|
|
 |
| (GMT+08:00)
2007-09-24 16:35:32
|
 |
|
ກອງປະຊຸມສີ່ຝ່າຍກ່ຽວກັບບັນຫາຕາເວັນອອກກາງສະໜັບສະໜູນການເຈລະຈາສັນຕິພາບປາເລັສຕິນອິສຣາແອນ
cri
ຕາມຂ່າວCRI,ຕອນບ່າຍວັນທີ23ກັນຍານີ້,ສີ່ຝ່າຍກ່ຽວກັບບັນຫາຕາເວັນອອກກາງຄືສະຫະປະຊາຊາດ ສະຫະພາບເອີລົບ ຣັດເຊຍແລະອາເມລິກາໄດ້ຈັດກອງປະຊຸມຢູ່ສຳນັກງານໃຫຍ່ສະຫະປະຊາຊາດທີ່ນີວຢອກ.ໃນຖະແຫຼງການທີ່ເປີດເຜີຍຫຼັງກອງປະຊຸມ,ສີ່ຝ່າຍດັ່ງກ່າວກ່າວວ່າ,ສະໜັບສະໜູນການເຈລະຈາສັນຕິພາບລະຫວ່າງຜູ່ນຳອິສຣາແອນກັບປາເລັສຕິນທີ່ພວມດຳເນີນຢູ່ໃນປັດຈຸບັນ.
ໃນກອງປະຊຸມດັ່ງກ່າວ,ຜູ່ແທນຂອງສີ່ຝ່າຍຄືທ່ານບານກີມູນເລຂາທິການໃຫຍ່ສະຫະປະຊາຊາດ,ທ່ານຈາເວຍ ໂຊລານາ ຜູ່ແທນຊັ້ນສູງທີ່ຮັບຜິດຊອບນະໂຍບາຍການຕ່າງປະເທດແລະຄວາມປອດໄພຂອງສະຫະພາບເອີລົບ,ນາງຄອນໂດລີຊາ ໄລສ໌ ລັດຖະມົນຕີວ່າການກະຊວງການຕ່າງປະເທດອາເມລິກາແລະທ່ານເຊີເກ ລັຟຣົຟ ຜູ່ວ່າການແທນລັດຖະມົນຕີການຕ່າງປະເທດຣັດເຊຍໄດ້ປຶກສາຫາລືບັນຫາປາເລັສຕິນອິສຣາແອນແລະໄດ້ຮັບຟັງທ່ານໂທນີ ແບຼ ທູດພິເສດບັນຫາຕາເວັນອອກກາງ ອະດີດນາຍົກລັດຖະມົນຕີອັງກິດແນະນຳສະຖານະການພາກພື້ນຕາເວັນອອກກາງ.
ພາຍຫຼັງກອງປະຊຸມ,ຜູ່ແທນສີ່ຝ່າຍໄດ້ອອກຖະແຫຼງການ,ເດັດດ່ຽວສະໜັບສະໜູນການເຈລະຈາລະຫວ່າງທ່ານເອຮຸດ ໂອນເມີດ ນາຍົກລັດຖະມົນຕີອິສຣາແອນກັບທ່ານມາຣມຸດ ອັບບາສ ປະທານອົງການອຳນາດແຫ່ງຊາດປາເລັສຕິນທີ່ພວມດຳເນີນຢູ່ໃນປັດຈຸບັນ,ສະໜັບສະໜູນສອງຝ່າຍສ້າງຕັ້ງໜ່ວຍງານເພື່ອປຶກສາຫາລືບັນຫາພື້ນຖານທີ່ກ່ຽວກັບການບັນລຸແຜນການສອງປະເທດ.
ຖະແຫຼງການຍັງກ່າວວ່າ,ສະໜັບສະໜູນຂໍ້ສະເໜີຂອງທ່ານຈອດຈ໌ ບຸສ ປະທານາທິບໍດີອາເມລິກາທີ່ສະເໜີໃນເດືອນກໍລະກົດທີ່ຜ່ານມາ ຄືສະເໜີໃຫ້ຈັດກອງປະຊຸມສາກົນກ່ຽວກັບບັນຫາຕາເວັນອອກກາງຢູ່ອາເມລິກາໃນລະດູໃບໄມ້ຫຼົ່ນປີນີ້.ຫວັງວ່າທີ່ປະຊຸມຈະມີເນື້ອໃນທີ່ມີລັກສະນະທາດແທ້.
|
|
|
