|
|
 |
| (GMT+08:00)
2008-05-07 16:06:11
|
 |
|
ປະຊາຄົມໂລກໃຫ້ການຊ່ວຍເຫລືອດ່ວນແກ່ມຽນມາ
cri
ຕາມຂ່າວ cri:ເມື່ອມຽນມາປະສົບໄພລົມພາຍຸແຖບຮ້ອນຢ່າງຮ້າຍແຮງແລະເຮັດໃຫ້ເສຍຫາຍຢ່າງຫນັກຫນ່ວງເມື່ອຫລາຍມື້ກ່ອນປະຊາຄົມໂລກໄດ້ທະຍອຍກັນປະກາດວ່າຈະໃຫ້ການຊ່ວຍເຫລືອດ່ວນແກ່ມຽນມາ.
ວັນທີ 6 ພຶດສະພານີ້ ທ່ານຊິນກາງ ໂຄສົກກະຊວງການຕ່າງປະເທດຈີນກ່າວວ່າ, ທ່ານຫູຈີນທາວ ປະທານປະເທດຈີນ ທ່ານເວີນເຈ່ຍປາວ ນາຍົກລັດຖະມົນຕີຈີນແລະທ່ານຢາງເຈຊື ລັດຖະມົນຕີວ່າການກະຊວງການຕ່າງປະເທດຈີນຕ່າງໄດ້ສົ່ງໂທລະເລກເຫັນໃຈໄປຍັງຄູ່ຮ່ວມຕຳແຫນ່ງຂອງມຽນມາເພື່ອສະແດງຄວາມເຫັນໃຈຢ່າງເລິກເຊິ່ງແລະຢື້ຢາມຖາມຂ່າວຢ່າງຈິງໃຈຕໍ່ລັດຖະບານແລະປະຊາຊົນມຽນມາ. ຈີນຍັງຈະໃຫ້ການຊ່ວຍເຫລືອດ່ວນທີ່ມີມູນຄ່າ 1 ລ້ານໂດລາ ລວມທັງເງິນສົດແລະວັດຖຸເຂົ້າຂອງງວດທຳອິດໃຫ້ມຽນມາ.
ວັນທີ 7 ພຶດສະພານີ້ ອົສຕຼາລີປະກາດວ່າຈະໃຫ້ການຊ່ວຍເຫລືອດ່ວນທີ່ມີມູນຄ່າ 2 ລ້ານ 8 ແສນ ໂດລາແກ່ມຽນມາ.
ວັນທີ 6 ພຶດສະພານີ້, ອາເມລິກາປະກາດຈະເພີ່ມການຊ່ວຍເຫລືອອີກ 3 ລ້ານໂດລາໃຫ້ມຽນມາ.ນອກນີ້, ກອງກຳປັ່ນລົບທະຫານເຮືອອາເມລິກາກອງຫນຶ່ງພວມລໍຖ້າຄຳສັ່ງຢູ່ເຂດທະເລໃກ້ກັບປະເທດໄທ,ກຽມເຂົ້າຮ່ວມການກູ້ໄພ.ມື້ດຽວກັນ, ລັດຖະບານແອສປາຍໄດ້ຕົກລົງຕັ້ງມູນນິທິດບໍລິຈາກເງິນ 5 ແສນເອີໂລໃຫ້ໂຄງການອາຫານໂລກຂອງສະຫະປະຊາຊາດເພື່ອຊ່ວຍເຫລືອມຽນມາທີ່ປະສົບໄພ.ລັດຖະບານໄທຕົກລົງເພີ່ມເງິນຊ່ວຍເຫລືອມຽນມາຈາກ 5 ຫມື່ນໂດລາຂຶ້ນເປັນ 1 ແສນໂດລາ.ກະຊວງສາທາລະນະສຸກຂອງໄທຍັງຈະສົ່ງເຄື່ອງປິ່ນປົວ 30 ໂຕນໄປໃຫ້ເຂດປະສົບໄພຂອງມຽນມາໃນວັນທີ 7 ພຶດສະພານີ້.
ນອກນີ້ ອິນໂດເນເຊຍ ອິນເດຍ ສິງກະໂປແລະມາເລເຊຍກໍ່ທະຍອຍກັນກ່າວວ່າຈະໃຫ້ການຊ່ວຍເຫລືອດ້ານມະນຸດສະທຳໂດຍດ່ວນໃຫ້ແກ່ມຽນ ມາ.
ວິທະຍຸກະຈາຍສຽງແຫ່ງຊາດມຽນມາແຈ້ງຂ່າວໃນວັນທີ 6 ພຶດສະພານີ້ວ່າ, ໃນທ້າຍສັບປະດາແລ້ວນີ້ ຈຳນວນຄົນທີ່ເສຍຊີວິດຍ້ອນລົມພາຍຸເທື່ອນີ້ມີຫລາຍກວ່າ 2 ຫມື່ນ 2 ພັນຄົນແລ້ວ.
|
|
|
