ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກຄອມມູນິດຈີນໄດ້ໄຂຂຶ້ນ ຢູ່ນະຄອນຫຼວງປັກກິ່ງໃນວັນທີ 16 ຕຸລານີ້, ທ່ານ ສີຈິ້ນຜິງ ໄດ້ຕາງໜ້າຄະນະກຳມະການສູນກາງພັກຄອມມູນິດຈີນສະໄໝທີ 19 ຜ່ານບົດລາຍງານຕໍ່ກອງປະຊຸມ ໂດຍຊີ້ໃຫ້ເຫັນວ່າ: ນັບແຕ່ປັດຈຸບັນນີ້ເປັນຕົ້ນໄປ, ໜ້າທີ່ໃຈກາງຂອງພັກຄອມມູ ນິດຈີນກໍແມ່ນເຕົ້າໂຮມຄວາມສາມັກຄີ ແລະ ນຳພາປະຊາຊົນບັນດາເຜົ່າໃນທົ່ວ ປະເທດ ນັ້ນຄື: ສ້າງປະເທດຈີນເປັນປະເທດສັງຄົມນິຍົມທີ່ທັນສະໄໝ ແລະເຂັ້ມແຂງໃຫ້ສຳເລັດຢ່າງຮອບດ້ານ, ບັນລຸເປົ້າໝາຍສູ້ຊົນຄົບຮອບ 100 ປີເຫດການທີ 2, ຊຸກຍູ້ການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງປະຊາ ຊາດຈີນຄືນໃໝ່ຢ່າງຮອບດ້ານດ້ວຍການຫັນເປັນຄວາມທັນສະໄໝແບບຈີນ.

    ທ່ານ ສີຈິ້ນຜິງ ໄດ້ສະເໜີເອກະລັກພິເສດ 5 ຂໍ້ຂອງການຫັນເປັນຄວາມທັນສະໄໝແບບຈີນ, ຄື:  ການຫັນເປັນຄວາມທັນສະໄໝແບບຈີນ ແມ່ນການຫັນເປັນ ຄວາມທັນສະໄໝທີ່ມີປະຊາກອນອັນມະຫາສານ, ແມ່ນການຫັນເປັນຄວາມທັນສະໄໝທີ່ປະຊາຊົນສ້າງຄວາມຮັ່ງມີຮ່ວມກັນ, ແມ່ນການຫັນເປັນຄວາມທັນສະໄໝທີ່ມີຄວາມສີວິໄລດ້ານວັດຖຸ ແລະ ຈິດໃຈປະສົມປະສານກັນ, ແມ່ນການຫັນເປັນ ຄວາມທັນສະໄໝທີ່ມະນຸດແລະທຳມະຊາດຢູ່ຮ່ວມກັນຢ່າງກົມກຽວກັນ, ແມ່ນ ການຫັນເປັນຄວາມທັນສະໄໝທີ່ເດີນຕາມເສັ້ນທາງພັດທະນາໂດຍສັນຕິ.

    ທ່ານ ສີຈິ້ນຜິງ ຍັງໄດ້ສະເໜີຄວາມຮຽກຮ້ອງຕ້ອງການອັນທາດແທ້ຂອງການຫັນເປັນຄວາມທັນສະໄໝແບບຈີນ, ຄື: ຍຶດໝັ້ນການນຳພາຂອງພັກຄອມມູນິດຈີນ, ຍຶດໝັ້ນສັງຄົມນິຍົມທີ່ມີສີສັນພິເສດຂອງຈີນ, ບັນລຸການພັດທະນາທີ່ມີຄຸນນະພາບສູງ, ພັດທະນາປະຊາທິປະໄຕທົ່ວຂັ້ນຕອນ, ເສີມສ້າງໂລກທາງຈິດໃຈຂອງປະຊາຊົນໃຫ້ມີຄວາມອຸດົມສົມບູນຂຶ້ນ, ບັນລຸໃຫ້ປະຊາຊົນທຸກຖ້ວນໜ້າຮັ່ງມີຮ່ວມກັນ, ຊຸກຍູ້ໃຫ້ມະນຸດ ແລະທຳມະຊາດຢູ່ຮ່ວມກັນຢ່າງກົມກຽວກັນ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ສ້າງຮູບແບບໃໝ່ແຫ່ງຄວາມສີວິໄລຂອງມວນມະນຸດ.

    ສູນກາງພັກຄອມມູນິດຈີນໄດ້ຕັ້ງເປົ້າໝາຍສູ້ຊົນຄົບຮອບຮ້ອຍປີ 2 ເຫດການເພື່ອພັດທະນາປະເທດຊາດ, ເປົ້າໝາຍສູ້ຊົນຄົບຮອບຮ້ອຍປີເຫດການທີ 1 ຄື: ສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານໃນເວລາພັກຄອມມູນິດຈີນສ້າງຕັ້ງຂຶ້ນຄົບຮອບ 100 ປີ, ເຊິ່ງໄດ້ສຳເລັດໄປຮຽບຮ້ອຍແລ້ວ. ສ່ວນເປົ້າໝາຍສູ້ຊົນເຫດການທີ 2 ຄື: ເມື່ອຮອດເວລາສາທາລະນະລັດປະຊາຊົນຈີນສ້າງຕັ້ງຂຶ້ນຄົບຮອບ 100 ປີ ກໍຄືກາງສະຕະວັດນີ້, ສ້າງປະເທດຈີນໃຫ້ເປັນປະເທດ ສັງຄົມນິຍົມທີ່ທັນສະໄໝ ມັ່ງຄັ່ງເຂັ້ມແຂງ ມີປະຊາທິປະໄຕ ມີຄວາມສີວິໄລ ມີຄວາມກົມກຽວກັນ ແລະສວຍງາມ.