ຕາລາງລາຍການ FM93Mhz

ທ່ານສີຈິ້ນຜິງເຂົ້າຮ່ວມກອງປະຊຸມເວທີປຶກສາຫາລືເສດຖະກິດສາກົນແຊງປີເຕີສເບີກຄັ້ງທີ 25 ແລະ ກ່າວຄຳປາໄສ

2022-06-18 14:53:05 CRI


ຕອນຄ່ຳວັນທີ 17  ມິຖຸນານີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມເວທີປຶກສາຫາລືເສດຖະກິດສາກົນແຊງປີເຕີສເບີກຄັ້ງທີ 25 ຕາມຄຳເຊີນ ແລະ ກ່າວຄຳປາໄສຜ່ານທາງວີດີໂອ.

 

ທ່ານສີຈິ້ນຜິງຊີ້ອອກວ່າ, ປັດຈຸບັນນີ້, ການປ່ຽນແປງຮອບຮ້ອຍປີຂອງໂລກ ບວກກັບ ການແຜ່ລະບາດຂອງພະຍາດໂຄວິດ-19, ເສດຖະກິດໂລກາພິວັດໄດ້ປະເຊີນກັບກະແສຜິດກັບຍຸກສະໄໝ, ການຈັດຕັ້ງປະຕິບັດວາລະການພັດທະນາແບບຍືນຍົງຮອດປີ 2030 ຂອງອົງການສະຫະປະຊາຊາດໄດ້ປະເຊີນກັບສິ່ງທ້າທາຍແບບບໍ່ເຄີຍມີມາກ່ອນ.

 

ທ່ານສີຈິ້ນຜິງໄດ້ສະເໜີຂໍ້ລິເລີ່ມ 4 ຂໍ້. ຄື: ໜຶ່ງ, ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການພັດທະນາ. ຕ້ອງປະຕິບັດຕາມລັດທິຫຼາຍຝ່າຍທີ່ແທ້ຈິງ, ເຄົາລົບ ແລະ ສະໜັບສະໜູນບັນດາປະເທດເດີນຕາມເສັ້ນທາງພັດທະນາທີ່ສອດຄ່ອງກັບສະພາບຄວາມເປັນຈິງຂອງປະເທດຕົນ, ສ້າງເສດຖະກິດໂລກແບບເປີດກວ້າງ, ຍົກສູງລັກສະນະຕົວແທນ ແລະ ສິດປະກອບຄຳເຫັນຂອງປະເທດທີ່ເປັນຕະຫຼາດຈະເລີນໃໝ່ ແລະ ປະເທດພວມພັດທະນາໃນການຄຸ້ມຄອງເສດຖະກິດຂອງໂລກ, ຊຸກຍູ້ການພັດທະນາແບບດຸນດ່ຽງ ປະສານສົມທົບກັນ ແລະ ກວມລວມຂອງທົ່ວໂລກ.

 

ສອງ, ຍົກລະດັບການພົວພັນຄູ່ຮ່ວມພັດທະນາ. ຕ້ອງເພີ່ມທະວີການຮ່ວມມືໃຕ້-ເໜືອ, ການຮ່ວມມືໃຕ້ໃຕ້, ເຕົ້າໂຮມຊັບພະຍາກອນ ແລະເວທີການຮ່ວມມື, ພັດທະນາເຄືອຂ່າຍຄູ່ຮ່ວມພັດທະນາ, ເພີ່ມທະວີການຊ່ວຍເຫຼືອດ້ານການພັດທະນາ, ສ້າງພະລັງກວມລວມໃນການພັດທະນາ, ຫຼຸດຜ່ອນຄວາມແຕກໂຕນກັນດ້ານການພັດທະນາ.

 

ສາມ, ຊຸກຍູ້ຂະບວນການເສດຖະກິດໂລກາພິວັດ. “ຕ້ອງເພີ່ມທະວີການເຊື່ອມໂຍງເຊື່ອມຈອດກັນດ້ານນະໂຍບາຍການພັດທະນາ ກົດລະບຽບ ແລະ ມາດຕະຖານສາກົນ, ປະຖິ້ມການກະທຳທີ່ຕັດການພົວພັນ, ຢຸດການສະໜອງ, ການລົງໂທດແຕ່ຝ່າຍດຽວ, ແລະການໃຊ້ຄວາມກົດດັນສຸດຂີດ, ລົບລ້າງກຳແພງທາງການຄ້າ, ປົກປັກຮັກສາຄວາມໝັ້ນຄົງຂອງຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງຂອງໂລກ, ຮ່ວມມືກັນຮັບມືກັບວິກິດການດ້ານສະບຽງອາຫານ ແລະ ວິກິດການພະລັງງານທີ່ນັບມື້ນັບຮ້າຍແຮງຂຶ້ນ, ເຮັດໃຫ້ເສດຖະກິດໂລກຟື້ນຟູຄືນໃໝ່.

 

ສີ່, ຍຶດໝັ້ນການຂັບເຄື່ອນດ້ວຍການປະດິດສ້າງໃໝ່. ຕ້ອງຂຸດຄົ້ນກຳລັງບົ່ມຊ້ອນແຫ່ງການເຕີບໂຕດ້ວຍການປະດິດສ້າງໃໝ່, ປັບປຸງ ແລະ ປະດິດສ້າງສະພາບແວດລ້ອມດ້ານກົດລະບຽບ ແລະ ລະບຽບການ, ທຳລາຍກຳແພງດ້ານການເຄື່ອນໄຫວຂອງປັດໄຈການປະດິດສ້າງໃໝ່, ລົງເລິກການແລກປ່ຽນ ແລະ ການຮ່ວມມືດ້ານການປະດິດສ້າງໃໝ່, ຊຸກຍູ້ໃຫ້ວິທະຍາສາດເຕັກນິກເຊື່ອມໂຍງກັບເສດຖະກິດຢ່າງເລິກເຊິ່ງ, ຮ່ວມກັນຊົມໃຊ້ໝາກຜົນແຫ່ງການປະດິດສ້າງໃໝ່.

 

ທ່ານສີຈິ້ນຜິງຊີ້ອອກວ່າ, ຈີນຈະສືບຕໍ່ຊຸກຍູ້ການພັດທະນາຢ່າງມີຄຸນນະພາບສູງ, ເປີດກວ້າງການເປີດປະຕູສູ່ພາຍນອກໃນລະດັບສູງຢ່າງເດັດດ່ຽວໜຽວແໜ້ນ, ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຢ່າງມີຄຸນນະພາບສູງ. ຈີນຍິນດີຮ່ວມກັບບັນດາປະເທດໃນໂລກ, ຮ່ວມກັນສ້າງອະນາຄົດແຫ່ງການພັດທະນາ, ຮ່ວມກັນຊົມໃຊ້ໂອກາດແຫ່ງການເຕີບໂຕ, ປະກອບສ່ວນອັນໃໝ່ເຂົ້າໃນການລົງເລິກການພັດທະນາ ແລະ ການຮ່ວມມືຂອງໂລກ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.