|
ຕາມຂ່າວCRI:ວັນທີ 15 ມັງກອນນີ້,ກອງປະຊຸມສຸດຍອດອາຊີຕາເວັນອອກຄັ້ງທີ 2 ທີ່ຈັດຂຶ້ນຢູ່ເຊບູແຫ່ງຟີລິບປິນໄດ້ອັດລົງ.ໃນກອງປະຊຸມ,ທ່ານເວີ່ນເຈ່ຍປາວ ນາຍົກລັດຖະມົນຕີຈີນໄດ້ກ່າວຄຳປາໄສວ່າ,ການຮ່ວມມືໃນອາຊີຕາເວັນອອກຄວນເປັນການຮ່ວມມືທີ່ບັນລຸການພັດທະນາແລະຄວາມຈະເລີນພ້ອມກັນໃນພາກພື້ນ,ຄວນເປັນການຮ່ວມມືທີ່ຊຸກຍູ້ໃຫ້ປະເທດຕ່າງໆຢູ່ຮ່ວມກັນຢ່າງກົມກຽວກັນ,ຄວນເປັນການຮ່ວມມືທີ່ເຄົາລົບຄວາມຫຼາກຫຼາຍຂອງລະບອບສັງຄົມແລະວັດທະນະທຳແລະການພັດທະນາຫຼາຍເຄົ້າ.
ທ່ານເວີ່ນເຈ່ຍປາວເວົ້າວ່າ,ປະເທດຕ່າງໆຂອງອາຊີຕາເວັນອອກຕ້ອງເລີ່ມຈາກຂົງເຂດທີ່ປະເທດທັງຫຼາຍເອົາໃຈໃສ່ທີ່ສຸດແລະມີຄວາມຮັບຮູ້ຄືກັນຫຼາຍກວ່າໝູ່,ລົງມືຈາກການແລກປ່ຽນບົດຮຽນການພັດທະນາ ຂໍ້ມູນຂ່າວສານທັນສະໄໝແລະເຕັກນິກອັນກ້າວໜ້າ,ໃຫ້ປະເທດຕ່າງໆໄດ້ຮັບຜົນປະໂຫຍດໃນການຮ່ວມມື,ຈໍ່ຕົວຂຶ້ນເປັນສະພາບການຮ່ວມມືທີ່ຕ່າງຝ່າຍຕ່າງມີຜົນປະໂຫຍດແລະເພິ່ງພາກັນ.ຕ້ອງສ້າງປະຊາຄົມຮ່ວມ ຊະຕາກຳດຽວກັນແບບໃໝ່ທີ່ສາມາດພັດທະນາພ້ອມກັນໃນເວລາມີຄວາມສະຫງົບແລະຮັບມືພ້ອມກັນໃນເວລາເກີດມີວິກິດການ.
ໃນກອງປະຊຸມ,ທ່ານເວີ່ນເຈ່ຍປາວຍັງໄດ້ບັນລະຍາຍເສັ້ນທາງພັດທະນາໂດຍສັນຕິຂອງຈີນ,ກ່າວເນັ້ນວ່າ,ການພັດທະນາແມ່ນໜ້າທີ່ໃຈກາງຂອງຈີນ.ຈີນຈະເປີດກວ້າງການຄ້າ ການລົງທຶນແລະການຊ່ວຍເຫຼືອຕໍ່ປະເທດອາຊີຕື່ມອີກ,ເຮັດໃຫ້ຜົນປະໂຫຍດຂອງຈີນແລະຂອງປະເທດອາຊີຕິດພັນກັນຢ່າງແໜ້ນແຟ້ນກວ່າເກົ່າ.
ໃນເວລາເວົ້າເຖິງຂົງເຂດພະລັງງານ,ທ່ານເວີ່ນເຈ່ຍປາວຊີ້ອອກວ່າ,ການແກ້ໄຂບັນຫາຄວາມໝັ້ນຄົງດ້ານພະລັງງານໃຫ້ດີນັ້ນ,ຕ້ອງສ້າງແລະປະຕິບັດທັດສະນະຄວາມປອດໄພດ້ານພະລັງງານອັນໃໝ່ທີ່ຮ່ວມມືກັນຢ່າງຕ່າງຝ່າຍຕ່າງມີຜົນປະໂຫຍດ ພັດທະນາແບບຫຼາຍເຄົ້າແລະປະສານງານເພື່ອການຮັບປະກັນ.
ກ່ອນກອງປະຊຸມສຸດຍອດອັດລົງ, 10 ປະເທດຂອງອາຊຽນແລະຈີນ ຍີ່ປຸ່ນ ສ.ເກົາຫຼີ ອິນເດຍ ອົສຕຼາລີ ນູແວນເຊລັງໄດ້ເຊັນ"ຖະແຫຼງການເຊບູວ່າດ້ວຍຄວາມໝັ້ນຄົງດ້ານພະລັງງານອາຊີຕາເວັນອອກ".
|
