|
ຈີນຮຽກຮ້ອງໃຫ້ອົງການUNHCRເສີມຂະຫຍາຍບົດບາດຫຼາຍກວ່າເກົ່າໃນດ້ານປົກປ້ອງຊາວອົບພະຍົບໃນທົ່ວໂລກ
cri
ຕາມຂ່າວCRI,ໃນກອງປະຊຸມຄະນະບໍລິຫານງານຂອງອົງການຂ້າຫຼວງໃຫຍ່ສະຫະປະຊາຊາດເພື່ອຊາວອົບພະຍົບຫຼືUNHCR ທີ່ຈັດຂຶ້ນຢູ່ນີວຢອກໃນວັນທີ3ຕຸລານີ້,ທ່ານລ້າຢີ້ຟານ ຫົວໜ້າຄະນະຜູ່ແທ່ນຈີນໄດ້ປະກອບຄຳຄິດຄຳເຫັນ,ຮຽກຮ້ອງໃຫ້ UNHCRເສີມຂະຫຍາຍບົດບາດຫຼາຍກວ່າເກົ່າໃນດ້ານປົກປ້ອງຊາວອົບພະຍົບທົ່ວໂລກ,ຊ່ວຍເຫຼືອປະເທດພວມພັດທະນາເສີມສ້າງຄວາມສາມາດສັງລວມຢ່າງແທ້ຈິງ,ສະແຫວງຫາວິທີແກ້ໄຂບັນຫາຊາວອົບພະຍົບຢ່າງເຖິງຖອງ.
ທ່ານລ້າຢີ້ຟານ ກ່າວວ່າ,ປັດຈຸບັນ,ຍອດຈຳນວນຊາວອົບພະຍົບໃນທົ່ວໂລກມີເກືອບ10ລ້ານຄົນ,ປີກາຍນີ້,ຈຳນວນຊາວອົບພະຍົບທີ່ໄດ້ຮັບການຊ່ວຍເຫຼືອຈາກ UNHCRເມື່ອທຽບກັບປີ2005ໄດ້ຫຼຸດລົງ3%,ເຊິ່ງກວມຍອດຈຳນວນຊາວອົບພະຍົບພຽງ45%ເທົ່ານັ້ນ.ຈີນເອົາໃຈໃສ່ໃນລະດັບສູງຕໍ່ສະພາບການທີ່ຈຳນວນຊາວອົບພະຍົບເພີ່ມຂຶ້ນຢ່າງຫຼວງຫຼາຍ,ຮຽກຮ້ອງໃຫ້UNHCRເພີ່ມການປົກປ້ອງຊາວອົບພະຍົບ,ວາງຍຸດທະສາດແລະມາດຕະການປົກປ້ອງຊາວອົບພະຍົບ.
ທ່ານລ້າຢີ້ຟານກ່າວວ່າ,ໃນດ້ານປົກປ້ອງຊາວອົບພະຍົບ,ປະເທດພວມພັດທະນາໄດ້ຮັບຄວາມຫາບແບກດ້ານເສດຖະກິດແລະສັງຄົມອັນໜັກໜ່ວງ,ເຊິ່ງໄດ້ປົກປ້ອງຊາວອົບພະຍົບ3/4ຂອງທົ່ວໂລກ.ຈີນໄດ້ຕັ້ງໜ້າເຂົ້າຮ່ວມການຮ່ວມມືສາກົນ,ແລະຕັ້ງໃຈປະຕິບັດພັນທະສາກົນ.
|
|
