|
ຕາມຂ່າວສານຊິນຮວາ:ວັນທີ30ມັງກອນນີ້,ເວທີປຶກສາຫາລືການທ່ອງທ່ຽວອາຊຽນຄັ້ງທີ26ໄດ້ໄຂຂຶ້ນຢູ່ສິງກະໂປ.ເຈົ້າໜ້າທີ່ຂະແໜງການທ່ອງທ່ຽວຂອງ10ປະເທດອາຊຽນກັບຈີນ,ຍີ່ປຸ່ນແລະສ.ເກົາຫຼີ ພ້ອມທັງບຸກຄົນສຳຄັນໃນອຸດສາຫະກຳການທ່ອງທ່ຽວໄດ້ພ້ອມກັນຫາລືມາດຕະການທີ່ຊຸກຍູ້ການທ່ອງທ່ຽວພາກພື້ນເຊື່ອມໂຍງເຂົ້າ ກັນ.
ໃນທິທີໄຂງານ,ທ່ານໂກຈົກຕົງ ທີ່ປຶກສາແຫ່ງລັດສິງກະໂປໄດ້ຮຽກຮ້ອງໃຫ້ປະເທດຕ່າງໆຂອງອາຊຽນຈົ່ງເປີດຕະຫຼາດການບິນຕື່ມອີກ,ບັນລຸການເຮັດວິຊາເທື່ອດຽວໃນພາກພື້ນ,ແລະເພິ່ມທະວີການສ້າງສາພື້ນຖານໂຄງລ່າງການທ່ອງທ່ຽວ,ເພື່ອຊຸກຍູ້ອຸດສາຫະກຳການທ່ອງທ່ຽວຂອງອາຊຽນເຊື່ອມໂຍງເຂົ້າກັນ.ທ່ານຍັງໄດ້ຮຽກຮ້ອງໃຫ້ປະເທດຕ່າງໆຂອງອາຊຽນເພິ່ມການຮ່ວມມືດ້ານການທ່ອງທ່ຽວກັບຈີນ,ຍີ່ປຸ່ນ,ສ.ເກົາຫຼີ,ອິນເດຍ,ແລະຣັດເຊຍ,ເພື່ອຊຸກຍູ້ເສດຖະກິດໃຫ້ພັດທະນາ.
ມື້ດຽວກັນ,ໃນກອງປະຊຸມຂ່າວ,ທ່ານອິສວາຣັນ ເຈົ້າໜ້າທີ່ລະດັບສູງຂອງກະຊວງການຄ້າແລະອຸດສາຫະກຳສິງກະໂປເວົ້າວ່າ,ລັດຖະມົນຕີທີ່ໄດ້ເຂົ້າຮ່ວມກອງປະຊຸມລະດັບລັດຖະມົນຕີຂອງເວທີປຶກສາຫະລືອາຊຽນໃນວັນທີ29ມັງກອນນີ້ເປັນເອກະສັນເຫັນວ່າ,ຈະໃຊ້ມາດຕະການຕື່ມອີກເພື່ອບັນລຸການຍົກເວັ້ນວິຊາພາຍໃນອາຊຽນ,ແລະເຮັດໃຫ້ການຂໍວິຊາຂອງນັກທ່ອງທ່ຽວທີ່ບໍ່ແມ່ນຄົນຂອງປະເທດອາຊຽນສະດວກຂຶ້ນກວ່າເກົ່າ,ເພື່ອເພິ່ມການດູດດຶງການທ່ອງທ່ຽວຂອງພາກພື້ນອາຊຽນ.
ວັນທີ30ມັງກອນນີ້,ລັດຖະມົນຕີທ່ອງທ່ຽວຂອງປະເທດອາຊຽນກັບເຈົ້າໜ້າທີ່ຂະແໜງການທ່ອງທ່ຽວຈີນ,ຍີ່ປຸ່ນແລະສ.ເກົາຫຼີໄດ້ຈັດກອງປະຊຸມອາຊຊຽນ+3,ຫາລືຊຸກຍູ້ການຮ່ວມມືດ້ານການທ່ອງທ່ຽວຂອງອາຊີຕາເວັນອອກ.ທ່ານກູ້ຈ່າວຊີ່ ຮອງຫົວໜ້າກົມທ່ອງທ່ຽວແຫ່ງຊາດຈີນທີ່ຮ່ວມປະຊຸມກ່າວຕໍ່ນັກຂ່າວຂ່າວສານຊິນຮວາວ່າ,ໃນກອງປະຊຸມ,ຈີນໄດ້ໃຫ້ຄຳໝັ້ນສັນຍາຈະເລັ່ງລັດສ້າງສູນຊຸກຍູ້ການຄ້າຈີນ-ອາຊຽນ,ການລົງທຶນແລະການທ່ອງທ່ຽວ,ແລະກ່າວວ່າຈະຕັ້ງໂຄງການອົບຮົມນັກວິຊາການທ່ອງທ່ຽວໃຫ້ປະເທດຕ່າງໆຂອງອາຊຽນ.ຍີ່ປຸ່ນແລະສ.ເກົາຫຼີກໍ່ໄດ້ປະກາດມາດຕະການທີ່ເພິ່ມທະວີການຮ່ວມມືດ້ານການທ່ອງທ່ຽວກັບອາຊຽນ.
ບຸກຄົນໃນວົງການທ່ອງທ່ຽວ1600ກວ່າຄົນຂອງ50ກວ່າປະເທດໄດ້ເຂົ້າຮ່ວມເວທີປຶກສາຫາລືຄັ້ງນີ້.
|
