|
ລັດຖະມົນຕີກະຊວງການຕ່າງປະເທດຈີນກ່າວເນັ້ນວ່າ, ຄວາມສາມັກຄີ, ຄວາມໝັ້ນຄົງແລະການພັດທະນາແມ່ນໜ້າທີ່ຕົ້ນຕໍ 3 ຢ່າງຂອງການແກ້ໄຂບັນຫາອີຣັກ
cri
ຕາມຂ່າວ CRI: ວັນທີ 4 ພຶດສະພານີ້, ທ່ານຢາງເຈຊຶ ລັດຖະມົນຕີກະຊວງການຕ່າງປະເທດຈີນກ່າວຄຳປາໄສໃນກອງປະຊຸມຂະຫຍາຍສ່ວນຂອງກອງປະຊຸມລັດຖະມົນຕີການຕ່າງປະເທດຂອງປະເທດອ້ອມແອ້ມອີຣັກທີ່ຈັດຂຶ້ນຢູ່ເມືອງຊາມເອນ ເຊອິກຂອງເອຢິບ, ທ່ານກ່າວເນັ້ນວ່າ, ຄວາມສາມັກຄີ, ຄວາມໝັ້ນຄົງແລະການພັດທະນາແມ່ນໜ້າທີ່ຕົ້ນຕໍ 3 ຢ່າງທີ່ການແກ້ໄຂບັນຫາອີຣັກປະເຊີນໜ້າກັບໃນປະຈຸບັນ, ໃນນັ້ນ, ຄວາມສາມັກຄີແມ່ນຂໍກະແຈ.
ທ່ານຢາງເຈຊຶກ່າວວ່າ, ຊົນເຜົ່າແລະຝ່າຍສາສະໜາຕ່າງໆຂອງອີຣັກຄວນເພີ່ມທະວີການສົນທະນາ, ຊຸກຍູ້ຄວາມປອງດອງກັນ, ຮັບປະກັນໃຫ້ໝົດທຸກຄົນເຂົ້າຮ່ວມຊີວິດການເມືອງ, ແບ່ງປັນຊັບສິນຢ່າງສະເໝີພາບກັນ. ປະຊາຄົມໂລກຄວນປະຕິບັດຕາມຄຳໝັ້ນສັນຍາກ່ຽວກັບການສ້າງສາອີຣັກຄືນໃໝ່ຢ່າງແທ້ຈິງ, ເສີມຂະຫຍາຍບົດບາດອັນສຳຄັນຂອງສະຫະປະຊາຊາດເທົ່າທີ່ຄວນ. ທ່ານເວົ້າວ່າ, ຈີນເດັດດ່ຽວສະໜັບສະໜູນອະທິປະໄຕ, ເອກະລາດແລະດິນແດນອັນຄົບຖ້ວນຂອງອີຣັກ, ມີເຈດຈຳນົງໃຫ້ແກ້ໄຂການຂັດແຍ່ງກັນລະຫວ່າງຝ່າຍຕ່າງໆດ້ວຍວິທີສັນຕິພາບ, ປະຊາທິປະໄຕໂດຍຜ່ານຂະບວນການການເມືອງ.
ທ່ານຢາງເຈິຊຶກ່າວວ່າ, ຈີນເອົາໃຈໃສ່ນຳການຂະຫຍາຍການພົວພັນກັບອີຣັກ. ຝ່າຍຈີນຍິນດີພ້ອມກັນກັບປະຊາຄົມໂລກ, ສືບຕໍ່ເສີມຂະຫຍາຍບົດບາດທີ່ມີລັກສະນະສ້າງສັນເພື່ອໃຫ້ອີຣັກບັນລຸຄວາມໝັ້ນຄົງແລະການພັດທະນາ.
|
|
