ໃນຫຼາຍປີມໍ່ໆມານີ້, ອາເມຣິກາໄດ້ເພີ່ມການເຄື່ອນໄຫວຢູ່ທະເລຈີນໃຕ້. ປີ 2021, ເປັນພຽງກຳປັ່ນໂຈມຕີທາງບົກແລະທາງທະເລ ແລະ ກຳປັ່ນບັນທຸກເຮືອບິນຂອງກອງທັບອາເມຣິກາເທົ່ານັ້ນ ໄດ້ບຸກເຂົ້າທະເລຈີນໃຕ້ຕັ້ງ 12 ຄັ້ງ. ຈາກນີ້ເຫັນໄດ້ວ່າ, ອາເມຣິກາໄດ້ມີຄວາມສົນໃຈຕໍ່ທະເລຈີນໃຕ້ນັບມື້ນັບຫຼາຍ. ໃນປີ 2022, ອາເມຣິກາຍິ່ງໄດ້ດຳເນີນການເຄື່ອນໄຫວຕ່າງໆຢູ່ທະເລຈີນໃຕ້ນັບມື້ນັບຫຼາຍຂຶ້ນ. ໃນຫຼາຍມື້ກ່ອນ, ກຳປັ່ນຂັບໄລ່ຂີປະນາວຸດລຳໜຶ່ງຂອງອາເມຣິກາໄດ້ບຸກເຂົ້າທະເລຈີນໃຕ້ຢ່າງຜິດກົດໝາຍ ດ້ວຍຂໍ້ອ້າງອັນທີ່ເອີ້ນວ່າ “ສິດ ແລະ ເສລີພາບດ້ານການເດີນເຮືອ”. ອາດເວົ້າໄດ້ວ່າ, ອາເມຣິກາ “ແມ່ນຜູ້ທີ່ເປັນໄພຂົ່ມຂູ່ຕໍ່ຄວາມໝັ້ນຄົງຢູ່ທະເລຈີນໃຕ້” ແລະ  “ຜູ້ທຳລາຍສັນຕິພາບ ແລະ ສະຖຽນລະພາບຂອງພາກພື້ນ”.

ປີນີ້ແມ່ນປີລະນຶກການລົງນາມໃນ “ຖະແຫຼງການຮ່ວມວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້” ຄົບຮອບ 20 ປີ. 20 ປີມານີ້, ຈີນ ແລະ ບັນດາປະເທດສະມາຊິກອາຊຽນໄດ້ສ້າງຊ່ອງທາງສົນທະນາ ແລະ ກົນໄກປຶກສາຫາລືຫຼາຍລະດັບ ເຊິ່ງລວມທັງຂັ້ນນຳເຖິງລະດັບປະຕິບັດຕົວຈິງ. ຝ່າຍຕ່າງໆໄດ້ດຳເນີນໂຄງການຮ່ວມມືຕົວຈິງຫຼາຍຢ່າງໃນຂົງເຂດອະນຸລັກສິ່ງແວດລ້ອມທະເລ, ການຄົ້ນຄວ້າວິທະຍາສາດທາງທະເລ, ຄວາມໝັ້ນຄົງທາງທະເລ ແລະອື່ນໆ ເຊິ່ງເປັນການປົກປັກຮັກສາສະຖຽນລະພາບຂອງທະເລຈີນໃຕ້ໃນດ້ານກວມລວມ, ການພົວພັນລະຫວ່າງຈີນ ແລະ ບັນດາປະເທດສະມາຊິກອາຊຽນ ກໍໄດ້ບັນລຸການພັດທະນາແບບກ້າວກະໂດດຂັ້ນ, ທະເລຈີນໃຕ້ໄດ້ກາຍເປັນບ້ານເມືອງຮ່ວມຂອງຈີນ ແລະ ບັນດາປະເທດສະມາຊິກອາຊຽນ.

ຄຽງຄູ່ກັບທະເລຈີນໃຕ້ໄດ້ປະເຊີນກັບສິ່ງທ້າທາຍຮອບໃໝ່ໃນປີ 2013, ຈີນ ແລະ ບັນດາປະເທດສະມາຊິກອາຊຽນໄດ້ລິເລີ່ມການປຶກສາຫາລືກ່ຽວກັບ “ກົດແຫ່ງການປະພຶດຢູ່ທະເລຈີນໃຕ້”. ຫວ່າງກ່ອນນີ້ບໍ່ດົນ, ທ່ານຫວາງຢີ້ ທີ່ປຶສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນເດີນທາງໄປຢ້ຽມຢາມຫຼາຍປະເທດຂອງອາຊີຕາເວັນອອກສຽງໃຕ້, ຝ່າຍຕ່າງໆໄດ້ກ້າວເຖິງຂັ້ນມີຄວາມເຫັນທີ່ເປັນເອກະພາບກັນ ກ່ຽວກັບ “ຈີນ ແລະ ບັນດາປະເທດສະມາຊິກອາຊຽນຄວນຮ່ວມກັນຄຸ້ມຄອງ ແລະ ຄວບຄຸມສະຖານະການທາງທະເລ ດ້ວຍຮູບການສົນທະນາ ແລະ ປຶກສາຫາລືກັນ”.

ຈາກນີ້ເຫັນໄດ້ວ່າ, ໃນໄລຍະດົນນານມານີ້, ຈີນ ແລະ ບັນດາປະເທດສະມາຊິກອາຊຽນມີຄວາມເຫັນທີ່ເປັນເອກະພາບກັນສຳຄັນຢ່າງໜຶ່ງ, ນັ້ນກໍຄື: ຈະກຳຊາຕາກຳສັນຕິພາບ ແລະ ສະຖຽນລະພາບຂອງທະເລຈີນໃຕ້ດ້ວຍຕົນເອງ. ຍ້ອນວ່າມີແຕ່ທະເລຈີນໃຕ້ມີສັນຕິພາບ ແລະ ສະຖຽນລະພາບເທົ່ານັ້ນ, ບັນດາປະເທດໃນພາກພື້ນນີ້ຈິ່ງຈະມີສະພາບແວດລ້ອມການພັດທະນາທີ່ດີງາມ. ສະນັ້ນ, ສອງຝ່າຍລ້ວນແຕ່ໄດ້ຕັ້ງໜ້າຊຸກຍູ້ ແລະ ຈັດຕັ້ງປະຕິບັດລະບຽບການປົກຄອງຢູ່ທະເລຈີນໃຕ້ ເພື່ອເພີ່ມທະວີການຄຸ້ມຄອງ ແລະ ຄວບຄຸມຄວາມຂັດແຍ້ງກັນຂອງພາກພື້ນ ແລະ ການຮ່ວມມືກັນທາງທະເລ.

ການປົກປັກຮັກສາສັນຕິພາບ ແລະ ສະຖຽນລະພາບ ແມ່ນປັດໄຈສຳຄັນອັນດັບໜຶ່ງສຳລັບການພັດທະນາຂອງພາກພື້ນ ແລະ ກໍແມ່ນຄວາມຮຽກຮ້ອງຕ້ອງການຮ່ວມຂອງຈີນ ແລະ ບັນດາປະເທດສະມາຊິກອາຊຽນ. ທະເລຈີນໃຕ້ບໍ່ແມ່ນ “ສະໜາມແຂ່ງຂັນ” ສຳລັບປະເທດຕ່າງໆທີ່ຢູ່ນອກພາກພື້ນນີ້ ແລະ ຍິ່ງບໍ່ຄວນກາຍເປັນ “ສະໜາມແຂ່ງຂັນ” ລະຫວ່າງປະເທດໃຫຍ່ໆ. ປະເທດທີ່ຢູ່ນອກພາກພື້ນນີ້ ເຊິ່ງລວມທັງອາເມຣິກາ ຄວນເຄົາລົບຄວາມປາຖະໜາ ແລະ ຄວາມຄອງຄອຍຂອງປະເທດໃນພາກພື້ນນີ້, ຫາກບໍ່ແມ່ນຕັ້ງໃຈສ້າງຄວາມເຄັ່ງຕຶງຢູ່ທະເລຈີນໃຕ້ ເພື່ອສະແຫວງຫາຜົນປະໂຫຍດສ່ວນຕົວ.