|
ຕາມຂ່າວCRI:ວັນທີ27ກຸມພານີ້,ນາງຄອນໂດລີຊາ ໄຣສ໌ ລັດຖະມົນຕີວ່າການກະຊວງການຕ່າງປະເທດອາເມລິກາກ່າວວ່າ,ອາເມລິກາເຫັນວ່າ,ການແກ້ໄຂບັນຫາອີຣັກຕ້ອງການການສະໜັບສະໜູນປະເທດໃກ້ຄຽງຂອງອີຣັກ.ມື້ດຽວກັນ,ອີຣັກໄດ້ເກີດເຫດການລະເບີດຫຼາຍເທື່ອ,ເຮັດໃຫ້ມີຫຼາຍສິບຄົນເສຍຊີວິດຫຼືບາກເຈັບ.
ມື້ດຽວກັນ,ກະຊວງການຕ່າງປະເທດອາເມລິກາໄດ້ແຈກຢາຍໃບກ່າວຄຳປາຖະກະຖາຢູ່ສະພາສູງຂອງນາງໄຣສ໌.ໃນບົດປາຖະກະຖາ,ນາງໄຣສ໌ເວົ້າວ່າ,ອາເມລິກາ,ອີຣານແລະຊີຣີຈະເຂົ້າຮ່ວມກອງປະຊຸມສາກົນທີ່ແນໃສ່ຊຸກຍູ້ອີຣັກບັນລຸສະຖຽນລະພາບທີ່ຈະຈັດຂຶ້ນຢູ່ແບັກແດັດໃນກາງເດືອນມີນາປີນີ້.ນາງຫວັງໃຫ້ປະເທດທີ່ກ່ຽວຂ້ອງກຳເອົາໂອກາດເທື່ອນີ້,ປັບປຸງການພົວພັນກັບອີຣັກ,ປະກອບສ່ວນເຂົ້າໃນສັນຕິພາບແລະສະຖຽນລະພາບຂອງພາກພື້ນ.
ກ່ອນໜ້ານີ້,ລັດຖະບານບຸສຂວ້ຳບາດຂໍ້ສະເໜີກ່ຽວກັບການຈັດເອົາອີຣານແລະຊີຣີເຂົ້າໃນການເຈລະຈາທາງການທູດກ່ຽວກັບບັນຫາອີຣັກຂອງລັດຖະສະພາແຫ່ງຊາດແລະໜ່ວຍຄົ້ນຄວ້າບັນຫາອີຣັກທີ່ຮັບຜິດຊອບການປະເມີນນະໂຍບາຍຕໍ່ອີຣັກຂອງອາເມລິກາໂດຍຕະຫຼອດ.ສື່ມວນຊົນອາເມລິກາເຫັນວ່າ,ການກ່າວຄຳປາໄສຂອງນາງໄຣສ໌ດັ່ງກ່າວະສະແດງໃຫ້ເຫັນວ່າ,ຫຼັກໝັ້ນຂອງລັດຖະບານບຸສໄດ້ມີການປ່ຽນແປງແລ້ວ.
|
