|
|
 |
| (GMT+08:00)
2007-02-18 16:54:25
|
 |
|
ນາງຮີລາລີຮຽກຮ້ອງໃຫ້ທ່ານບຸສເລີ່ມຖອນທະຫານພາຍໃນ 90 ມື້
cri
Author: mo
ຕາມຂ່າວສານຊີນຮວາ: ວັນທີ 17 ກຸມພານີ້, ນາງຮິລາລີ ໂຣດຮາມ ຄຼິນຕັນ ສະມາຊິກສະພາສູງສັງກັດພັກປະຊາທິປະໄຕອາເມລິກາໄດ້ປະກາດວີດີໂອຕອນໜຶ່ງຢູ່ເວັບໄຊຂອງຕົນ, ໂດຍກ່າວວ່າ, ແຜນການສົ່ງທະຫານໄປເພີ່ມຢູ່ອີຣັກຂອງທ່ານຈອດ ບຸສທີ່ປະກາດໃນວັນທີ 10 ມັງກອນນີ້ແມ່ນຢາກສົ່ງທະຫານອາເມລິກາຫຼາຍກວ່າເກົ່າໄປປະຕິບັດນະໂຍບາຍລາຍໜຶ່ງທີ່ມີຂໍ້ບົກຜ່ອງຕ່າງໆ, ບໍ່ມີຄວາມໝາຍໃດໆ. ນາງຮີລາລີສະເໜີໃນຍັດຕິວ່າ, ຄວນຮັກສາຈຳນວນທະຫານອາເມລິກາທີ່ປະຈຳຢູ່ອີຣັກຢູ່ໃນລະດັບວັນທີ 1 ມັງກອນປີນີ້. ພ້ອມກັນນັ້ນ, ອາເມລິກາຄວນເລີ່ມຖອນທະຫານອອກຈາກອີຣັກພາຍໃນ 90 ມື້. ຖ້າບໍ່ດັ່ງນັ້ນ, ລັດຖະສະພາກໍ່ຄວນຍົກເລີກສິດອຳນາດທີ່ໃຫ້ລັດຖະບານບຸສກໍ່ສົງຄາມອີຣັກໃນເດືອນຕຸລາປີ 2002.
ນອກນີ້, ຂ່າວແຈ້ງວ່າ, ວັນທີ 17 ກຸມພານີ້, ນາງຄອນໂດຣີຊາ ໄລສ໌ ລັດຖະມົນຕີວ່າການກະຊວງການຕ່າງປະເທດອາເມລິກາທີ່ພວມຢ້ຽມຢາມແບກແດກ ນະຄອນຫຼວງອີຣັກໄດ້ໃຫ້ສຳພາດຕໍ່ສື່ມວນຊົນຢູ່ແຫ່ງນັ້ນວ່າ, ທະຫານອາເມລິກາປະຈຳອີຣັກແລະກອງທະຫານຮັກສາຄວາມປອດໄພຂອງອີຣັກດຳເນີນການເຄື່ອນໄຫວທາງການທະຫານຢູ່ແບກແດກນັ້ນ ແມ່ນສຳຄັນທີ່ສຸດຕໍ່ການປົວແປງສະຖານະການອີຣັກ, ແຜນການຄວາມປອດໄພສະບັບໃໝ່ທີ່ອາເມລິກາກັບອີຣັກຮ່ວມກັນປະຕິບັດຢູ່ແບກແດກຈະປະຕິບັດຕໍ່ໄປແລະຈະໄດ້ຮັບການເພີ່ມທະວີຂຶ້ນ.
ໃນມື້ດຽວກັນທີ່ນາງໄລສ໌ຢ້ຽມຢາມອີຣັກຢ່າງກະທັນຫັນ, ເມືອງຄີນຄຸກ ເມືອງສຳຄັນດ້ານນ້ຳມັນເຊື້ອໄຟທີ່ຢູ່ພາກເໜືອອີຣັກໄດ້ເກີດເຫດການລະເບີດລົດຍົນ, ຢ່າງໜ້ອຍເຮັດໃຫ້ 10 ຄົນເສຍຊີວິດ, 60 ຄົນບາດເຈັບ.
|
|
|
