຈະເລີນຮຸ່ງເຮືອງຮ່ວມກັນ
cri
Author: m
ຕາມຂ່າວ CRI: ວັນທີ 15 ມັງກອນນີ້, ຢູ່ເຊບູຂອງຟິລົບປິນ, ທ່ານເວີ່ນເຈ່ຍປາວ ນາຍົກລັດຖະມົນຕີຈີນກ່າວວ່າ, ການຮ່ວມມືຂອງອາຊີຕາເວັນອອກຄວນແມ່ນການຮ່ວມມືທີ່ເຮັດໃຫ້ພາກພື້ນພັດທະນາແລະຈະເລີນຮຸ່ງເຮືອງຮ່ວມກັນ, ຄວນແມ່ນການຮ່ວມມືທີ່ຊຸກຍູ້ໃຫ້ປະເທດຕ່າງໆຢູ່ຮ່ວມກັນຢ່າງກົມກຽວ, ຄວນແມ່ນການຮ່ວມມືທີ່ເຄົາລົບລະບອບສັງຄົມຂອງກັນທີ່ມີວັດທະນະທຳຫຼາຍຢ່າງ, ແລະພັດທະນາດ້ວຍຫຼາຍເຄົ້າ.
ໃນກອງປະຊຸມສຸດຍອດອາຊີຕາເວັນອອກຄັ້ງທີ 2 ທີ່ຈັດຂຶ້ນໃນວັນທີ 15 ມັງກອນນີ້, ທ່ານເວີ່ນເຈ່ຍປາວກ່າວວ່າ, ບັນດາປະເທດອາຊີຕາເວັນອອກຄວນເລີ່ມຕົ້ນຈາກການແລກປ່ຽນບົດຮຽນແຫ່ງການພັດທະນາ, ຂໍ້ມູນຂ່າວສານປະຈຸບັນແລະເຕັກນິກກ້າວໜ້າ, ໃນຂົງເຂດທີ່ຝ່າຍຕ່າງໆໃຫ້ຄວາມສົນໃຈຫຼາຍກວ່າໝູ່ແລະມີຄວາມເປັນເອກະສັນກັນຫຼາຍກວ່າໝູ່, ໃຫ້ປະເທດຕ່າງໆໄດ້ຮັບຜົນປະໂຫຍດຈາກການຮ່ວມມືກັນ, ປະກອບເປັນສະພາບການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດແລະຄ້ຳຊູຊຶ່ງກັນແລະກັນ. ສ້າງປະຊາຄົມແບບໃໝ່ທີ່ສາມາດພັດທະນາພ້ອມກັນໃນເວລາທີ່ມີຄວາມສະຫງົບ, ແລະຮັບມືຮ່ວມກັນໃນເວລາມີວິກິດການເກີດຂຶ້ນ.
ໃນກອງປະຊຸມ, ທ່ານເວີ່ນເຈ່ຍປາວຍັງໄດ້ບັນລະຍາຍເສັ້ນທາງພັດທະນາໂດຍສັນຕິຂອງຈີນ, ໂດຍກ່າວເນັ້ນວ່າ, ການພັດທະນາແມ່ນໜ້າທີ່ໃຈກາງຂອງຈີນ. ຈີນຈະເປີດກວ້າງການຄ້າ, ການລົງທຶນແລະການຊ່ອຍເຫຼືອຕໍ່ປະເທດອາຊີຕື່ມອີກ, ເຮັດໃຫ້ຜົນປະໂຫຍດຂອງຈີນແລະປະເທດອາຊີຜູກພັນກັນຍິ່ງແໜ້ນແຟ້ນກວ່າເກົ່າ.
|
|
