|
ຕາມຂ່າວCRI,ວັນທີ28ພຶດສະພານີ້,ຢູ່ແບັກແດດ ນະຄອນຫຼວງອີຣັກ, ອາເມລິກາແລະອີຣານໄດ້ຈັດການເຈລະຈາກ່ຽວກັບບັນຫາອີຣັກຢ່າງເປັນທາງການເປັນເວລາ4ຊົ່ວໂມງ.
ໃນງານຖະແຫຼງຂ່າວທີ່ຈັດຂຶ້ນພາຍຫຼັງການເຈລະຈາ,ທ່ານຣີອານ ໂຄຼເຄີ ເອກອັກຄະລັດຖະທູດອາເມລິກາປະຈຳອີຣັກກ່າວວ່າ,ການເຈລະຈາໄດ້ດຳເນີນໄປຢ່າງຕັ້ງໜ້າ,ສອງຝ່າຍໄດ້ມີຄວາມເຫັນເປັນເອກະສັນກັນຢ່າງກວ້າງຂວາງໃນດ້ານນະໂຍບາຍຕໍ່ອີຣັກ.ຜ່ານຈາກການເຈລະຈາ,ອາເມລິກາໄດ້ຮັບຮູ້ນະໂຍບາຍຂອງອີຣານທີ່ມີຕໍ່ອີຣັກ,ທ່ານຫວັງໃຫ້ອີຣານໃຊ້ການເຄື່ອນໄຫວຕົວຈິງຜັນຂະຫຍາຍນະໂຍບາຍເຫຼົ່ານີ້.ທ່ານໂຄຼເຄີຍັງເຜີຍໃຫ້ຮູ້ວ່າ,ໃນການເຈລະຈາ,ອີຣານໄດ້ວາງຂໍ້ສະເໜີອັນຕັ້ງໜ້າກ່ຽວກັບການສ້າງກົນໄກສາມຝ່າຍຄືອາເມລິກາ,ອີຣານແລະອີຣັກກ່ຽວກັບບັນຫາຄວາມປອດໄພຂອງອີຣັກ.
ໃນການເຈລະຈາ,ທ່ານຮາຊັນ ຄາຊີມີ ໂຄມີ ເອກອັກຄະລັດຖະທູດອີຣານປະຈຳອີຣັກກ່າວເນັ້ນວ່າ,ອີຣານສະໜັບສະໜູນປະຊາຊົນແລະລັດຖະບານອີຣັກຢ່າງໝັ້ນໜຽວໃນດ້ານຕ່າງໆເຊັ່ນການເມືອງ,ເສດຖະກິດແລະຄວາມປອດໄພເປັນຕົ້ນ,ເຄົາລົບຜືນແຜ່ນດິນອັນຄົບຖ້ວນຂອງອີຣັກ, ຈະບໍ່ແຊກແຊງວຽກງານພາຍໃນຂອງອີຣັກຢ່າງເດັດດ່ຽວ,ສະໜັບສະໜູນອີຣັກທຳຄວາມພະຍາຍາມເພື່ອສ້າງສາຄວາມໝັ້ນຄົງຄືນໃໝ່.
ນອກນີ້, ຂ່າວແຈ້ງວ່າ,ກ່ອນການເຈລະຈາ,ທ່ານນູຣີ ອານ ມາລີຄີ ນາຍົກລັດຖະມົນຕີອີຣັກກ່າວວ່າ,ຫວັງໃຫ້ການເຈລະຈາລະຫວ່າງອາເມລິກາກັບອີຣານກາຍເປັນບາດກ້າວສຳຄັນທີ່ຊຸກຍູ້ຄວາມປອດໄພແລະສະຖຽນລະພາບຂອງພາກພື້ນແຫ່ງນີ້,ແລະແຜ້ວທາງໃຫ້ແກ່ການເຈລະຈາຫຼາຍກວ່າເກົ່າເພື່ອແກ້ໄຂວິກິດການອີຣັກ.
|
