|
ຕາມຂ່າວCRI,ວັນທີ19ມີນານີ້,ຢູ່ທີ່ກະຊວງປ້ອງກັນປະເທດອາເມລິກາ,ທ່ານຈອດຈ໌ ບຸສ ປະທານາທິບໍດີອາເມລິກາໄດ້ກ່າວຄຳປາໄສເພື່ອລະລຶກວັນເກີດສົງຄາມອີຣັກຄົບຮອບ5ປີ.ທ່ານບຸສຍອມຮັບວ່າ,ສົງຄາມອີຣັກເຮັດໃຫ້ອາເມລິກາເສຍຄ່າຕອບແທນຢ່າງໜັກໜ່ວງ,ແຕ່ທ່ານກ່າວຢ້ຳວ່າ ບໍ່ມີແຜນທີ່ຈະປ່ຽນແປງນະໂຍບາຍຕໍ່ອີຣັກ.
ທ່ານບຸສກ່າວວ່າ,ແຜນການສົ່ງທະຫານໄປອີຣັກເພີ່ມຕື່ມທີ່ປະຕິບັດໃນປີກາຍນີ້ໄດ້ຮັບຜົນແລ້ວ,ສະນັ້ນ,ທ່ານຈະສືບຕໍ່ປະຕິບັດນະໂຍບາຍເດີມ,ຈົນເຖິງໄດ້ຮັບໄຊຊະນະຂັ້ນສຸດທ້າຍ.
ວັນທີ19ມີນານີ້,ຢູ່ວໍຊິງຕັນ,ຜູ່ສະແດງກຳລັງໃສ່ໜ້າກາກສະແດງກຳລັງກ່າວປະທ້ວງ
ນະໂຍບາຍຕໍ່ອີຣັກຂອງທ່ານບຸສ
ທ່າທີດັ່ງກ່າວຂອງທ່ານບຸສໄດ້ຖືກຝ່າຍຄັດຄ້ານສົງຄາມກ່າວໂຈມຕີຢ່າງຮຸນແຮງ.ວັນທີ19ມີນານີ້,ປະຊາຊົນຄັດຄ້ານສົງຄາມຂອງອາເມລິກາໄດ້ຈັດການສະແດງກຳລັງຢູ່ຕົວເມືອງສຳຄັນຕ່າງໆຂອງອາເມລິກາເຊັ່ນວໍຊິງຕັນ ນີວຢອກ ຊີອາໂຕ ຊານຟຼານຊິສໂກ ຊີກາໂກແລະອື່ນໆ,ຮຽກຮ້ອງໃຫ້ລັດຖະບານບຸສສິ້ນສຸດສົງຄາມໂດຍໄວເທົ່າທີ່ຈະໄວໄດ້,ຖອນທະຫານອອກຈາກອີຣັກ.ທະຫານອາເມລິກາຈຳນວນໜຶ່ງຍັງອີງໃສ່ປະສົບການຕົວຈິງໃນສົງຄາມຂອງຕົນເລົ່າຄວາມຈິງແລະຄວາມຊົ່ວຮ້າຍຂອງສົງຄາມຕໍ່ປະຊາຊົນໂດຍຜ່ານສື່ມວນຊົນ.
ວັນທີ19ມີນານີ້,ຢູ່ວໍຊິງຕັນ,ຜູ່ຄັດຄ້ານສົງຄາມຈັດການສະແດງກຳລັງປະທ້ວງລັດຖະບານ
ອາເມລິກາກໍ່ສົງຄາມອີຣັກ
ນອກນີ້,ຍັງມີຂ່າວແຈ້ງວ່າ,ຫວ່າງມໍ່ໆນີ້, ຜູ່ສະໝັກຮັບເລືອກຕັ້ງປະທານາທິບໍດີສອງຄົນຂອງພັກດີໂມແກຼັດອາເມລິກາຄື ທ່ານບາແລັກໂອບາມາແລະນາງຮິວລາຣີຄລິນຕັນ ຕ່າງໄດ້ກ່າວປາຖະກະຖາ,ຕິຕຽນທ່ານບຸສກໍ່ສົງຄາມອີຣັກ,ແລະສະແດງຄວາມເຫັນວ່າອາເມລິກາຄວນຖອນທະຫານອອກຈາກອີຣັກໂດຍໄວ.ໃນເວລາຢ້ຽມຢາມຕາເວັນອອກກາງໃນວັນທີ18ມີນານີ້,ທ່ານຈອນແມັກເຄນ ຜູ່ທີ່ໄດ້ຮັບການສະເໜີຊື່ເປັນຜູ່ສະໝັກຮັບເລືອກຕັ້ງປະທານາທິບໍດີຂອງພັກລີພັບປຼີກັນແນ່ນອນແລ້ວນັ້ນກ່າວວ່າ,ທ່ານຈະສືບທອດນະໂຍບາຍຕໍ່ອີຣັກຂອງທ່ານບຸສ,ຄັດຄ້ານການຖອນທະຫານອອກຈາກອີຣັກ.
1 2
|
