ຕາມ​ຂ່າວສານ​ຊິນຮວາ, ​ເວລາ17​ໂມງ22ນາ​ທີ ວັນ​ທີ10​ຕຸລາ​ນີ້ ຕາມ​ເວ​ລາ​ມົສ​ກູ,​ທ່ານ​ເຊັກ​ມູ​ຊາ​ຟາ​ຊູ​ກໍ ນັກ​ບິນ​ອະວະກາດ​ຜູ່​ທຳ​ອິດ​ຂອງ​ມາ​ເລ​ເຊຍ​ພ້ອມ​ກັບ​ນັກ​ບິນ​ອະ​ວະ​ກາດ​ຣັດ​ເຊຍ​ແລະ​ອາ​ເມ​ລິ​ກາ​ສອງ​ຄົນ​ໄດ້​ຂີ່​ຍານ​ອະວະກາດ​ໂຊ​ຢູສ TMA-11​ຂອງ​ຣັດ​ເຊຍ​ຂຶ້ນ​ສູ່​ອະ​ວະ​ກາດ​ເພື່ອ​ໄປ​ສະຖານີ​ອະວະກາດ​ສາກົນ.

ຕາມ​ການຖ່າຍ​ທອດ​ສົດ​ຂອງ​ໂທລະພາບຣັດ​ເຊຍ,ການສົ່ງ​ຍານ​ອະວະກາດ​ດັ່ງກ່າວ​ແມ່ນ​ດຳ​ເນີນ​ຢູ່​ຖານ​ສົ່ງ​ຍານບາຍ​ໂຄ​ໂນທີ່​ຢູ່​ໃນ​ດິນແດນ​ຂອງກາ​ຊັກ​ສະຖານ.ທ່ານ​ຢູຣີ ມາ​ເລັນ​​ເຊັນ​ໂຄ ນັກ​ບິນ​ອະ​ວະ​ກາດຣັດ​ເຊຍ​ແລະ​ນາງ​ເປ​ກີ ວິ​ດຊັນ ນັກ​ບິນ​ອະວະກາດ​ອາ​ເມ​ລິ​ກາ​ທີ່​ຂີ່​ຍານ​ອະ​ວະ​ກາດ​ດັ່ງ​ກ່າວ​ແມ່ນ​ສະມາຊິກ​ໜ່ວຍ​ສຳ​ຫຼວດ​ໄລຍະ​ຍາວໜ່ວຍ​ທີ16​ຂອງ​ສະຖານີ​ອະ​ວະ​ກາດ​ສາກົນ,​ເຂົາ​ເຈົ້າ​ຈະ​ເຮັດ​ວຽກ​ເຄິ່ງປີ​ໃນ​ສະຖານີ​ອະວະກາດ​.ສ່ວນນັກ​ບິນ​ອະວະກາດ​ຜູ່​ທຳ​ອິດ​ຂອງ​ມາ​ເລ​ເຊຍ ຈະ​ເຮັດ​ວຽກ​ເປັນ​ເວລາ11​ມື້​ໃນ​ສະ​ຖາ​ນີ​ອະ​ວະ​ກາ​ດ​ສາ​ກົນ,​ແລ້ວ​ພ້ອມ​ກັບ​ນັກ​ບິນ​ອະ​ວະ​ກາດ​ສອງ​ຄົນ​ຂອງ​ໜ່ວຍ​ສຳ​ຫຼວດ​ໄລ​ຍະ​ຍາວ​ໜ່ວຍ​ທີ​15​ຂອງ​ສະ​ຖາ​ນີ​ອະ​ວະ​ກາດ​ສາ​ກົນ​ກັບ​ຄືນ​ສູ່​ໂລກ.

ຄາດວ່າ, ຍານ​ອະວະກາດ​​ໂຊ​ຢູສ TMA-11ຂອງຣັດ​ເຊຍ​ຈະ​ເຊື່ອມ​ຕໍ່​ກັບ​ສະ​ຖາ​ນີ​ອະ​ວະ​ກາດ​ສາ​ກົນ​ໃນ​ເວລາ18​ໂມງ52​ນາທີ​ຂອງ​ວັນ​ທີ12​ເດືອນ​ນີ້.