|
ນາຍົກອິສຣາແອນສັ່ງໃຫ້ຫຼຸດການເຄື່ອນໄຫວທາງການທະຫານຢູ່ແຖບກາຊາ
cri
Author: MO
ຕາມຂ່າວCRI：ວັນທີ 10 ມີນານີ້, ເຈົ້າໜ້າທີ່ຂອງຫ້ອງການໂອເມີດ ນາຍົກລັດຖະມົນຕີອິສຣາແອນເປີດເຜີຍວ່າ, ທ່ານເອຮູດ ໂອເມີດໄດ້ຮຽກຮ້ອງໃຫ້ທະຫານອິສຣາແອນຫຼຸດການເຄື່ອນໄຫວຢູ່ແຖບກາຊາໃຫ້ໜ້ອຍລົງ.
ເຈົ້າໜ້າທີ່ທີ່ບໍ່ຢາກເຜີຍຊື່ຜູ້ນີ້ກ່າວວ່າ, ຫວ່າງມໍ່ໆນີ້, ການຫຼອນຍິງດ້ວຍຈະຫຼວດຂອງກອງປະກອບອາວຸດປາເລັສຕີນທີ່ມີຕໍ່ອິສຣາແອນຢູ່ແຖບກາຊານັ້ນໄດ້ຫຼຸດລົງຢ່າງເດັ່ນຊັດ, ເພື່ອເປັນການຕອບຮັບ, ທ່ານໂອເມີດໄດ້ຮຽກຮ້ອງໃຫ້ຝ່າຍທະຫານຫຼຸດການເຄື່ອນໄຫວ, ເຊົາໂຈມຕີທາງອາກາດແລະໜ້າດິນຕໍ່ເຂດນີ້, ສ້າງເງື່ອນໄຂໃຫ້ເອຢິບໄກ່ເກ່ຍລະຫວ່າງສອງຝ່າຍ.
ໃນຫຼາຍມື້ມານີ້, ທະຫານອິສຣາແອນເກືອບບໍ່ໄດ້ຫຼອນໂຈມຕີທາງອາກາດແລະໜ້າດິນຕໍ່ແຖບກາຊາ, ກອງປະກອບອາວຸດຂອງປາເລັສຕີນທີ່ຢູ່ແຖບກາຊາກໍ່ໄດ້ຫຼຸດການຫຼອນໂຈມຕີດ້ວຍຈະຫຼວດຕໍ່ອິສຣາແອນໃຫ້ໜ້ອຍລົງຢ່າງເດັ່ນຊັດ. ແຕ່ວ່າ, ເຈົ້າໜ້າທີ່ກະຊວງປ້ອງກັນປະເທດອິສຣາແອນແລະອົງການຕໍ່ຕ້ານອິສລາມປາເລັສຕີນຫຼືຮາມັສລ້ວນແຕ່ກ່າວວ່າ, ປັດຈຸບັນ, ອິສຣາແອນກັບຮາມັສບໍ່ໄດ້ຢຸດຍິງຢ່າງເປັນທາງການ.
|
|
