|
ນາຍົກລັດຖະມົນຕີສິງກະໂປຮຽກຮ້ອງວົງການການຄ້າແລະລັດຖະບານອາຊຽນເພີ່ມທະວີການຮ່ວມມືຕື່ມອີກ
cri
Author: MO
ຕາມຂ່າວສານຊີນຮວາ: ວັນທີ 17 ພະຈິກນີ້, ທ່ານລີຊຽນລົງ ນາຍົກລັດຖະມົນຕີສິງກະໂປກ່າວວ່າ, ວົງການການຄ້າແລະລັດຖະບານຄວນສືບຕຕໍ່ເພີ່ມທະວີການຮ່ວມມື, ການພົວພັນຄູ່ຮ່ວມມືລະຫວ່າງສອງຝ່າຍຈະຮັດແໜ້ນການພົວພັນລະຫວ່າງປະເທດອາຊຽນຕື່ມອີກ, ເພີ່ມຄວາມສາມາດພັດທະນາ, ຮັບປະກັນໃຫ້ອາຊຽນກາຍເປັນກຳລັງແມ່ແຮງໃຫຍ່ທີ່ຊຸກຍູ້ການພັດທະນາຂອງເສດຖະກິດອາຊີ.
ໃນຖານະເປັນກອງປະຊຸມກະກຽມຂອງກອງປະຊຸມສຸດຍອດອາຊຽນທີ່ຈະໄຂຂຶ້ນ, ວັນທີ 17 ພະຈິກນີ້, ກອງປະຊຸມການຄ້າແລະການລົງທຶນອາຊຽນໄດ້ຈັດຂຶ້ນຢູ່ສິງກະໂປ. ໃນກອງປະຊຸມ, ທ່ານລີຊຽນລົງກ່າວຄຳປາໄສວ່າ, ອາຊຽນພວມເສີມຂະຫຍາຍບົດບາດນຳທາງໃນຂະບວນການເສດຖະກິດອາຊີຕາເວັນອອກເຊື່ອມໂຍງເຂົ້າກັນ. ປັດຈຸບັນ, ອາຊຽນໄດ້ປົກຫຸ້ມ 10 ປະເທດອາຊີອາຄະເນ, ໄດ້ຈໍ່ຕົວຂຶ້ນເປັນຕະຫຼາດໃຫຍ່ທີ່ມີປະຊາກອນ 500 ລ້ານກວ່າຄົນ GDPລວມເຂົ້າກັນຫຼາຍກວ່າ 500 ຕື້ໂດລາ. ນີ້ກໍແມ່ນກຳລັງແມ່ແຮງທີ່ສ້າງຕັ້ງປະຊາຄົມເສດຖະກິດອາຊຽນ, ເຊິ່ງກໍ່ຄືຕະຫຼາດດ່ຽວແລະແຫຼ່ງຜະລິດທີ່ສິນຄ້າ ການບໍລິການ ການລົງທຶນ ເຕັກນິກ ແລະແຮງງານສາມາດຈໍລະຈອນຢ່າງເສລີ.
|
|
