|
ນາຍົກລັດຖະມົນຕີອີຣັກຮຽກຮ້ອງໃຫ້ທະຫານອາເມລິກາເຊົາສ້າງກຳແພງຂັ້ນຢູ່ພາກເໜືອແບກແດກ
cri
Author: mo
ຕາມຂ່າວCRI: ວັນທີ 22 ເມສານີ້, ຢູ່ທີ່ເລີແກ່, ທ່ານນູລີ ອານ ມາລີຄີ ນາຍົກລັດຖະມົນຕີອີຣັກທີ່ພວມຢ້ຽມຢາມເອຢິບກ່າວວ່າ, ທ່ານໄດ້ຮຽກຮ້ອງໃຫ້ທະຫານອາເມລິກາເຊົາສ້າງກຳແພງຂັ້ນຢູ່ພາກເໜືອແບກແດກ.
ກາງເດືອນເມສານີ້, ທະຫານອາເມລິກາປະຈຳອີຣັກໄດ້ປະກາດວ່າ ພວມສ້າງກຳແພງຂັ້ນຊີມັງຍາວ 5 ກິໂລແມັດ ສູງ3,6 ແມັດຢູ່ເຂດມຸສລິມນິກາຍຊຸນີ່ເຕົ້າໂຮມກັນຢູ່ພາກເໜືອແບກແດກ, ແລະກ່າວວ່າ, ນີ້ແມ່ນເພື່ອປ້ອງກັນບໍ່ໃຫ້ຊາວເມືອງຖືກຫຼອນໂຈມຕີ. ການກະທຳຂອງທະຫານອາເມລິກາໄດ້ຖືກຊາວເມືອງຢູ່ແຫ່ງນັ້ນແລະບຸກຄົນວົງການການເມືອງອີຣັກຄັດຄ້ານ, ເພາະເຫັນວ່າ, ການສ້າງກຳແພງຂັ້ນຈະເພີ່ມຄວາມຂັດແຍ່ງກັນລະຫວ່າງນິກາຍຕ່າງໆຫຼາຍຂຶ້ນ.
ມື້ດຽວກັນ, ພາຍຫຼັງທ່ານນາເຊັຟ ນາຍົກລັດຖະມົນຕີເອຢິບພົບປະກັບທ່ານມາລີຄີ ທີ່ພວມຢ້ຽມຢາມເອຢິບແລ້ວກ່າວເນັ້ນວ່າ, ເອຢິບສະໜັບສະໜູນລັດຖະບານອີຣັກທຳຄວາມພະຍາຍາມເພື່ອບັນລຸຄວາມປອງດອງກັນລະຫວ່າງຝ່າຍຕ່າງໆຂອງອີຣັກ, ກ່າວປະນາມການກະທຳຂອງລັດທິກໍ່ການຮ້າຍທີ່ທຳຮ້າຍຜູ້ທີ່ບໍ່ມີຄວາມຜິດຫຍັງ.
ນອກນີ້, ວັນທີ 22 ເມສານີ້, ເຈົ້າໜ້າທີ່ຕຳຫຼວດອີຣັກກ່າວວ່າ, ກຳມະກອນຂອງໂຮງງານຕຳແຜ່ນແຫ່ງໜຶ່ງຢູ່ພາກໃຕ້ເມືອງມໍຊູນເລີກການແລ້ວຂີ່ລົດກັບບ້ານ, ຢູ່ກາງທາງຖືກກຳລັງປະກອບອາວຸດທີ່ບໍ່ຊາບຝ່າຍດັກໂຈມຕີ, ເຮັດໃຫ້ 21 ຄົນເສຍຊີວິດ.
|
|
