|
|
 |
| (GMT+08:00)
2007-11-29 18:13:49
|
 |
|
ຄະນະຜູ່ແທນເຈລະຈາຊາຍແດນລະຫວ່າງລັດຖະບານຈີນຫວຽດນາມຈັດການພົບປະລະດັບຫົວໜ້າຄະນະຜູ່ແທນ
cri
ຕາມຂ່າວສານຊິນຮວາ,ວັນທີ28ພະຈິກນີ້,ຢູ່ທີ່ໂຮໂນ້ຍ,ທ່ານອູຕ້າເວີຍ ລັດຖະມົນຕີຊ່ວຍວ່າການກະຊວງການຕ່າງປະເທດຈີນແລະທ່ານວູຢຸງ ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມໄດ້ຈັດການພົບປະລະດັບຫົວໜ້າຄະນະຜູ່ແທນການເຈລະຈາຊາຍແດນລະຫວ່າງລັດຖະບານຈີນຫວຽດນາມ,ສອງຝ່າຍເປັນເອກະສັນກັນເຫັນດີເລີ່ມຈາກດ້ານຍຸດທະສາດລວມສະພາບຕົວຈິງແຫ່ງການພົວພັນລະຫວ່າງສອງປະເທດແລະຜົນປະໂຫຍດຍາວນານ,ຜັນຂະຫຍາຍຄວາມຮັບຮູ້ທີ່ເປັນເອກະສັນກັນລະຫວ່າງຜູ່ນຳສອງປະເທດຢ່າງຈິງຈັງ,ຮ່ວມກັນປົກປັກຮັກສາສະຖຽນລະພາບຂອງທະເລຈີນໃຕ້.
ສອງຝ່າຍເຫັນດີເລັ່ງລັດການສຳຫຼວດວັດແທກ ຊາຍແດນທາງບົກໃຫ້ໄວຂຶ້ນ,ຮັບປະກັນການບັນລຸເປົ້າໝາຍທີ່ສຳເລັດວຽກງານສຳຫຼວດວັດແທກ ຊາຍແດນທັງໝົດໃນປີ2008ຕາມທີ່ຕົກລົງກັນລະຫວ່າງຜູ່ນຳສອງປະເທດ.ສອງຝ່າຍຍັງເຫັນດີເພີ່ມທະວີການຮ່ວມມືທີ່ຕິດແທດຕົວຈິງໃນຂົງເຂດຕ່າງໆເຊັ່ນການຮ່ວມກັນສຳຫຼວດຊັບພະຍາກອນການປະມົງອ່າວພາກເໜືອ,ສອງກອງທັບເຮືອຮ່ວມກັນລາດຕະເວນແລະສຳຫຼວດຂຸດຄົ້ນນ້ຳມັນເຊື້ອໄຟແລະອາຍແກັສຂ້າມຊາຍແດນເປັນຕົ້ນ,ຕັ້ງໜ້າປຶກສາຫາລືວຽກງານກ່ຽວກັບການຮ່ວມກັນພັດທະນາເຂດທະເລນອກປາກອ່າວພາກເໜືອ,ຮ່ວມກັນຊຸກຍູ້ວຽກງານເຕືອນໄພແຜ່ນດິນໄຫວທະເລທີ່ຈີນຫວຽດນາມຟິລິບປິນຮ່ວມມືກັນ.
ວັນທີ29ພະຈິກນີ້,ທ່ານຟານເກຍກຽມ ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຕ່າງປະເທດຫວຽດນາມໄດ້ພົບປະກັບທ່ານອູຕ້າເວີຍພ້ອມດ້ວຍຄະນະ.ສອງຝ່າຍໄດ້ໂອ້ລົມກັນທ່າມກາງບັນຍາກາດແຫ່ງໄມຕີຈິດ,ແລະເປັນເອກະສັນກັນເຫັນດີທຳຄວາມພະຍາຍາມພ້ອມກັນເພື່ອພັດທະນາການພົວພັນມິດຕະພາບແລະຮ່ວມມືກັນຖານບ້ານໃກ້ເຮືອນຄຽງທີ່ດີລະຫວ່າງສອງປະເທດ.
|
|
|
