ຕາມຂໍ້ມູນລາຍງານຂອງພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງອັດຕະປື ໃນຕອນເຊົ້າວັນທີ 29 ກັນຍາ 2022, ນໍ້າເຊກອງ ຢູ່ຈຸດວັດແທກບ້ານເວີນແຄນ ເມືອງສາມັກຄີໄຊ ແຂວງອັດຕະປື ວັດແທກໄດ້ 16,28 ແມັດ, ເຊິ່ງຈັດຢູ່ໃນລະດັບເຕືອນໄພອັນຕະລາຍ. ພ້ອມກັນນັ້ນ, ນໍ້າຈາກລໍານໍ້າເຊກອງ ຍັງໄດ້ລົ້ນຝັ່ງໄຫລເຂົ້າຖ້ວມບ້ານເຮືອນຂອງປະຊາຊົນ ຢູ່ເທດສະບານຂອງແຂວງອັດຕະປື, ເຊິ່ງມີບ້ານເວີນແຄນ, ສະເພົາທອງ, ບ້ານບຸ່ງ, ບ້ານຫລັກສາມ ແລະ ບ້ານເຊກອງຖືກນຳ້ຖ້ວມ, ເຮັດໃຫ້ເຮືອນຫລາຍຫລັງ ໄດ້ຮັບຄວາມເສຍຫາຍ, ປະຊາຊົນຫລາຍຄອບຄົວໄດ້ຮີບຮ້ອນຂົນຊັບສິນ-ເຄື່ອງໃຊ້ຍ້າຍໄປໄວພື້ນທີ່ສູງ, ມາຮອດເວລາອອກຂ່າວ, ລະດັບນໍ້າ ຍັງເພີ່ມສູງຂຶ້ນເລື້ອຍໆ.
ຂ່າວເມືອງຈຳປາສັກລາຍງານໃຫ້ຮູ້ວ່າ: ວັນທີ 28 ກັນຍາ2022ນີ້ ເມືອງຈຳປາສັກໄດ້ຮັບຜົນກະທົບຈາກ ພະຍຸ ໂນຣູ ທັງໝົດ 73 ບ້ານ ຄວາມເສຍຫາຍເບື້ອງຕົ້ນມີ ຫຼາຍຈຸດຢູ່ເມືອງເຮົາຄື:ສະພາບນຳ້ຖ້ວມຫຼາຍຈຸດ ໂດຍສະເພາະ ບ້ານທາງແບ່ງ, ບ້ານທາງຄົບ ແລະບ້ານອື່ນໆພາຍໃນເມືອງຈຳປາສັກ,ເສົາໄຟຟ້າລົ້ມຢູ່ບ້ານວັດໄຊ,ແລະນຳ້ໄຫຼຂ້າມທາງ, ຖ້ວມທາງເຂົ້າບ້ານ ໜອງສະໂນ, ທາງເຂົ້າບ້ານໜອງຂາມ, ແລະ ຖ້ວມຕາມບ້ານ,ຕາມຄົວເຮືອນປະຊາຊົນ.
ຕາມການລາຍງານຂອງຄະນະກຳມະການຄຸ້ມຄອງໄພພິບັດ ຂັ້ນແຂວງ ໃນວັນທີ 29 ກັນຍາ ນີ້ ກ່ຽວກັບສະພາບຜົນກະທົບຈາກໄພພິບັດທາງທຳມະຊາດ ລະຫວ່າງວັນທີ 27-29 ກັນຍາ 2022 ແຂວງເຊກອງ ເປັນແຂວງໜຶ່ງທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ເນື່ອງຈາກໄດ້ມີລົມພາຍຸເຂດຮ້ອນ ໂນຣູ (Noru) ຫົວທີ 16 ເຂົ້າພັດຜ່ານ ແຂວງເຊກອງ ໃນວັນທີ27-28 ກັນຍາ ແລະ ໄດ້ສົ່ງຜົນກະທົບ ໂດຍກົງຕໍ່ປະຊາຊົນພາຍໃນແຂວງ. ເມືອງກະລຶມ ແລະ ເມືອງດາກຈຶງ ເປັນເມືອງທີ່ ໄດ້ຮັບຜົນກະທົບຫຼາຍກວ່າໝູ່ ມີ 28 ບ້ານ, ສູນຫາຍ 1 ຄົນ (ເມືອງດາກຈຶງ), ເສັ້ນທາງ 20 ເສັ້ນ, ລະບົບນໍ້າລິນ 1 ແຫ່ງ, ໄຟຟ້າ 1 ຈຸດ; ໃນວັນທີ 28 ລະດັບນໍ້າເຊກອງ ສາມາດແທກໄດ້ 14,26 ແມັດ ເວລາ 19:00 ໂມງ, ແລະ ສາຂາຂອງແມ່ນຳ້ເຊກອງ ເກີດມີນໍ້າຖ້ວມຂັງ, ນໍ້າປ່າໄຫຼຫຼາກ; ມາຮອດວັນທີ 29 ລະດັບນ້ຳເຊກອງ ໄດ້ລົດລົງ ແທກໄດ້ 7,21 ແມັດ ເວລາ 9:00 ໂມງ ແລະ ສາຂາຂອງແມ່ນ້ຳເຊກອງ ແມ່ນໄດ້ລົດລົງ.
ແຫລ່ງຂ່າວ: ແຂວງເຊກອງ ແຂວງອັດຕະປື ໜັງສືພິມລາວພັດທະນາ